31. Roʻyxatdan oʻtkazuvchi organ mazkur Nizomning 30-bandida koʻrsatilgan barcha hujjatlar olingandan keyin besh ish kuni mobaynida tizim orqali yuridik shaxslarning yagona davlat reyestriga NNT tugatilganligi toʻgʻrisidagi yozuvlarni kiritadi.

(31-bandning birinchi xatboshisi Oʻzbekiston Respublikasi Vazirlar Mahkamasining 2024-yil 18-dekabrdagi 847-sonli qarori tahririda — Qonunchilik maʼlumotlari milliy bazasi, 24.12.2024-y., 09/24/847/1056-son)

Agar hujjatlarning toʻliq roʻyxati taqdim etilmasa yoki ular zarur tartibda rasmiylashtirilmagan boʻlsa, shuningdek taqdim etilgan hujjatlarda atayin notoʻgʻri maʼlumot keltirilganligi yoxud NNTni tugatishning qonunchilikda belgilangan tartibi buzilganligi aniqlansa davlat reyestriga yozuvlar kiritilishi rad etilishi mumkin.

(31-bandning ikkinchi xatboshisi Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)

Davlat reyestriga yozuv kiritish rad etilgan taqdirda roʻyxatdan oʻtkazuvchi organ rad etish sabablari aniq koʻrsatilgan xabarnomani tizim orqali tugatish komissiyasiga beradi hamda olingan barcha hujjatlarni qaytaradi.

(31-bandning uchinchi xatboshisi Oʻzbekiston Respublikasi Vazirlar Mahkamasining 2024-yil 18-dekabrdagi 847-sonli qarori tahririda — Qonunchilik maʼlumotlari milliy bazasi, 24.12.2024-y., 09/24/847/1056-son)

Davlat reyestriga yozuv kiritish haqidagi qaror roʻyxatdan oʻtkazuvchi organ rahbarining buyrugʻi shaklida rasmiylashtiriladi.

32. Roʻyxatdan oʻtkazuvchi organ davlat reyestriga NNT tugatilganligi toʻgʻrisidagi yozuvlar kiritilgandan keyin ikki ish kuni mobaynida:

NNT tugatilganligi toʻgʻrisida tugatish komissiyasini, davlat soliq xizmati va statistika organlarini belgilangan tartibda xabardor qiladi;

NNTga berilgan litsenziya va ruxsatnomalarni (ular mavjud boʻlgan taqdirda) ularni bergan organlarga topshiradi.

III. Nodavlat notijorat tashkilotlarini majburiy tugatish

33. NNTni majburiy tugatish mazkur Nizomning 2-ilovasiga muvofiq sxema boʻyicha amalga oshiriladi.

33¹. Roʻyxatdan oʻtkazuvi organ NNTlarning oʻz faoliyati toʻgʻrisida har yili 1-fevralga qadar hisobot topshirishi holatini monitoring qiladi. Monitoring natijasi boʻyicha joriy yilning 1-mart kuniga qadar NNTlarning faollik holatiga baho beriladi, hisobot topshirmagan NNTlarga nisbatan qonunchilikda belgilangan tartibda taʼsir choralari koʻriladi.

Quyidagi holatlardan birida NNTning faollik holati roʻyxatdan oʻtkazuvchi organning xulosasi asosida uzoq muddat faoliyat koʻrsatmayotgan holatga oʻzgartiriladi hamda Nizomning 3-ilovasiga muvofiq Uzoq muddat faoliyat yuritmayotgan NNTlarning davlat reyestriga kiritiladi:

surunkasiga uch yil davomida oʻz faoliyati toʻgʻrisidagi hisobotni taqdim qilmaganda. Bunda roʻyxatdan oʻtkazuvchi organ tomonidan NNTga nisbatan taʼsir choralari koʻrilgan boʻlishi, NNTning rahbar organiga hisobot taqdim etilmaganligi yuzasidan ogohlantirish yuborilgan boʻlishi lozim;

roʻyxatdan oʻtkazuvchi organ tomonidan faoliyat koʻrsatmayotgan NNTning yuridik manzili joyiga chiqilgan holda oʻrganilib, tashkilotning mazkur yuridik manzilda faoliyat yuritmasligi yuzasidan dalolatnoma tuzilganda. Bunda NNTning yuridik manzili oʻzgarganligiga aniqlik kiritish yuzasidan roʻyxatdan oʻtkazuvchi organ tomonidan NNTning rahbar organlariga tegishli xatlar yuboriladi;

NNTning joriy rahbar organlari toʻgʻrisida maʼlumotlar mavjud boʻlmagan taqdirda. Bunda roʻyxatdan oʻtkazuvchi organ NNTga, uning tashabbuskorlari yoki taʼsischilari (muassislari)ga tegishli xatlar yuboradi, NNTning rahbar organlarini aniqlash yuzasidan tegishli huquqni muhofaza qiluvchi organlarining xulosalarini oladi;

NNTning soliq va boshqa qarzdorligi mavjudligi sababli, uning maqsad va vazifalarini amalga oshirish imkoniyati boʻlmagan taqdirda. Bunda roʻyxatdan oʻtkazuvchi organ tomonidan soliq xizmati organlari va boshqa tashkilotlardan NNTning qarzdorligi boʻyicha tegishli xulosalar olinadi.

