Навоий ва Бухоро вилоятлари аҳолиси ва хўжалик юритувчи субъектларини сифатли ичимлик суви билан таъминлаш даражасини янада ошириш, Термиз шаҳри ва унга туташ ҳудудларнинг санитария шароитларини яхшилаш мақсадида:

1. Маълумот учун қабул қилинсинки:

2009 йил 29 сентябрда Осиё тараққиёт банки (ОТБ) Директорлар кенгаши Ўзбекистон Республикасининг сув таъминоти ва санитариясини яхшилаш бўйича лойиҳаларни амалга ошириш учун умумий суммаси 300 млн АҚШ доллари бўлган кўп траншли молиялаштириш дастурини, шу жумладан «Навоий ва Бухоро вилоятларининг туман марказларини улаш билан ҳудудлараро Дамхўжа сув қувурини модернизация қилиш. Термиз шаҳрининг канализация тизимини реконструкция қилиш» лойиҳасини амалга ошириш, тўлов муддати 32 йил, шу жумладан саккиз йиллик имтиёзли давр билан;

2009 йил 1 декабрда Ўзбекистон Республикаси билан Осиё тараққиёт банки ўртасида кўрсатиб ўтилган лойиҳани амалга ошириш дастурининг биринчи қисми бўйича Қарз битими имзоланди;

ушбу лойиҳани амалга оширишда Ўзбекистон Республикасининг улуши эквивалентда 15,0 млн АҚШ долларини, шу жумладан солиқ ва божхона имтиёзлари бериш кўринишида 11,82 млн АҚШ долларини ташкил этади;

кўрсатиб ўтилган лойиҳани амалга ошириш даври 5 йил (2010 — 2014 йиллар) этиб белгиланган.

2. Белгилаб қўйилсинки:

Ўзбекистон «Ўзкоммунхизмат» агентлиги ҳамда Навоий, Бухоро ва Сурхондарё вилоятлари ҳокимликлари лойиҳани амалга ошириш, қарз маблағларидан мақсадли ва самарали фойдаланиш учун масъул бўлган ижро этувчи органлар ҳисобланади;

инвестиция даврида (2010 — 2014 йиллар) қарз бўйича фоизларни тўлаш Осиё тараққиёт банкининг қарз маблағлари ҳисобига амалга оширилади;

қарзни қайтариш ва инвестиция давридан кейин фоизларни тўлаш билан боғлиқ харажатлар (2015 йилдан бошлаб) Навоий ва Бухоро вилоятлари сув таъминоти ташкилотлари, Термиз шаҳридаги «Сувоқова» ишлаб чиқариш бирлашмаси ва Ўзбекистон «Ўзкоммунхизмат» агентлигининг ҳудудлараро Дамхўжа сув қувуридан фойдаланиш бошқармаси маблағлари ҳисобига, етишмаётган қисми бўйича эса — давлат бюджети маблағлари ҳисобига амалга оширилади.

3. Қуйидагиларга:

Ўзбекистон Республикаси Молия вазири Ўзбекистон «Ўзкоммунхизмат» агентлиги билан қайта кредитлаш тўғрисидаги битимни Ўзбекистон Республикаси номидан имзоласин;

Ўзбекистон «Ўзкоммунхизмат» агентлиги бош директори Осиё тараққиёт банки билан лойиҳа битимини ҳамда Навоий, Бухоро ва Сурхондарё вилоятлари ҳокимликлари билан субқарз битимларини имзоласин.

4. Ўзбекистон Республикаси Адлия вазирлиги Ўзбекистон Республикаси билан Осиё тараққиёт банки ўртасидаги қарз битими, Ўзбекистон Республикаси билан Ўзбекистон «Ўзкоммунхизмат» агентлиги ўртасидаги қайта кредитлаш тўғрисидаги битим, Ўзбекистон «Ўзкоммунхизмат» агентлиги билан Осиё тараққиёт банки ўртасидаги лойиҳа битими бўйича белгиланган тартибда юридик хулоса берсин.

