LexUZ шарҳи
Мазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
«Ўзбекистон ярмаркаси» Хитой—Ўзбекистон қўшма корхонасининг ташқи савдо инфратузилмасини янада ривожлантириш ва Ўзбекистон Республикасида ярмарка савдосини фаоллаштириш мақсадида Вазирлар Маҳкамаси қарор қилади:
1. «Ўзбекистон ярмаркаси» қўшма корхонаси (ХХР, Шанхай шаҳри) Тошкент шаҳрида «Ўзбекистон ярмаркаси» масъулияти чекланган жамият шаклидаги хорижий корхонани таъсис этганлиги маълумот учун қабул қилинсин, унинг асосий вазифалари қуйидагилардан иборат:
республика минтақаларида кичик ва ўрта бизнес субъектлари томонидан ишлаб чиқариладиган маҳсулотлар ва ноанъанавий экспорт товарларини ярмарка савдоларида кўргазмага қўйиш ва сотиш учун танлаб олиш бўйича тижорат агентлари тармоғини ташкил этиш;
кичик ва ўрта бизнес, хусусий тадбиркорлик субъектларига Ўзбекистон Республикасида ташкил этиладиган кўргазмалар ва ярмаркаларда моддий-техника ресурслари олиш имкониятларининг таъминланишида кўмаклашиш ва амалий ёрдам кўрсатиш;
ярмарка савдолари иштирокчиларига омборхонада сақлаш, транспортда ташиш ва товарларни декларация қилиш бўйича хизматлар, шунингдек дилерлик хизматларини кўрсатиш.
2. «Ўзбекистон ярмаркаси» масъулияти чекланган жамият томонидан ўтказиладиган ярмарка савдоларига Ўзбекистон Республикаси Вазирлар Маҳкамасининг «Ўзбекистон Республикасида биржа ва ярмарка савдосини янада такомиллаштириш чора-тадбирлари тўғрисида» 1999 йил 6 майдаги 223-сон қарорига 1-илованинг амал қилиши жорий этилсин.