NNTning Uzoq muddat faoliyat yuritmayotgan NNTlarning davlat reyestriga kiritilganligi haqida tizimda va roʻyxatdan oʻtkazuvchi organning rasmiy veb saytida eʼlon beriladi.

Roʻyxatdan oʻtkazuvchi organ NNT faoliyatiga oid maʼlumotlarni olish uchun tizim orqali quyidagi idora va tashkilotlarga soʻrovnoma yuboradi:

statistika organiga — taqdim etilgan hisobotlar yuzasidan;

soliq xizmati organiga — taqdim etilgan hisobotlar va NNTning qarzdorligi yuzasidan;

koʻchmas mulkka boʻlgan huquqlarni roʻyxatdan oʻtkazuvchi organga — yuridik manzili va koʻchmas mulkka boʻlgan huquqlari yuzasidan.

Ushbu bandning toʻqqizinchi — oʻn birinchi xatboshilarida koʻrsatilgan idora va tashkilotlar tegishli soʻrovnoma kelib tushgan kundan boshlab besh ish kuni ichida oʻzlarining maʼlumotlar bazalarida NNT toʻgʻrisida mavjud boʻlgan maʼlumotlarni Tizim orqali taqdim etadi. Bunda tegishli idora va tashkilotlar tomonidan roʻyxatdan oʻtkazuvchi organga taqdim etiladigan maʼlumotlar tarkibi oʻzaro maʼlumot almashish boʻyicha kelishuvlarga asosan aniqlanadi.

Uzoq muddat faoliyat yuritmayotgan NNTlarning davlat reyestriga kiritilgandan boshlab 1 yil davomida mazkur bandning uchinchi — oltinchi xatboshilarida koʻrsatilgan holatlar bartaraf etilganda, NNT ushbu reyestrdan chiqariladi. Bunda NNTning rahbar organi tomonidan roʻyxatdan oʻtkazuvchi organga ariza taqdim etiladi.

Uzoq muddat faoliyat yuritmayotgan NNTlarning davlat reyestriga kiritilgan va bir yildan ortiq mazkur reyestrdan chiqarilmagan NNTlarga nisbatan roʻyxatdan oʻtkazuvchi organ tomonidan qonunchilikka muvofiq NNTning faoliyatini toʻxtatib qoʻyish yuzasidan sudga taqdimnoma kiritiladi va kelgusida faoliyatini tugatish boʻyicha choralar koʻriladi.

33². Ijtimoiy ahamiyatga ega boʻlgan (taʼlim, sogʻliqni saqlash, atrof-muhitni muhofaza qilish, aholining ijtimoiy zaif qatlamlarini qoʻllab-quvvatlash va boshqa) sohalarda faoliyat yuritgan va Uzoq muddat faoliyat yuritmayotgan NNTlarning davlat reyestridan chiqarilgan NNTlarga bir yil davomida roʻyxatdan oʻtkazuvchi organ respublika va mahalliy ijro etuvchi hokimiyat organlari, nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash boʻyicha faoliyat koʻrsatuvchi jamoat fondlari hamda boshqa tashkilotlar bilan hamkorlikda koʻmaklashadi.

Bunda roʻyxatdan oʻtkazuvchi organ NNT faoliyati tiklanishiga koʻmaklashish maqsadida quyidagi tadbirlarni amalga oshiradi:

NNT faoliyatini moliyaviy holati barqarorligini taʼminlash maqsadida subsidiya shaklida bir martalik moliyaviy koʻmak ajratilishi yuzasidan nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash boʻyicha faoliyat koʻrsatuvchi jamoat fondlariga;

Qoraqalpogʻiston Respublikasi, viloyatlar markazlari va Toshkent shahridagi “Nodavlat notijorat tashkilotlari uylari”ga NNTlarni joylashtirish boʻyicha Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga;

davlat mulkida boʻlgan boʻsh turgan binolar va inshootlarda NNTni uch yildan koʻp boʻlmagan muddatga joylashtirish choralarini koʻrish boʻyicha Davlat aktivlarini boshqarish agentligiga taklif kiritadi.

Roʻyxatdan oʻtkazuvchi organ NNTning ustav maqsadlariga muvofiq, manfaatdor davlat organlari va tashkilotlari bilan ijtimoiy sheriklik munosabatlarini oʻrnatishga hamda respublika yoki xalqaro grant tanlovlarida ishtirok etishga koʻmaklashadi.

Faoliyati tiklanilishiga koʻmaklashilgan NNTlar kamida bir yil davomida moliyaviy barqarorligini taʼminlab boradi hamda oʻz faoliyatiga respublika yoki xalqaro grantlarni jalb qilish boʻyicha choralar koʻradi.