5. Қуйидагилар:

«Навоий ва Бухоро вилоятларининг туман марказларини улаш орқали ҳудудлараро Дамхўжа сув қувурини модернизация қилиш. Термиз шаҳрининг канализация тизимини асосий техник-иқтисодий кўрсаткичлари билан 1, 1а, 1б, 1в ва 1г-иловаларга* мувофиқ реконструкция қилиш;

«Ҳудудлараро Дамхўжа сув қувурини модернизация қилиш ва унга Навоий ва Бухоро вилоятларининг туман марказларини улаш» лойиҳасини молиялаштириш режа-жадвали. Термиз шаҳрининг канализация тизимини реконструкция қилиш» лойиҳаси 2-иловага* мувофиқ;

«Навоий ва Бухоро вилоятларининг туман марказларини улаш орқали ҳудудлараро Дамхўжа сув қувурини модернизация қилиш» лойиҳаси бўйича Осиё тараққиёт банки қарзини қайтариш ва фоизларни тўлаш жадвали. Термиз шаҳрининг канализация тизимини реконструкция қилиш» лойиҳаси 3-иловага*.

6. Ўзбекистон «Ўзкоммунхизмат» агентлиги, Навоий, Бухоро ва Сурхондарё вилоятлари ҳокимликлари зиммасига:

«Ҳудудлараро Дамхўжа сув қувурини модернизация қилиш ва унга Навоий ва Бухоро вилоятларининг туман марказларини улаш» лойиҳаси бўйича тендер ҳужжатларини ишлаб чиқиш ва тасдиқлаш. Термиз шаҳрининг канализация тизимини реконструкция қилиш,» шунингдек Ўзбекистон Республикаси Молия вазирлиги билан келишган ҳолда Осиё тараққиёт банки қарзига хизмат кўрсатиш ва уни қайтариш учун маблағларни жамлаш тартибини;

Навоий ва Бухоро вилоятлари сув таъминоти ташкилотлари, Термиз шаҳридаги «Сувоқова» ишлаб чиқариш бирлашмаси ва Ўзбекистон «Ўзкоммунхизмат» агентлигининг Ҳудудлараро Дамхўжа сув қувуридан фойдаланиш бошқармаси томонидан Осиё тараққиёт банкининг қарзи бўйича асосий қарзни қайтариш ва фоизларни тўлаш учун зарур маблағларнинг субзаём битимлари шартларига мувофиқ ўз вақтида жамланиши устидан назоратни амалга ошириш.

7. Ўзбекистон «Ўзкоммунхизмат» агентлиги:

Ўзбекистон «Ўзкоммунхизмат» агентлиги ҳузуридаги Осиё тараққиёт банки лойиҳаларини мувофиқлаштириш гуруҳига лойиҳани бошқариш функцияларини юкласин, штат жадвалини ва ҳар йилги молиялаштириш сметаларини Ўзбекистон Республикаси Молия вазирлиги билан албатта келишиб олсин;

кўрсатиб ўтилган лойиҳани амалга ошириш учун жалб этиладиган маблағлардан мақсадли ва самарали фойдаланилиши устидан қатъий назорат ўрнатсин.

8. Ўзбекистон Республикаси Вазирлар Маҳкамаси ҳузуридаги Халқаро молия институтлари, ташкилотлари ва донор мамлакатлар билан ҳамкорлик қилиш, йирик ва стратегик муҳим инвестиция лойиҳаларини амалга ошириш масалалари бўйича идоралараро кенгаш (Р.С. Азимов):

кўрсатиб ўтилган лойиҳани амалга ошириш доирасида товарлар, ишлар ва хизматларни харид қилиш бўйича тендер комиссияси таркибини тасдиқлаш;

лойиҳанинг амалга оширилишини мунтазам равишда кўриб чиқиш, зарурат бўлганда, унинг самарали амалга оширилишини таъминлаш масалалари бўйича таклифларни Ўзбекистон Республикаси Вазирлар Маҳкамасига киритиш.

