Iqtisodiyot tarmoqlarida energiya samaradorligini oshirish hamda elektr energiyasidan oqilona foydalanishni keng targʻib etish maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasining 2018-yil 12-yanvardagi 22-son qarori bilan tasdiqlangan Elektr energiyasidan foydalanish qoidalariga kuyidagi mazmundagi 63¹-band qoʻshilsin:

“63¹.Ulangan quvvatidan qatʼiy nazar, kripto-aktiv va mayning sohasida faoliyatni amalga oshiruvchi isteʼmolchilar (turli kriptovalyutalarda yangi birliklar va komissiya yigʻimlari formatida mukofot olish imkonini beradigan taqsimlash platformasini taʼminlash va yangi bloklar yaratish boʻyicha faoliyat) foydalangan elektr energiyasi uchun toʻlovlarni tegishli tarif guruhiga asosan belgilangan tarifga nisbatan 3 barobar oʻsuvchi koeffitsiyentga muvofiq toʻlaydi”.

2. Oʻzbekiston Respublikasi Energetika vazirligi Axborot texnologiyalari va kommunikatsiyalarini rivojlantirish vazirligi bilan birgalikda kripto-aktiv va mayning sohasida faoliyatni amalga oshiruvchi elektr energiyasi isteʼmolchilarini aniqlash va ularga belgilangan tarifga nisbatan 3 barobar oʻsuvchi koeffitsiyentni qoʻllash tartibini ikki oy muddatda ishlab chiqsin va belgilangan tartibda tasdiqlanishini taʼminlasin.

3. Ushbu qaror rasmiy eʼlon qilingan kundan eʼtiboran uch oy oʻtgach kuchga kiradi.

4. Ushbu qarorning bajarilishini nazorat qilish Oʻzbekiston Respublikasi energetika vaziri A.S. Sultanov zimmasiga yuklansin.