(33¹ va 33²-bandlar Oʻzbekiston Respublikasi Vazirlar Mahkamasining 2024-yil 18-dekabrdagi 847-sonli qaroriga asosan kiritilgan — Qonunchilik maʼlumotlari milliy bazasi, 24.12.2024-y., 09/24/847/1056-son)

34. NNTni majburiy tugatish toʻgʻrisidagi qaror qonunchilikda nazarda tutilgan asoslarda sud tomonidan qabul qilinadi.

(34-bandning birinchi xatboshisi Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)

NNTni majburiy tugatish toʻgʻrisidagi qarorda tugatish komissiyasi tarkibi hamda NNTning mavjud alohida boʻlinmalari roʻyxati koʻrsatiladi;

(34-band Oʻzbekiston Respublikasi Vazirlar Mahkamasining 2024-yil 18-dekabrdagi 847-sonli qaroriga asosan ikkinchi xatboshi bilan toʻldirilgan — Qonunchilik maʼlumotlari milliy bazasi, 24.12.2024-y., 09/24/847/1056-son)

Oʻzbekiston Respublikasi Fuqarolik kodeksining 54-moddasiga muvofiq, tugatish komissiyasi roʻyxatdan oʻtkazuvchi organ bilan kelishilgan holda sud tomonidan tayinlanadi.

35. Tugatish komissiyasi sudning qarorini olgandan keyin uch ish kuni mobaynida uning nusxasini roʻyxatdan oʻtkazuvchi organga tizim orqali taqdim etadi.

Roʻyxatdan oʻtkazuvchi organ NNTni tugatish toʻgʻrisidagi sud qarori nusxasini olgandan soʻng ikki ish kuni mobaynida yuridik shaxslarning yagona davlat reyestriga NNTning tugatish jarayonida ekanligi toʻgʻrisidagi maʼlumotlarni kiritadi hamda bu toʻgʻrida NNT davlat roʻyxatidan oʻtkazilgan joydagi davlat soliq xizmati va statistika organlarini, shuningdek Byuroning tuman (shahar) boʻlimini tizim orqali xabardor qiladi.

(35-band Oʻzbekiston Respublikasi Vazirlar Mahkamasining 2024-yil 18-dekabrdagi 847-sonli qarori tahririda — Qonunchilik maʼlumotlari milliy bazasi, 24.12.2024-y., 09/24/847/1056-son)

36. Sudning qarori qonuniy kuchga kirgan vaqtdan boshlab NNTni boshqarish boʻyicha barcha vakolatlar tugatish komissiyasiga oʻtadi. NNTning muassislari (qatnashchilari) va (yoki) rahbar organi aʼzolari uch ish kuni mobaynida NNT faoliyati bilan bogʻliq barcha hujjatlarni, shuningdek NNTning muhr va shtamplarini hamda boshqa mol-mulkini roʻyxat boʻyicha tugatish komissiyasiga topshirishlari shart.

37. Tugatish ishlari mazkur Nizomning 8 — 22-bandlarida nazarda tutilgan tartibda va muddatlarda amalga oshiriladi.

Bunda oraliq tugatish balansi tugatish komissiyasi tomonidan NNTni roʻyxatga olgan organ bilan kelishilgandan soʻng tasdiqlanadi. Oraliq tugatish balansi loyihasini qabul qilib olgan roʻyxatdan oʻtkazuvchi organ tomonidan bir hafta muddat mobaynida yozma eʼtiroz berilmagan taqdirda oraliq tugatish balansi kelishilgan hisoblanadi.

38. Kreditorlarning talablari toʻliq qondirilgandan keyin NNTning mol-mulki ortib qolgan hollarda, tugatish komissiyasi ulardan NNTni tugatish toʻgʻrisidagi sudning qarorida koʻrsatilgan yoʻnalishlar uchun foydalaniladi. Bunda mol-mulkning tasarruf etilganligi faktini tasdiqlovchi hujjatlar rasmiylashtiriladi.

Agar NNTni tugatish toʻgʻrisidagi sudning qarorida mol-mulk taqdiri hal etilmagan boʻlsa, tugatish komissiyasi kreditorlarning talablari toʻliq qondirilgandan keyin besh ish kuni mobaynida ortib qolgan mol-mulkning taqdirini hal qilish yuzasidan sudga ariza bilan murojaat qiladi.

39. Tugatish komissiyasi:

kreditorlar bilan hisob-kitoblar tugallangandan, shuningdek NNT qarzdor sifatida ishtirok etgan ijro hujjatlari amalda ijro etilgandan;

soliqlar va boshqa majburiy toʻlovlar, moliyaviy sanksiyalar summasi, shu jumladan tekshirishlar yakunlari boʻyicha toʻlangandan;

kreditorlarning talablari toʻliq qondirilgandan keyin qolgan mol-mulkdan sudning qarorida koʻrsatilgan yoʻnalishlar uchun foydalanilgandan keyin tugatish balansi loyihasini tuzadi.

Tugatish balansi NNTni roʻyxatga olgan organ bilan kelishilgandan soʻng tugatish komissiyasi tomonidan tasdiqlanadi. Tugatish balansi loyihasini olgan roʻyxatga oluvchi organ tomonidan bir hafta muddat mobaynida yozma eʼtiroz berilmagan taqdirda tugatish balansi kelishilgan hisoblanadi.

40. Tugatish balansi tasdiqlangandan soʻng davlat soliq xizmati organiga topshiriladi. Ayni paytda, tugatish komissiyasi tugatilayotgan NNT qarzdor sifatida ishtirok etgan va ijro etilmagan ijro hujjatlarining mavjudligi yuzasidan Byuro hududiy boshqarmasiga soʻrovnoma yuboradi.