9. Ўзбекистон Республикаси Иқтисодиёт вазирлиги ва Молия вазирлиги 2011 йилдан бошлаб ҳар йилги инвестиция дастурларини шакллантиришда «Навоий ва Бухоро вилоятларининг туман марказларини туташтирган ҳолда ҳудудлараро Дамхўжа сув қувурини модернизация қилиш лойиҳасини амалга оширишда Ўзбекистон Республикасининг улушини молиялаштиришни назарда тутсинлар. Термиз шаҳрининг канализация тизимини реконструкция қилиш.»

10. Ўзбекистон Республикаси Молия вазирлиги 2015 йилдан бошлаб келгуси йил учун Давлат бюджети лойиҳасини шакллантиришда Навоий, Бухоро ва Сурхондарё вилоятлари маҳаллий бюджетлари, шунингдек республика бюджети параметрларида Навоий ва Бухоро вилоятлари сув таъминоти ташкилотлари, Термиз шаҳридаги «Сувоқова» ишлаб чиқариш бирлашмаси ва Ўзбекистон «Ўзкоммунхизмат» агентлигининг Ҳудудлараро Дамхўжа сув қувуридан фойдаланиш бошқармасининг ўз маблағларига қўшимча равишда Осиё тараққиёт банки қарзи бўйича воситачилик ҳақини тўлаш, асосий қарзни қайтариш учун асосланган ҳисоб-китоблар бўйича маблағларни назарда тутсин.

11. Кўрсатиб ўтилган лойиҳани амалга ошириш доирасида Осиё тараққиёт банкининг қарз маблағлари ҳисобига харид қилинадиган товарлар, ишлар, хизматлар ва транспорт воситалари божхона тўловларидан (божхона расмийлаштируви йиғимларидан ташқари), қўшилган қиймат солиғидан, давлат мақсадли жамғармаларига мажбурий ажратмалар ва йиғимлардан озод қилинсин..

Белгилансинки, кўрсатиб ўтилган имтиёзлар берилиши натижасида бўшайдиган маблағлар суммаси Ўзбекистон Республикасининг лойиҳани амалга оширишга қўшган ҳиссаси ҳисобланади.

Кўрсатиб ўтилган имтиёзларнинг амал қилиши кўрсатиб ўтилган лойиҳани амалга ошириш учун йўналтириладиган Ўзбекистон Республикаси маблағлари ҳисобига харид қилинадиган товарлар, ишлар ва хизматларга татбиқ этилсин.

12. Ўзбекистон Республикаси Ташқи ишлар вазирлиги Ўзбекистон «Ўзкоммунхизмат» агентлигининг буюртманомалари бўйича кўрсатиб ўтилган лойиҳани амалга оширишда қатнашувчи хорижий мутахассисларга кириш визалари консуллик ва бошқа йиғимлар ундирилмасдан белгиланган тартибда расмийлаштирилишини таъминласин.

13. Ўзбекистон Республикаси Ички ишлар вазирлиги Ўзбекистон «Ўзкоммунхизмат» агентлигининг буюртманомалари бўйича кўрсатиб ўтилган лойиҳани амалга оширишда қатнашувчи хорижий мутахассисларга кўп марталик визалар берилишини ва уларнинг муддати узайтирилишини, шунингдек уларнинг Ўзбекистон Республикасида вақтинча рўйхатдан ўтказилишини ва вақтинча рўйхатдан ўтказиш муддати узайтирилишини таъминласин, уларни давлат божлари тўлашдан озод қилсин.

14. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов ва Ўзбекистон Республикаси Бош вазирининг ўринбосари Б.А. Ходжаев зиммасига юклансин..