Oʻzbekiston Respublikasining 1998-yil 25-dekabrdagi “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida” Qonuni, Oʻzbekiston Respublikasining Soliq kodeksiga muvofiq va “Davlat soliq xizmati toʻgʻrisida”gi Oʻzbekiston Respublikasi Qonunining 7-moddasiga asosan Moliya vazirligi va Davlat soliq qoʻmitasi uning import qilingan tovarlar (ishlar, xizmatlarga oid qoʻshilgan qiymat soligʻi summalarini hisobga olish tartibini tushuntiradilar.

Oʻzbekiston Respublikasining 1998-yil 25-dekabrdagi “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Qonuniga binoan Oʻzbekiston Respublikasi Soliq kodeksining 74 va 75-moddalari oʻzgartirilishi munosabati bilan 1999-yilning 17-yanvaridan boshlab budjetga badal sifatida kiritilishi lozim boʻlgan QQS summasi soliqqa tortiladigan oborotlar asosida hisoblangan QQS summasi bilan hisobot davri mobaynida haqiqatda kelib tushgan tovarlar (ishlar, xizmatlar), shu jumladan, nol stavkasi boʻyicha oborot bilan birgalikda soliq solinadigan oborot uchun foydalaniladigan, import qilingan tovarlar, (ishlar, xizmatlar) uchun olingan hisobvaraq-fakturalar boʻyicha toʻlanishi lozim boʻlgan QQS summasi oʻrtasidagi farq koʻrinishida belgilanadi.

Oʻzbekiston Respublikasi Moliya vazirligi va Davlat soliq qoʻmitasining Adliya vazirligida 1997-yil 27-dekabrda 383-son bilan roʻyxatga olingan “Ishlab chiqariladigan va sotiladigan tovarlar (ishlar, xizmatlar) boʻyicha qoʻshilgan qiymat soligʻini hisoblash va toʻlash tartibi toʻgʻrisida”gi yoʻriqnomasiga muvofiq import qilingan tovarlar (ishlar, xizmatlar) boʻyicha hisobga olish uchun quyidagilar asos boʻlib hisoblanadi:

bojxona yuk deklaratsiyasi (bajarilgan ishlar. koʻrsatilgan xizmatlar dalolatnomalari);

qoʻshilgan qiymat soligʻining haqiqatda toʻlanganligini tasdiqlovchi toʻlov hujjatlari.

Bunda 1999-yilda bojxona qonunchiligi va hukumat qarorlariga muvofiq tarkibiga qoʻshilgan qiymat soligʻi ham kiruvchi bojxona toʻlovlarini toʻlash muddatlarining uzaytirilishi va boʻlib-boʻlib toʻlanishi taqdim etilgan hollarda, ushbu import qilingan tovarlarga oid QQS summasi 19-hisobvaraqda (tegishli ilova hisobvaragida) hisobga olinadi va qoʻshilgan qiymat soligʻining haqiqatda toʻlanishiga qarab hisobga olib boriladi.