Tugatish balansi qabul qilingandan keyin davlat soliq xizmati organi, NNTning soliqlar va boshqa majburiy toʻlovlar boʻyicha qarzi boʻlmagan taqdirda, bir ish kuni mobaynida tugatish komissiyasiga soliqlar va boshqa majburiy toʻlovlar boʻyicha qarz yoʻqligi toʻgʻrisida xulosa berishi shart. Byuroning hududiy boshqarmasi, NNT qarzdor sifatida ishtirok etgan va ijro etilmagan ijro hujjati uning ish yurituvida mavjud boʻlmagan taqdirda, bu haqda tugatish komissiyasiga uch ish kuni mobaynida yozma javob berishi shart.

(40-band Oʻzbekiston Respublikasi Vazirlar Mahkamasining 2017-yil 16-avgustdagi 639-sonli qarori tahririda — OʻR QHT, 2017-y., 33-son, 864-modda)

41. NNTni tugatishning keyingi jarayonlari hamda NNT tugatilganligi toʻgʻrisida yuridik shaxslarning yagona davlat reyestriga tegishli yozuv kiritish mazkur Nizomning 27 — 32-bandlarida belgilangan tartibda va muddatlarda amalga oshiriladi.

IV. Yakunlovchi qoidalar

42. NNTning tugatilganligi haqida yuridik shaxslarning yagona davlat reyestriga yozuv kiritilishidan oldin ixtiyoriy tugatishning boshqa har qanday bosqichida NNTning vakolatli yuqori organi tomonidan faoliyatni tiklash va tugatish jarayonini toʻxtatish toʻgʻrisida qaror qabul qilinishi mumkin.

43. NNTni ixtiyoriy tugatishning umumiy muddati roʻyxatdan oʻtkazuvchi organ ixtiyoriy tugatish toʻgʻrisida qabul qilingan qaror haqida xabardor qilingan kundan boshlab yetti oydan oshmasligi kerak.

Agar koʻrsatilgan muddat mobaynida roʻyxatdan oʻtkazuvchi organga mazkur Nizomning 30-bandida koʻrsatilgan hujjatlar taqdim etilmasa yoki NNTning vakolatli yuqori organi tomonidan faoliyatni tiklash va tugatish jarayonini toʻxtatish toʻgʻrisida qabul qilingan qaror haqida xabardor qilinmasa roʻyxatdan oʻtkazuvchi organ tugatish komissiyasiga taqdimnoma kiritadi.

Agar taqdimnomada koʻrsatilgan kamchiliklar bartaraf etilmasa, roʻyxatdan oʻtkazuvchi organ aybdor shaxslarga nisbatan belgilangan tartibda taʼsir choralarini qoʻllaydi va NNTni majburiy tugatish choralarini koʻrib chiqadi.

44. NNT muassislari (qatnashchilari), rahbar organi aʼzolari yoki boshqa xodimlari hamda tugatish komissiyasi aʼzolari oʻzlari tayyorlagan hujjatlarning toʻgʻriligi va qonunchilikka muvofiqligi uchun javob beradilar.

45. Mazkur Nizom talablarining buzilishida aybdor boʻlgan shaxslar, shu jumladan oʻzlariga yuklangan vazifalarni bajarmaganlik yoki zarur darajada bajarmaganlik natijasida kreditorlarga, muassislarga (qatnashchilarga), rahbar organ aʼzolariga yoki uchinchi shaxslarga yetkazilgan zarar uchun qonunchilikka muvofiq javob beradilar.

(45-band Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)

Nodavlat notijorat tashkilotlarini tugatish tartibi toʻgʻrisidagi nizomga
1-ILOVA

