Ichki ishlar vazirligi hamda Toshkent shahar va Toshkent viloyati hokimliklari tomonidan nazoratning susayishi natijasida yoʻlovchilar tashish xavfsizligi talablarini qoʻpol ravishda buzish hollari va odamlar qurbon boʻlayotgan yoʻl-transport hodisalari soni ortgani qayd etib oʻtilsin.

Toshkent shahar IIBB va Toshkent viloyati IIB Yoʻl harakati xavfsizligi boshqarmasi organlari yoʻlovchilar tashiydigan avtotransport vositalarini texnik koʻrikdan oʻtkazish va nosozlarini, shuningdek, foydalanishga yaroqsizlarini aniqlashda masʼuliyatsizlikka yoʻl qoʻyishmoqda. Shahar va shahar atrofi yoʻnalishlarida qatnaydigan avtotransport vositalari yoʻnalishga chiqishdan oldin texnik koʻrikdan oʻtkazilmasdan foydalanilmoqda, haydovchilar esa tibbiy koʻrikdan oʻtmayaptilar. Toshkent shahar hokimligining shahar yoʻlovchi transportini boshqarish boʻyicha vakolatli organlari tomonidan shahar yoʻnalishlariga litsenziya berishning belgilangan talablariga rioya qilinmayapti, yoʻlovchilarni tashuvchilar ustidan yoʻnalish nazorati qoniqarsiz olib borilmoqda.

Fuqarolarning hayoti va salomatligi xavfsizligini taʼminlash, yoʻl-transport hodisalarining oldini olish chora-tadbirlarini kuchaytirish maqsadida:

1. Yoʻl harakati xavfsizligini taʼminlash ishlarida jiddiy kamchiliklarga yoʻl qoʻyganliklari uchun Toshkent shahar Yoʻl harakati xavfsizligi davlat xizmati (YHXDX) organi rahbari S. Irisbekov va Toshkent viloyati YHXDX organi rahbari A. Hamidullayev Ichki ishlar vazirining buyrugʻi bilan egallab turgan lavozimlaridan ozod etilganligi maʼlumot uchun qabul qilinsin.

Oʻzbekiston Respublikasi Ichki ishlar vazirligi YHXDX organlari rahbariyati tomonidan (G. Boltaboyev) yoʻl harakati xavfsizligini taʼminlash va yoʻlovchi transporti sohasidagi qoidabuzarliklarning oldini olish, shuningdek, yoʻlovchilar tashiydigan transport vositalarining texnik holatini nazorat qilish boʻyicha yuklangan majburiyatlar ijrosiga nisbatan masʼuliyatsiz munosabatda boʻlayotgani koʻrsatib oʻtilsin.

2. Toshkent shahar hokimi A. Toʻxtayev va Toshkent viloyati hokimi M. Kuchchiyev, Oʻzbekiston avtomobil va daryo transporti agentligi boshligʻi A. Abduvaliyevga yoʻlovchi transportini nazorat qilish susaytirilgani, yoʻlovchilar tashishni amalga oshirish uchun litsenziya berishning belgilangan talablari bajarilmayotgani hamda avtotransport vositalariga zarur va xavfsiz ish sharoitlari taʼminlanmayotgani qatʼiy koʻrsatib oʻtilsin.

3. Oʻzbekiston Respublikasi Ichki ishlar vazirligi:

ikki oy muddatda avtotransport vositalarini texnik koʻrikdan oʻtkazish va ularning texnik holatini nazorat qilishda YHXDX organlari shaxsiy tarkibi masʼuliyatini kuchaytirish boʻyicha chora-tadbirlar majmuini ishlab chiqsin va amalga oshirsin;

tijorat asosida yoʻlovchilar tashishda foydalaniladigan avtotransport vositalari ikki oy muddatda texnik koʻrikdan oʻtkazilishini taʼminlasin, bunda ularning texnik holati sifatiga va jihozlanishi yoʻl harakati xavfsizligi standartlari, qoidalari, normalariga, shuningdek, ularning qayd etish maʼlumotlariga mos kelishiga alohida eʼtibor qaratsin.

4. Toshkent shahar va Toshkent viloyati hokimliklari zarur shart-sharoitlar yaratilishini hisobga olgan holda yoʻlovchi tashuvchilar, jumladan yakka tartibdagi tadbirkorlarning avtotransport vositalari texnik koʻrikdan oʻtkaziladigan joylarni aniqlasin.

