Vazirlar Mahkamasi qayd qiladiki, xoʻjaliklar ixtiyorida qoldiriladigan paxta tolasi va boshqa mahsulotlarni sotish boʻyicha Qoraqalpogʻiston respublika va viloyatlar uyushmalari tomonidan tovar ayirboshlash (barter) operatsiyalarini bajarishda paxta tolasidan nooqilona foydalanishning koʻplab hollariga yoʻl qoʻyilmoqda. Tola ikkinchi darajali tovarlar va resurslarga almashtirish uchun joʻnatilmoqda, ayirboshlashning teng qiymatliligiga hamma vaqt ham rioya qilinmayapti. Bahosini pasaytirish kabi suiisteʼmolliklar va buning hisobiga pora olish hollari koʻplab yuz bermoqda.

Paxta tolasini sotish koʻpincha bir qancha vositachilar ishtirokida hamda tumanlar va viloyatlar hokimliklarining aralashuvi bilan amalga oshirilmoqda.

Bularning barchasi amalga oshirilayotgan barter bitishuvlarining samaradorligini pasaytirmoqda, respublika xalq xoʻjaligiga iqtisodiy zarar yetkazmoqda, xoʻjaliklarning mustaqilligini va tashabbusini boʻgʻib qoʻymoqda.

Paxta tolasi resurslaridan oqilona foydalanish va uni MDH mamlakatlaridagi isteʼmolchilarga sotishda zarur tartib oʻrnatish maqsadida Vazirlar Mahkamasi qaror qiladi:

1. “Oʻzshartnomasavdo” va “Oʻzdavpaxtasanoatsotish” uyushmalari hukumatlararo bitimlar boʻyicha barcha paxta tolasini sotishni, eksportga yetkazib berish va erkin almashtiriladigan valyutaga sotishdan tashqari, respublikaga eng zarur tovarlarni, birinchi navbatda oziq-ovqat va xomashyo keltirishni nazarda tutgan holda mutlaqo kliring asosida amalga oshirsinlar.

2. Belgilab qoʻyilsinki, xoʻjaliklar ixtiyorida qoldiriladigan barcha paxta tolasi Qopaqalpogʻicton respublika va viloyat uyushmalari orqali isteʼmolchilar bilan tuziladigan toʻgʻridan- toʻgʻri shartnomalar asosida asosan erkin almashtiriladigan valyutaga ular tomonidan mustaqil sotiladi. Qolganlari belgilangan tartibda oziq-ovqat va moddiy-texnika resurslariga almashtirilib faqat kliring asosida va barter shartlari boʻyicha sotiladi, respublika isteʼmolchilari bundan mustasnodir.

3. “Oʻzdavpaxtasanoatsotish” uyushmasi (oʻrtoq Zikriyoyev), uning viloyat boʻlinmalari davlat resurslaridagi va xoʻjaliklar ixtiyorida qoldiriladigan paxta tolasidan maqsadga muvofiq foydalanish ustidan qatʼiy hisob-kitob va nazorat oʻrnatsinlar.

4. Qoraqalpogʻiston Respublikasi Vazirlar Kengashi, viloyatlar va tumanlar hokimliklari xoʻjaliklar ixtiyorida qoldiriladigan paxta tolasini sotishda ularning manfaatlari va huquqlari kamsitilishiga yoʻl qoʻymasinlar, paxta tolasi resurslarini oʻta taqchil boʻlmagan tovar-moddiy resurslarini respublikaga keltirishga jalb qilish hollarining oldini olsinlar.

5. Mazkur qarorning bajarilishi uchun shaxsiy javobgarlik “Oʻzdavpaxtasanoatsotish” uyushmasi (oʻrtoq Zikriyoyev), “Oʻzshartnomasavdo” davlat uyushmasi (oʻrtoq Sharipov), Tashqi iqtisodiy aloqalar vazirligi (oʻrtoq Rustambekov), Oʻrta Osiyo Temir yoʻl boshqarmasi (oʻrtoq Jeltouxov), “Oʻzavtotrans” korporatsiyasi (oʻrtoq Axmetov), Bojxona qoʻmitasi (oʻrtoq Abdugʻaniyev) rahbarlari zimmasiga yuklatilsin.