Nodavlat notijorat tashkilotlarini ixtiyoriy tugatish

SXEMASI

Bosqichlar	Subyektlar	Tadbirlar	Bajarish muddati
1-bosqich	NNTning vakolatli yuqori organi	1. Tugatish komissiyasini tayinlaydi (tugatish komissiyasi NNT muassislari (qatnashchilari) tomonidan tayinlanishi bundan mustasno) 2. Alohida boʻlinmalarga oʻz faoliyatini toʻxtatish va tugatish ishlarini boshlash haqida koʻrsatma beradi, agar taʼsis hujjatlarida alohida boʻlinmalarni tugatish ishlari ularning rahbar organlari zimmasida yuklatilgan boʻlsa) 3. Tugatishning rejalashtirilayotgan muddatini belgilaydi. 4. Kreditorlarning talablari qondirilgandan keyin qoladigan mol-mulkning taqdirini belgilaydi.	1 — 4. Ixtiyoriy tugatish haqida qaror qabul qilingandan boshlab
1-bosqich	NNTning vakolatli yuqori organi	5. Tugatish komissiyasi tarkibi haqidagi maʼlumotni hamda tugatish haqida NNT yuqori organi qarorini roʻyxatdan oʻtkazuvchi organga tizim orqali taqdim etadi.	5. Qaror qabul qilingandan keyin 3 ish kuni mobaynida Xalqaro hamda chel el NNTning markaziy organi qabul qilgan qarori legallashtirilgan yoki apostil qoʻyilgandan soʻng 15 kun mobaynida
2-bosqich	Roʻyxatdan oʻtkazuvchi organ	1. Tugatish komissiyasi tarkibiga eʼtirozi boʻlmasa, davlat reyestriga NNTning tugatish jarayonida ekanligi toʻgʻrisidagi maʼlumotlarni kiritadi hamda bu haqda soliq xizmati va statistika organlarini, Byuroning tuman (shahar) boʻlimini tizim orqali xabardor qiladi. 2. Agar tugatish komissiyasiga eʼtirozi mavjud boʻlsa, bu haqda NNTning yuqori organiga tizim orqali xabardor qiladi.	Hujjatlar kelib tushgan kundan soʻng 2 ish kuni mobaynida
3-bosqich	NNT muassis (qatnashchi)lari va rahbar organi aʼzolari	1. NNT faoliyati bilan bogʻliq barcha hujjatlarni, shuningdek NNTning muhr va shtamplari hamda boshqa mol-mulkini roʻyxat boʻyicha tugatish komissiyasiga topshiradi.	1. Tugatish komissiyasining tarkibi roʻyxatdan oʻtkazuvchi organ bilan kelishilgan kundan boshlab 3 ish kuni mobaynida
	NNT muassis (qatnashchi)lari va rahbar organi aʼzolari	2. Tugatish jarayoni ishlarini amalga oshirishga kirishadi.	2. Tugatish komissiyasi tarkibi kelishilgan kundan boshlab.
	Tugatish komissiyasi	3. Xizmat koʻrsatuvchi banklarga tugatish haqidagi qaror loyihasini hamda tegishli ariza-topshiriqnomalarni joʻnatadi.	3. Tugatish komissiyasi tarkibi kelishilgandan soʻng 3 kun muddat mobaynida
4-bosqich	Xizmat koʻrsatuvchi banklar	1. 2-son kartoteka amal qilishini toʻxtatadilar. 2. NNTning milliy va xorijiy valyutadagi ikkilamchi, jamgʻarma va muddatli depozit hisobvaraqlarini, yuridik shaxs hisoblanmagan alohida boʻlinmalarning hisobvaraqlarini yopadilar va ulardagi qoldiqlarni asosiy hisobvaraqqa oʻtkazadilar.	1-2. Xizmat koʻrsatuvchi banklar xabardor qilingan sanadan boshlab 1 ish kuni mobaynida
	Byuroning tuman (shahar) boʻlimi	3. Ish yurituvida tugatilayotgan NNT qarzdor sifatida ishtirok etgan ijro hujjati mavjudligini aniqlashtiradi. Tegishli ijro hujjati mavjud boʻlsa, uning boʻyicha ijro ishi yuritishni qonunda belgilangan tartibda tamomlaydi va tugatish tartiboti doirasida ijro etish uchun tugatish komissiyasiga yuboradi.	3. Roʻyxatdan oʻtkazuvchi organning bildirishnomasi olingan kundan keyin 10 kun mobaynida
	Soliq xizmati organi	4. NNT faoliyatini tekshirishga (taftish qilishga) kirishadi.	4. Roʻyxatdan oʻtkazuvchi organning bildirishnomasi olingan kundan boshlab 3 ish kuni mobaynida (taftish muddati 30 kalendar kundan oshmaydi)
5-bosqich	Tugatish komissiyasi	Soliq xizmati organi oʻtkazgan tekshirish natijalari hamda tuzilgan ijro hujjatlari reyestrini hisobga olgan holda oraliq tugatish balansi loyihasini tuzadi, uni tasdiqlash uchun NNT yuqori organiga taqdim etadi.	Kreditorlar tomonidan talablar taqdim etilishi uchun belgilangan muddat tugagach
6-bosqich	Tugatish komissiyasi	1. Kreditorlarning talabi eʼtirof etilgani yoki rad qilingani haqida ularni xabardor qiladi.	1. Oraliq tugatish balansi tasdiqlangandan keyin 5 ish kuni mobaynida
		2. Navbat boʻyicha kreditorlarga pul summalarini toʻlaydi. 3. Hisob-kitob qilish uchun mablagʻ yetarli boʻlmasa NNT mol-mulkini sotishni tashkil etadi.	2-3. Oraliq tugatish balansi tasdiqlangan kundan boshlab
		4. Ortib qolgan mol-mulkni belgilangan tartibda tasarruf etadi.	4. Kreditorlar talabi toʻliq qondirilgandan soʻng
		5. Tugatish balansi loyihasini tuzadi, uni tasdiqlash uchun NNT yuqori organiga kiritadi.	5. Nodavlat notijorat tashkilotlarini tugatish tartibi toʻgʻrisidagi nizomning 25-bandida koʻrsatilgan jarayonlar yakunlangandan soʻng
		6. Tugatish balansini soliq xizmati organiga topshiradi. 7. NNT qarzdor sifatida ishtirok etgan va ijro etilmagan hujjatning mavjudligi yuzasidan Byuro tuman (shahar) boʻlimi hududiy boshqarmasiga soʻrovnoma yuboradi.	6-7. Tugatish balansi tasdiqlangandan soʻng
7-bosqich	Soliq xizmati organi	1. NNTning soliqlar va boshqa majburiy toʻlovlar boʻyicha qarzi yoʻqligi haqida tugatish komissiyasiga xulosa beradi.	1. Tugatish balansini qabul qilib olgandan keyin 1 ish kuni mobaynida
7-bosqich	Byuro tuman (shahar) boʻlimi	2. NNTning qarzdor sifatida ishtirok etgan va ijro etilmagan hujjat ish yurituvida mavjud emasligi haqida tugatish komissiyasiga yozma javob beradi.	2. Soʻrovnomani olgandan keyin 3 ish kuni mobaynida
8-bosqich	Tugatish komissiyasi	NNTning asosiy hisobvaragʻi ochilgan bankka hisobvaraqni yopish toʻgʻrisidagi ariza-topshiriqnoma bilan murojaat qiladi.	Soliq xizmati organi xulosasi va Byuro tuman (shahar) boʻlimining yozma javobi olingan kunda
9-bosqich	Asosiy hisobvaraq ochilgan bank	NNTga tegishli boʻlgan hisobvaraqni yopadi va tugatish komissiyasiga asosiy hisobvaraq yopilgani toʻgʻrisida xulosa beradi.	Ariza-topshiriqnoma qabul qilingan kundan boshlab 1 ish kuni mobaynida
10-bosqich	Tugatish komissiyasi	NNTning yuridik shaxs hisoblanmagan alohida boʻlinmalari yopilganligi haqida tegishli adliya organlariga xatlar yuboradi (agar mavjud boʻlsa).	Asosiy hisobvaraq yopilgandan keyin 3 ish kuni mobaynida
11-bosqich	Alohida boʻlinmani hisobga olgan adliya organi	1. Yuridik shaxs hisoblanmagan alohida boʻlinma yopilganligi munosabati bilan tegishli reyestrga yozuv kiritadi.	1. Xatni olgandan soʻng 3 ish kuni mobaynida
11-bosqich	Alohida boʻlinmani hisobga olgan adliya organi	2. Tugatish komissiyasini yozma ravishda xabardor qiladi.	2. Reyestrga yozuv kiritilgandan soʻng 2 ish kuni mobaynida
12-bosqich	Tugatish komissiyasi	1. Buxgalteriya va boshqa hujjatlarni davlat arxiviga yuboradi. 2. Nodavlat notijorat tashkilotini tugatish tartibi toʻgʻrisidagi nizomning 30-bandida koʻrsatilgan hujjatlarni tizim orqali roʻyxatdan oʻtkazuvchi organga topshiradi.	Asosiy hisobvaraq yopilgandan yoki yuridik shaxs hisoblanmagan alohida boʻlinma yopilganligi hamda yuridik shaxs hisoblangan boʻlinma tugatilganligi haqida tegishli adliya organi xabarnomalari olingandan keyin 3 ish kuni mobaynida
13-bosqich	Roʻyxatdan oʻtkazuvchi organ	1. Davlat reyestriga tizim orqali NNT tugatilganligi toʻgʻrisida yozuv kiritadi.	1. Barcha hujjatlar olingandan keyin 5 ish kuni mobaynida
13-bosqich	Roʻyxatdan oʻtkazuvchi organ	2. Tugatish komissiyasi, soliq xizmati va statistika organlarini tizim orqali xabardor qiladi. 3. NNTning litsenziya va ruxsatnomalarini (agar mavjud boʻlsa) ularni bergan organlarga topshiradi.	2-3. Davlat reyestriga tegishli yozuv kiritilgandan keyin 2 ish kuni mobaynida