Oʻzbekiston Respublikasi Ichki ishlar vazirligi, Oʻzbekiston avtomobil va daryo transporti agentligi, Toshkent shahar va Toshkent viloyati hokimliklari mazkur yoʻlovchi tashuvchilar oʻrtasida transport vositalarining tegishli texnik holatini taʼminlash uchun yaratilgan shart-sharoitlar haqida keng tushuntirish ishlarini olib borsin.

5. Toshkent shahar hokimligi Oʻzbekiston Respublikasi Prezidentining “Toshkent shahrida yoʻlovchi transportini tashkil etish tizimini yanada takomillashtirish toʻgʻrisida” 2006-yil 11-yanvardagi PF–3713-son Farmonini ijro etish yuzasidan:

Toshkent shahri boʻyicha yoʻlovchi tashishga litsenziya faqat Toshkent shahar hokimligi Yoʻlovchi transportining barcha turlari harakatini litsenziyalash va muvofiqlashtirish departamenti tomonidan berilishini koʻzda tutadigan Oʻzbekiston Respublikasi Prezidentining “Toshshahartransxizmat” uyushmasi hamda Toshkent shahar hokimligi Yoʻlovchi transportining barcha turlari harakatini litsenziyalash va muvofiqlashtirish departamenti faoliyatini tashkil etish toʻgʻrisida” 2006-yil 18-yanvardagi PQ–262-son qarorining 4-bandida belgilangan tartibga qatʼiy rioya qilishni;

2006-yil 1-maydan boshlab shahar va shahar atrofida avtomobil transportida yoʻlovchi tashish faoliyatini amalga oshirishga yuqori darajada himoyalangan litsenziya blankalari va litsenziya kartochkalarining yangi namunasini joriy etishni taʼminlasin.

Toshkent shahrida yoʻlovchi tashish huquqini beruvchi avvalgi litsenziyalar 2006-yil 1-maydan boshlab oʻz kuchini yoʻqotishi, ayni vaqtda ularni yangi blankalarga qayta rasmiylashtirish haq undirilmasdan amalga oshirilishi belgilab qoʻyilsin.

6. Oʻzbekiston avtomobil va daryo transporti agentligi Qoraqalpogʻiston Respublikasi Vazirlar Kengashi, viloyatlar hokimliklari bilan birgalikda ikki oy muddatda mintaqalarda yoʻlovchi tashishni litsenziyalash va muvofiqlashtirish boʻyicha ijro etuvchi hokimiyat organlari huzuridagi tuzilmalar faoliyatini Toshkent shahrida yaratilgan namuna asosida tashkil etish toʻgʻrisida takliflar, shuningdek, Avtomobil transportida yoʻlovchilar tashish faoliyatini litsenziyalash toʻgʻrisidagi nizom loyihasini kiritsin.

7. Belgilansinki, avtomobil transportida yoʻlovchilar tashish faoliyatini litsenziyasiz amalga oshirishda aybdor boʻlgan shaxslar sud orqali eng kam ish haqining 20 dan 150 barobarigacha miqdorda jarima solish yoʻli bilan maʼmuriy javobgarlikka tortiladi. Maʼmuriy jazo qoʻllanilgandan soʻng bir yil mobaynida ayni shunday huquqbuzarlik sodir etilgan taqdirda, yoʻlovchi tashish transporti huquqbuzarlik vositasi sifatida musodara qilinadi va aybdor shaxs qonunda belgilangan javobgarlikka tortiladi.

8. Oʻzbekiston Respublikasi Ichki ishlar vazirligi ikki oy muddatda manfaatdor vazirlik va idoralar bilan birgalikda Avtotransport vositalari haydovchilarini imtihondan oʻtkazish va ularga haydovchilik guvohnomasini topshirish tartibi toʻgʻrisidagi nizomni hamda avtotransport vositalari haydovchilarini tayyorlash va qayta tayyorlash (malakasini oshirish) tartibi va muddatlari toʻgʻrisidagi nizomni tasdiqlash uchun kiritsin, bunda yoʻlovchilar tashishda ishtirok etuvchi haydovchilar tarkibini oʻqitish va tayyorlash qoidalarini takomillashtirish, imtihon oʻtkazish va haydovchilik guvohnomalari berish, transport vositalarini boshqarish huquqini beradigan hujjatni olishga oʻqitadigan instruktorlarga nisbatan qoʻyiladigan malaka talablarini oshirish nazarda tutilsin.

9. Oʻzbekiston Respublikasi Adliya vazirligi bir oy muddatda manfaatdor idoralar bilan birgalikda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisidagi takliflarni Vazirlar Mahkamasiga kiritsin.

10. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.