Oʻzbekiston Respublikasi Prezidentining “Oʻzbekiston Respublikasidagi diplomatiya vakolatxonalari va xalqaro tashkilotlarning ish sharoitlarini yaxshilashga oid qoʻshimcha chora-tadbirlar toʻgʻrisida” 1995-yil 14-noyabrdagi PF-1287-son Farmoniga muvofiq Vazirlar Mahkamasi qaror qiladi:

1. Oʻzbekiston Respublikasi Tashqi ishlar vazirligi va Davlat mulki qoʻmitasining Toshkent shahar, Sharof Rashidov koʻchasi, 15-uyda joylashgan, maydoni 10543 kv. m boʻlgan binolar majmuini yer maydonlari bilan birga Germaniya Federativ Respublikasi Hukumatiga uning oʻz mulki qilib sotish toʻgʻrisidagi taklifi qabul qilinsin.

2. Oʻzbekiston Respublikasi Davlat mulki qoʻmitasi Tashqi ishlar vazirligi bilan birgalikda Germaniya Federativ Respublikasi Elchixonasi bilan yer maydonlari bilan birga binolar majmuining Germaniya ekspertlari tomonidan hisoblab chiqilgan tegishli narxda, 4,3 mln. Germaniya markasi miqdoridagi bahoda, oldi-sotdi shartnomasini imzolasin.

3. Oʻzbekiston Respublikasi Davlat mulki qoʻmitasi koʻchmas mulkni Germaniya Federativ Respublikasi Hukumatiga sotishdan tushgan mablagʻlarni Oʻzbekiston Respublikasi Tashqi iqtisodiy faoliyat milliy bankidagi Oʻzbekiston Respublikasi Moliya vazirligining “Oʻzbekiston Respublikasi Vazirlar Mahkamasi kafolati ostidagi depozit” 20202840600571423001-son schyotiga oʻtkazsin.

4. Oʻzbekiston Respublikasi Tashqi iqtisodiy faoliyat milliy banki koʻrsatilgan mablagʻlarni xorijiy banklardagi depozit schyotlarga, foizlarni keyinchalik Oʻzbekiston Respublikasi Moliya vazirligining “Oʻzbekiston Respublikasi Vazirlar Mahkamasi kafolati ostidagi depozit” 20202840600571423001-son schyotiga oʻtkazish sharti bilan joylashtirsin.

Oʻzbekiston Respublikasi Moliya vazirligi, depozit operatsiyalaridan olingan foizlarni hisobga olgan holda, tushgan mablagʻlardan Germaniya Federativ Respublikasining Berlin shahridagi Oʻzbekiston Respublikasi diplomatik vakolatxonasiga koʻchmas mulk sotib olish uchun foydalansin.

5. Ushbu qarorning bajarilishini nazorat qilish Bosh vazir oʻrinbosari V.A.Chjen zimmasiga yuklansin.