Mahsulotlar, xomashyo va materiallarning monopol turlarini tovar-xomashyo birjasi orqali sotish roʻyxatini yanada kengaytirish va hajmlarini koʻpaytirish, shuningdek kichik biznes va xususiy tadbirkorlik subyektlarining ulardan foydalanishini kengaytirish maqsadida Vazirlar Mahkamasi qaror qiladi:

1. Oʻzbekiston Respublikasi Iqtisodiyot vazirligi, Monopoliyadan chiqarish va raqobatni rivojlantirish davlat qoʻmitasi, “Oʻzbekiston respublika tovar xom-ashyo birjasi” ochiq aksiyadorlik jamiyatining mahsulotlarning qoʻshimcha monopol turlari roʻyxatini tasdiqlash, ularni 1-ilovaga muvofiq birja savdolariga qoʻyishning eng kam hajmini belgilash toʻgʻrisidagi taklifiga rozilik berilsin.

2. Belgilab qoʻyilsinki, 2011-yil 1-iyuldan boshlab:

mahsulotlarning 1-ilovaga kiritilgan monopol turlarini sotish Vazirlar Mahkamasining 2004-yil 5-fevraldagi 57-son qarori bilan tasdiqlangan Moddiy-texnika resurslari strategik turlarini sotishning maxsus tartibi toʻgʻrisidagi nizomning I boʻlimiga muvofiq amalga oshiriladi;

ishlab chiqaruvchi tashkilotlar mahsulotlarning ushbu qarorga 1-ilovaga muvofiq monopol turlari majburiy tartibda birja savdolariga qoʻyilishini amalga oshiradilar, 2011-yil uchun ular boʻyicha muddatini uzaytirish huquqisiz shartnomalar tuzilgan hajmlar bundan mustasno;

mahsulotlarning 1-ilovada koʻrsatilgan, birja savdolarida sotib olingan monopol turlaridan faqat oʻz ehtiyojlari uchun foydalaniladi, mahsulotlarni ishlab chiqarish va qayta sotish taqiqlanadi.

1-ilovada koʻrsatilgan, isteʼmolchilar tomonidan birja savdolarida sotib olingan resurslarni qayta sotish holatlari aniqlangan taqdirda qayta sotishdan olingan daromad budjetga olib qoʻyiladi, daromadga olingan daromad summasining 50 foizi miqdorida jarima sanksiyalari solinadi, undirilgan jarimalar ham budjetga oʻtkaziladi.

Korxonalarning resurslarni qayta sotish holatlariga yoʻl qoʻygan rahbarlari qonun hujjatlarida belgilangan tartibda javob beradilar.

3. 2011-yil 1-iyuldan boshlab shunday tartib joriy etilsinki, unga muvofiq mahsulotlarning ushbu qarorga 1-ilovada, shuningdek Vazirlar Mahkamasining 2004-yil 5-fevraldagi 57-son qaroriga 1 va 2-ilovalarda koʻrsatilgan strategik va monopol turlarining kalendar oy yakunlariga koʻra toʻgʻridan toʻgʻri shartnomalar boʻyicha eksportga va ichki bozorga sotilmagan hajmlari ishlab chiqaruvchi tashkilotlar (sotuvchilar) tomonidan majburiy tartibda birja savdolariga qoʻyiladi.

4. “Oʻzbekiston respublika tovar xom-ashyo birjasi” ochiq aksiyadorlik jamiyati, Oʻzbekiston Respublikasi Iqtisodiyot vazirligi, Monopoliyadan chiqarish va raqobatni rivojlantirish davlat qoʻmitasi hamda Davlat mulki qoʻmitasining Birja savdosi qoidalariga oʻzgartirishlar kiritish toʻgʻrisida mahsulotlarning sotib olingan yuqori likvidli va monopol turlaridan oʻz ishlab chiqarish ehtiyojlari uchun foydalanuvchi qatnashchilarning birja savdolaridan foydalanishi mexanizmini takomillashtirishga yoʻnaltirilgan taklifi maʼqullansin.