(1-ilova Oʻzbekiston Respublikasi Vazirlar Mahkamasining 2024-yil 18-dekabrdagi 847-sonli qarori tahririda — Qonunchilik maʼlumotlari milliy bazasi, 24.12.2024-y., 09/24/847/1056-son)

Nodavlat notijorat tashkilotlarini tugatish tartibi toʻgʻrisidagi nizomga
2-ILOVA

Nodavlat notijorat tashkilotlarini majburiy tugatish

SXEMASI

Bosqichlar	Subyektlar	Tadbirlar	Bajarish muddati
1-bosqich	Sud	Fuqarolik kodeksining 54-moddasiga muvofiq, roʻyxatdan oʻtkazuvchi organ bilan kelishilgan holda tugatish komissiyasini tayinlaydi.	NNTni tugatish toʻgʻrisida qaror qabul qilinganda
2-bosqich	Tugatish komissiyasi	NNTning tugatish toʻgʻrisidagi sud qarorining nusxasini roʻyxatdan oʻtkazuvchi organga tizim orqali taqdim etadi.	Sudning qarorini olgan kundan boshlab 3 ish kuni mobaynida
3-bosqich	Roʻyxatdan oʻtkazuvchi organ	Yuridik shaxslarning yagona davlat reyestriga NNTning tugatish jarayonida ekanligi toʻgʻrisidagi maʼlumotlarni kiritadi hamda bu haqda NNT davlat roʻyxatidan oʻtkazilgan joydagi soliq organi va statistika organlarini, shuningdek Byuroning tuman (shahar) boʻlimini tizim orqali xabardor qiladi.	NNTni tugatish toʻgʻrisida sud qarori nusxasini olgandan soʻng 2 ish kuni mobaynida
4-bosqich	NNT muassis (qatnashchi)lari va rahbar organi aʼzolari	1. NNT faoliyati bilan bogʻliq barcha hujjatlarni, shuningdek, NNTning muhr va shtamplarini hamda boshqa mol-mulkini roʻyxat boʻyicha tugatish komissiyasiga topshiradi.	1. Sudning qarori qonuniy kuchga kirgan vaqtdan boshlab 3 ish kuni mobaynida
	NNT muassis (qatnashchi)lari va rahbar organi aʼzolari	2. Tugatish jarayoni ishlarini amalga oshirishga kirishadi.	2. Sudning qarori qonuniy kuchga kirgan vaqtdan eʼtiboran
	Tugatish komissiyasi	3. Xizmat koʻrsatuvchi banklarga tugatish haqidagi qaror nusxasi hamda tegishli ariza-topshiriqnomalarni joʻnatadi.	3. Sudning qarori qonuniy kuchga kirgandan soʻng 3 kun muddat mobaynida
5-bosqich	Xizmat koʻrsatuvchi banklar	1. 2-son kartoteka amal qilishini toʻxtatadilar. 2. NNTning milliy va xorijiy valyutadagi ikkilamchi, jamgʻarma va muddatli depozit hisobvaraqlarini, yuridik shaxs hisoblanmagan alohida boʻlinmalarning hisobvaraqlarini yopadilar va ulardagi qoldiqlarni asosiy hisobvaraqqa oʻtkazadilar.	1-2. Xizmat koʻrsatuvchi banklar xabardor qilingan sanadan boshlab 1 ish kuni mobaynida.
	Byuroning tuman (shahar) boʻlimlari	3. Ish yurituvida tugatilayotgan NNT qarzdor sifatida ishtirok etgan ijro hujjati mavjudligini aniqlashtiradi. Tegishli ijro hujjati mavjud boʻlsa, uning boʻyicha ijro ishi yuritishni qonunda belgilangan tartibda tamomlaydi va tugatish tartiboti doirasida ijro etish uchun tugatish komissiyasiga yuboradi.	3. Roʻyxatdan oʻtkazuvchi organning bildirishnomasi olingan kundan keyin 10 kundan kechiktirmay.
	Soliq xizmati organi	4. NNT faoliyatini tekshirishga (taftish qilishga) kirishadi.	4. Roʻyxatdan oʻtkazuvchi organning bildirishnomasi olingan kundan boshlab 3 ish kuni mobaynida (taftish muddati 30 kalendar kundan oshmaydi)
6-bosqich	Tugatish komissiyasi	1. Soliq xizmati organi oʻtkazgan tekshirish natijalari hamda tuzilgan ijro hujjatlari reyestrini hisobga olgan holda oraliq tugatish balansi loyihasini tuzadi, uni kelishish uchun roʻyxatdan oʻtkazuvchi organga yuboradi.	1. Kreditorlar tomonidan talablar taqdim etilishi uchun belgilangan muddat tugagach
6-bosqich	Tugatish komissiyasi	2. Oraliq tugatish balansi loyihasi yuzasidan bir hafta muddat mobaynida eʼtiroz bildirilmagan taqdirda uni tasdiqlaydi.	2. Roʻyxatdan oʻtkazuvchi organ loyihani qabul qilib olgan kundan eʼtiboran 1 haftadan soʻng
7-bosqich	Tugatish komissiyasi	1. Kreditorlarning talabi eʼtirof etilgan yoki rad qilingan haqida ularni xabardor qiladi.	1. Oraliq tugatish balansi tasdiqlangan keyin 5 ish kuni mobaynida
