Юксак спорт маҳоратини янада оширганликни рағбатлантириш, Ўзбекистоннинг энг юқори натижаларга эришган спортчиларини тақдирлаш мақсадида, шунингдек ёш авлодни халқаро спорт майдонларида мамлакатни машҳур қилган ҳамда Ўзбекистон спортининг шонли анъаналарини янада бойитган энг яхши спортчилар мисолида ватанпарварлик ва Ватанга чексиз садоқат руҳида тарбиялашга алоҳида аҳамият бериб Вазирлар Маҳкамаси қарор қилади:
1. Ўзбекистон Республикаси Давлат жисмоний тарбия ва спорт қўмитаси ҳамда Миллий Олимпия қўмитасининг «Йилнинг энг яхши спортчиси» Ўзбекистон Миллий Кубогини таъсис этиш тўғрисидаги таклифи қабул қилинсин.
2. «Йилнинг энг яхши спортчиси» Ўзбекистон Миллий Кубоги тўғрисидаги Низом ва Республика комиссияси таркиби 1 ва 2-иловаларга мувофиқ тасдиқлансин.
3. «Йилнинг энг яхши спортчиси» Ўзбекистон Миллий Кубоги билан мукофотлаш ҳар йили йил якуни бўйича ўтказилсин.
4. «Маҳаллий саноат» давлат корпорацияси 1997 йил 1 мартгача «Йилнинг энг яхши спортчиси» Ўзбекистон Миллий Кубогини ва унинг нусхаларини тайёрласин.
5. Ўзбекистон Республикаси Молия вазирлиги йилнинг энг яхши спортчисига бериш учун Давлат жисмоний тарбия ва спорт қўмитасига ҳар йили 10 (ўн) минг АҚШ долларига тенг миқдорда пул маблағлари ажратишни назарда тутсин.
Кейинги таҳрирга қаранг.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А. Азизхўжаев зиммасига юклансин.
«Йилнинг энг яхши спортчиси» Ўзбекистон Миллий Кубоги (бундан кейин Кубок деб аталади) энг юксак натижалар, спорт шарафи ва шуҳрати, мардлик, садоқатли ватанпарварлик ҳамда халқаро спорт майдонларида Ўзбекистон спорти анъаналарини бойитишга, республика нуфузини кўтаришга қўшилган улуш рамзи ҳисобланади.
1. Кубок йил мобайнида чемпион унвонига сазовор бўлган, Жаҳон, Олимпия ўйинларида рекорд ўрнатган ва расмий халқаро мусобақаларда энг юксак спорт натижаларига эришган, ўзининг спортдаги жасорати ва ғалабага бўлган мустаҳкам иродаси билан ўсиб келаётган авлодга муносиб намуна кўрсатган спортчига берилади.
Кейинги таҳрирга қаранг.
2. Кубок билан мукофотлашга номзодлар спорт жамиятлари ва идоралари тренерлари, спорт турлари бўйича республика федерациялари, Спорт журналистлари уюшмаси томонидан кўрсатилади.
Кейинги таҳрирга қаранг.
Республика комиссияси тавсия этилган номзодларни ўрганади, улардан энг муносибларини танлайди ва «Йилнинг энг яхши спортчиси» Ўзбекистон Миллий Кубогини бериш тўғрисида қарор қабул қилади.
«Йилнинг энг яхши спортчиси» Ўзбекистон Миллий Кубогини бериш билан боғлиқ барча зарур ташкилий тадбирларни таъминлаш Давлат жисмоний тарбия ва спорт қўмитаси томонидан амалга оширилади.
Кейинги таҳрирга қаранг.
3. «Йилнинг энг яхши спортчиси» Ўзбекистон Миллий Кубоги, белгиланган намунадаги гувоҳнома ва пул мукофоти тантанали вазиятда топширилади.