5. Vazirlar Mahkamasining 2004-yil 5-fevraldagi 57-son qarori (Oʻzbekiston Respublikasi QT, 2004-y., 2-son, 10-modda) bilan tasdiqlangan Moddiy-texnika resurslari strategik turlarini sotishning maxsus tartibi toʻgʻrisidagi nizomga 2-ilovaga muvofiq oʻzgartirish va qoʻshimchalar kiritilsin.

6. Oʻzbekiston Respublikasi Iqtisodiyot vazirligi Monopoliyadan chiqarish va raqobatni rivojlantirish davlat qoʻmitasi, Adliya vazirligi, “Oʻzbekiston respublika tovar xom-ashyo birjasi” ochiq aksiyadorlik jamiyati, manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. 5-bandning uchinchi xatboshidagi “ishlab chiqaruvchi korxonalar” soʻzlaridan keyin “(sotuvchilar)” soʻzi qoʻshilsin;

2. 31-bandda:

ikkinchi xatboshidagi “dizel yonilgʻisi” soʻzlaridan keyin “budjet mablagʻlari hisobiga” soʻzlari qoʻshilsin;

quyidagi mazmundagi xatboshi qoʻshilsin:

“Bunda budjet tashkilotlari avtomobil benzini va dizel yonilgʻisini birja savdolari orqali budjetdan tashqari mablagʻlar hisobiga sotib olishlari mumkin”.

3. 32-bandda:

“belgilangan narxlar boʻyicha” soʻzlari chiqarib tashlansin;

quyidagi mazmundagi xatboshi qoʻshilsin:

“Bunda avtomobil benzinini sotish belgilangan narxlar boʻyicha, dizel yonilgʻisini esa neftni qayta ishlash zavodining neft bazalarigacha yetkazib berish uchun tashish toʻlovlari va neft bazalarining ustama narxlari ulgurji-sotish narxlari yigʻindisi sifatida hosil boʻladigan narxlar boʻyicha amalga oshiriladi”.

4. 34-35-bandlar quyidagi tahrirda bayon qilinsin:

“34. Keyinchalik aholiga sotish uchun moʻljallangan avtomobil benzini va dizel yonilgʻisining bozor fondini sotish tegishli litsenziyaga ega boʻlgan avtomobil yonilgʻisi quyish shoxobchalari orqali amalga oshiriladi.

Avtomobil yonilgʻisi quyish shoxobchalari tomonidan avtomobil benzini va dizel yonilgʻisini sotib olish neft bazalari bilan toʻgʻridan toʻgʻri shartnomalar boʻyicha neftni qayta ishlash zavodining neft bazalarigacha yetkazib berish uchun tashish toʻlovlari va neft bazalarining ustama narxlari ulgurji-sotish narxlari, shuningdek qonun hujjatlarida belgilangan miqdorda va holatlarda narxga kiritiladigan summalar yigʻindisi sifatida hosil boʻladigan narxlar boʻyicha amalga oshiriladi.

Avtomobil yonilgʻisi quyish shoxobchalari avtomobil benzini va dizel yonilgʻisini aholiga belgilangan narxlar boʻyicha sotadilar.

35. Avtomobil benzini va dizel yonilgʻisi, mazkur Nizomning 31 — 34-bandlarida koʻrsatilgan hajmlardan tashqari, ochiq birja savdolari orqali sotiladi”.

5. 36-bandning ikkinchi xatboshi quyidagi tahrirdagi ikkinchi — toʻrtinchi xatboshilar bilan almashtirilsin:

“Ochiq birja savdolarida boshlangʻich narxi:

avtomobil benziniga — belgilangan narxlar boʻyicha;

dizel yonilgʻisiga — neftni qayta ishlash zavodining neft bazalarigacha yetkazib berish uchun tashish toʻlovlari va neft bazalarining ustama narxlari ulgurji-sotish narxlari yigʻindisi sifatida hosil boʻladigan narxlar boʻyicha belgilanadi”;

uchinchi va toʻrtinchi xatboshilar tegishli ravishda beshinchi va oltinchi xatboshilar deb hisoblansin.