		2. Nodavlat notijorat tashkilotlarini tugatish tartibi toʻgʻrisidagi nizomning 19-bandida koʻrsatilgan navbat boʻyicha kreditorlarga pul summalarini toʻlaydi. 3. Hisob-kitob qilish uchun mablagʻ yetarli boʻlmasa NNT mol-mulkini sotishni tashkil etadi.	2-3. Oraliq tugatish balansi tasdiqlangan kundan boshlab
		4. Ortib qolgan mol-mulkni sud qarorida koʻrsatilgan yoʻnalishlarga sarflaydi. 5. Agar sud qarorida mol-mulk taqdiri hal etilmagan boʻlsa, uning taqdirini hal qilish yuzasidan sudga ariza bilan murojaat qiladi.	4-5. Kreditorlar talabi toʻliq qondirilgandan soʻng
		6. Tugatish balansi loyihasini tuzadi va uning kelishish uchun roʻyxatdan oʻtkazuvchi organga joʻnatadi.	6. Kreditorlar talabi toʻliq qondirilgandan soʻng 5 ish kuni mobaynida Nodavlat notijorat tashkilotlarini tugatish tartibi toʻgʻrisidagi nizomning 25-bandida koʻrsatilgan jarayonlar yakunlangandan soʻng
		7. Tugatish balansi loyihasi yuzasidan bir hafta muddatda eʼtiroz bildirilmagan taqdirda tasdiqlaydi.	7. Roʻyxatdan oʻtkazuvchi organ loyihani qabul qilib olgan kundan boshlab 1 haftadan soʻng
		8. Tugatish balansini soliq xizmati organiga topshiradi. 9. NNT qarzdor sifatida ishtirok etgan va ijro etilmagan hujjatning mavjudligi yuzasidan Byuroning hududiy boʻlimiga soʻrovnoma yuboradi.	8-9. Tugatish balansi tasdiqlangandan soʻng
8-bosqich	Soliq xizmati organi,	1. NNTning soliqlar va boshqa majburiy toʻlovlar boʻyicha qarzi yoʻqligi haqida tugatish komissiyasiga xulosa beradi.	1. Tugatish balansi qabul qilib olgandan keyin 1 ish kuni mobaynida
8-bosqich	Byuroning hududiy boshqarmasi	2. NNT qarzdor sifatida ishtirok etgan va ijro etilmagan hujjat ish yurituvida mavjud emasligi haqida tugatish komissiyasiga yozma javob beradi.	2. Soʻrovnoma olgandan soʻng 3 ish kuni mobaynida
9-bosqich	Tugatish komissiyasi	NNTning asosiy hisobvaragʻi ochilgan bankka hisobvaraqni yopish toʻgʻrisidagi ariza-topshiriqnoma bilan murojaat qiladi.	Soliq xizmati organining xulosasi hamda Byuroning hududiy boshqarmasining yozma javobi olingan kunda
10-bosqich	Asosiy hisobvaraq ochilgan bank	NNTga tegishli boʻlgan hisobvaraqni yopadi va tugatish komissiyasiga asosiy hisobvaraq yopilgani toʻgʻrisida xulosa beradi.	Ariza-topshiriqnoma qabul qilingan kundan boshlab 1 ish kuni mobaynida
11-bosqich	Tugatish komissiyasi	NNTning yuridik shaxs hisoblanmagan alohida boʻlinmalari yopilganligi haqida tegishli adliya organlariga xatlar yuboradi (agar mavjud boʻlsa)	Asosiy hisobvaraq yopilgandan keyin 3 ish kuni mobaynida
12-bosqich	Alohida boʻlinmani hisobga olgan adliya organi	1. Yuridik shaxs hisoblanmagan alohida boʻlinma yopilganligi munosabati bilan tegishli reyestrga yozuv kiritadi.	1. Xatni olgandan soʻng 3 ish kuni mobaynida
12-bosqich	Alohida boʻlinmani hisobga olgan adliya organi	2. Tugatish komissiyasini yozma ravishda xabardor qiladi.	2. Reyestrga yozuv kiritilgandan soʻng 2 ish kuni mobaynida
13-bosqich	Tugatish komissiyasi	1. Buxgalteriya va boshqa hujjatlarni davlat arxiviga topshiradi. 2. Nodavlat notijorat tashkilotlarini tugatish tartibi toʻgʻrisidagi nizomning 30-bandida koʻrsatilgan hujjatlarni tizim orqali roʻyxatdan oʻtkazuvchi organga topshiradi.	Asosiy hisobvaraq yopilgandan yoki yuridik shaxs hisoblanmagan alohida boʻlinma yopilganligi hamda yuridik shaxs hisoblangan boʻlinma tugatilganligi haqida tegishli adliya organi xabarnomalari olingandan keyin 3 ish kuni mobaynida
14-bosqich	Roʻyxatdan oʻtkazuvchi organ	1. Davlat reyestriga tizim orqali NNT tugatilganligi toʻgʻrisida yozuv kiritadi.	1. Barcha hujjatlar olingan keyin 5 ish kuni mobaynida
14-bosqich	Roʻyxatdan oʻtkazuvchi organ	2. Tugatish komissiyasi, soliq xizmati va statistika organlarini tizim orqali xabardor qiladi. 3. NNTning litsenziya va ruxsatnomalarni (agar mavjud boʻlsa) ularni bergan organlarga topshiradi.	2-3. Davlat reyestriga tegishli yozuv kiritilgandan keyin 2 ish kuni mobaynida

