Bozor mexanizmlarini tashqi iqtisodiy aloqalar tizimiga joriy etishni jadallalshtirish va tashqi savdoni erkinlashtirish jarayonini yanada rivojlantirish maqsadida:

1. “Oʻzmarkazimpeks”, “Oʻzsanoatmashimpeks”, “Innovatsiya”, “Oʻztashqitrans” xoʻjalik hisobidagi davlat tashqi savdo birlashmalari, “Markazsanoateksport” xoʻjalik hisobidagi respublika tashqi savdo firmasi va Oʻzbekiston Respublikasi Tashqi iqtisodiy aloqalar vazirligiga qarashli “Oʻrta Osiyo Trans” xoʻjalik hisobidagi respublika tashqi iqtisodiy transport-ekspeditorlik kompaniyasi ayni oʻsha nomlar bilan ochiq turdagi hissadorlik jamiyatlari shaklidagi davlat hissadorlik kompaniyalariga aylantirilsin.

Yangi tashkil etilayotgan hissadorlik kompaniyalarining aksiyalari quyidagi tartibda taqsimlanishi koʻzda tutilsin:

oʻz qiymati boʻyicha aksiyalarning 51 foiz — ularni davlat nomidan boshqarish huquqi bilan Oʻzbekiston Respublikasi Tashqi iqtisodiy aloqalar vazirligiga:

oʻz qiymati boʻyicha aksiyalarning 25 foizi — tashqi savdo kompaniyalarining jamoalariga;

bozor qiymati boʻyicha aksiyalarning 24 foiz — fond bozorida ochiq sotilishi lozim.

2. Belgilab qoʻyilsinki, “Oʻzmarkazimpeks”, “Oʻzsanoatmashimpeks”, “Innovatsiya”, “Markazsanoateksport” davlat hissadorlik tashqi savdo kompaniyalari, “Oʻrta Osiyo Trans” xalqaro avtotransport yuk tashish davlat hissadorlik kompaniyasi, “Oʻztashqitrans” davlat hissadorlik transport-ekspeditorlik kompaniyasi Tashqi iqtisodiy aloqalar vazirligiga qarashli ayni shu nom bilan ataluvchi xoʻjalik hisobidagi boʻlinmalarining barcha mulkiy huquq va majburiyatlari boʻyicha huquqiy vorislari hisoblanadi va belgilangan tartibda quyidagilarni amalga oshiradi:

Oʻzbekiston Respublikasida eksport mahsulotini ishlab chiqaruvchilar bilan tuziladigan shartnomalar asosida eksport, shu jumladan markazlashtirilgan tarzda eksport qilish;

Oʻzbekiston Respublikasidagi buyurtmachilarning topshiriqlari boʻyicha davlat ehtiyojlari uchun tovarlar xarid qilish;

tashqi savdo operatsiyalarini bajarishga oid xizmatlarni koʻrsatish, eksport-import yuklarini joʻnatish va transport xizmati koʻrsatish.

3. Shu narsa belgilab qoʻyilsinki, yuqorida koʻrsatib oʻtilgan davlat hissadorlik kompaniyalari ustavlariga muvofiq oʻzini oʻzi pul bilan toʻla taʼminlash va oʻzini oʻzi boshqarish prinsiplari asosida ish yuritadilar.

4. Oʻzbekiston Respublikasining Adliya vazirligi “Oʻzmarkazimpeks”, “Oʻzsanoatmashimpeks”, “Innovatsiya”, “Markazsanoateksport” davlat hissadorlik tashqi savdo kompaniyalarining, “Oʻrta Osiyo Trans” xalqaro avtotransport yuk tashish davlat hissadorlik kompaniyasi hamda “Oʻztashqitrans” davlat hissadorlik transport-ekspeditorlik kompaniyasining ustavlarini belgilangan tartibda roʻyxatdan oʻtkazsin.

5. Oʻzbekiston Respublikasining Vazirlar Mahkamasi ikki hafta muddat ichida mazkur Farmonni bajarish yuzasidan tegishli qaror qabul qilsin.