LexUZ шарҳи
Мазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Вазирлар Маҳкамаси қарор қилади:
1. Қайд этилсинки, Тошкент педиатрия тиббиёт институтида интизом ва ўқув-тарбия ишлари сусайиб кетганлиги натижасида айрим талабалар томонидан оғир жиноят содир этилган.
Раҳбарликни таъминламаганлиги, ўқув-тарбия ишлари даражаси пасайтириб юборилганлиги учун институт ректори А. Сулаймонов, бошқа мансабдор шахслар Ўзбекистон Республикаси Соғлиқни сақлаш вазирлиги томонидан қаттиқ жазоланганлиги ва ишдан озод қилинганлиги маълумот учун қабул қилинсин.
2. Ўзбекистон Республикаси Соғлиқни сақлаш вазири Ш.И. Каримовга вазирликка қарашли олий ўқув юртларда ўқув-тарбия ишларини ташкил этиш устидан зарур даражада назорат йўқлиги кўрсатиб ўтилсин. У ўқув юртларида зарур тартиб таъминланиши, ўқув-тарбия ишларининг самарали бўлиши ва талабалар ўртасида интизомнинг мустаҳкамланиши, профессор-ўқитувчилар таркибига нисбатан талабчанликнинг оширилиши учун шахсан жавобгар эканлиги тўғрисида огоҳлантирилсин.
3. Олий ва ўрта махсус таълим вазирлиги, Халқ таълими вазирлиги, Соғлиқни сақлаш вазирлиги, бошқа идоралар ўзларига қарашли олий ўқув юртларида талабалар ўртасидаги ўқув-тарбия ишларининг аҳволини қаттиқ талабчанлик билан кўриб чиқсинлар, камчиликлар ва нуқсонлар бўйича энг қаттиқ чора-тадбирлар кўрсинлар, ишларнинг аҳволи, айниқса талабалар ўртасидаги тарбиявий ишларнинг аҳволи учун ректорлар, профессор-ўқитувчилар таркибининг шахсий жавобгарлигини оширсинлар.
(3-банд Ўзбекистон Республикаси Вазирлар Маҳкамасининг 2018 йил 7 декабрдаги 995-сонли қарори таҳририда — Қонун ҳужжатлари маълумотлари миллий базаси, 10.12.2018 й., 09/18/995/2287-сон)