(2-ilova Oʻzbekiston Respublikasi Vazirlar Mahkamasining 2024-yil 18-dekabrdagi 847-sonli qarori tahririda — Qonunchilik maʼlumotlari milliy bazasi, 24.12.2024-y., 09/24/847/1056-son)

Nodavlat notijorat tashkilotlarini tugatish tartibi toʻgʻrisidagi nizomga
2-ILOVA

Uzoq muddat faoliyat yuritmayotgan nodavlat notijorat tashkilotlarining

DAVLAT REYESTRI

T/r	Nomi	Reyestr tartib raqami	Davlat roʻyxatidan oʻtkazilgan sana	Qayta roʻyxatdan oʻtkazish sanasi	NNT yuridik manzili (toʻliq)	STIR	KTUT	Reyestrga yozuv kiritgan shaxsning FIO va sanasi
1	2	3	4	5	6	7	8	9
1.
2.
3.

(3-ilova Oʻzbekiston Respublikasi Vazirlar Mahkamasining 2024-yil 18-dekabrdagi 847-sonli qaroriga asosan kiritilgan — Qonunchilik maʼlumotlari milliy bazasi, 24.12.2024-y., 09/24/847/1056-son)

(Oʻzbekiston Respublikasi qonun hujjatlari toʻplami, 2015-y., 3-son, 29-modda; 2017-y., 33-son, 864-modda, 23.01.2018-y., 09/18/34/0605-son; Qonun hujjatlari maʼlumotlari milliy bazasi, 11.08.2020-y., 09/20/472/1155-son; Qonunchilik maʼlumotlari milliy bazasi, 05.04.2022-y., 09/22/153/0266-son; 22.07.2023-y., 09/23/304/0510-son; 24.12.2024-y., 09/24/847/1056-son)