Respublika huquqni muhofaza qiluvchi idoralari tomonidan o‘tkazilgan tekshirishlar joylardagi hokimliklar va bozor rahbarlarining loqaydligi tufayli Respublika Prezidentining “Bozorlarning faoliyatini tashkil etishni va aholiga xizmat ko‘rsatish sifatini yaxshilashga doir qo‘shimcha chora-tadbirlar to‘g‘risida” 1996-yil 5-martdagi Farmoni, Vazirlar Mahkamasining “Bozorlarning faoliyatini va ularni boshqarishni tartibga solish chora-tadbirlari to‘g‘risida” 1996-yil 5-martdagi 82-son qarori hamda “Bozorlardan foydalanishdan tushadigan daromadlarni shakllantirish, taqsimlash va ulardan foydalanish tartibi to‘g‘risida nizom” ijrolari qoniqarsiz tashkil qilinganligini ko‘rsatmoqda.

Ilgaridek, Toshkent shahri, Qoraqalpog‘iston Respublikasi va viloyatlar bozorlarida dehqon va fermyerlarga yetishtirilgan mahsulotlarini sotish uchun zarur sharoitlar yaratilmagan. Olibsotarlar, turli jinoiy tizimlar hamda bozorlar ma’muriyati xodimlari va rahbarlarining o‘zlari tomonidan tovlamachilik, qonunsiz yig‘imlar, tazyiq o‘tkazish holatlari o‘rin olib kelmoqda.

Mahsulot yetkazib beruvchilar bilan bevosita shartnomalarni tuzish, qishloq xo‘jaligi mahsulotlarini bozorlarga olib kelish, saqlash va qo‘riqlash masalalari tashkil qilinmagan.

Qoraqalpog‘iston Respublikasi Vazirlar Kengashi va viloyatlar hokimliklari tomonidan bozor rahbarlari lavozimlariga halol, sof vijdonli odamlarni tanlash masalalari o‘z holiga tashlab qo‘yilgan. Ko‘pincha bu lavozimlarda o‘z mansabiga tekin boylik va daromad orttirish vositasi sifatida qarovchi tasodifiy odamlar qolmoqda.

Bozorlar faoliyatidan tushadigan mablag‘ va daromadlar nazoratsiz tasarruf etilmoqda va o‘zlashtirilmoqda.

Buxoro, Andijon viloyatlari, Toshkent shahri bozorlarini aksiyadorlik jamiyatlariga aylantirish hamon paysalga solinib, chiqarilgan aksiyalarning ko‘p qismi sotilmay qolmoqda.

Qoraqalpog‘iston Respublikasi, Farg‘ona, Andijon viloyatlaridagi bozorlar rahbarlarining mas’uliyatsizligi oqibatida xo‘jaliklar, fermyerlar va aholi bilan fyuchers shartnomalarini tuzish va ularning ijrosini ta’minlash sust amalga oshirilayotir.

Dehqon bozorlarida qishloq xo‘jaligi mahsulotlarini olib-sotish, valyutafurushlik, spirtli ichimlik va tamaki mahsulotlarini g‘ayriqonuniy sotish, firibgarlik va boshqa jinoyatlarning kamayishiga hanuzgacha erishilmagan.

Yuqorida ko‘rsatib o‘tilgan jiddiy kamchiliklarni bartaraf etish maqsadida Vazirlar Mahkamasi qaror qiladi:

1. Qoraqalpog‘iston Respublikasi Vazirlar Kengashi raisi, viloyatlar hokimliklari va Toshkent shahar hokimi hamda Respublika Prokuraturasi, Ichki ishlar vazirligi, Davlat soliq qo‘mitasi va ularning joylardagi idoralarining yuqorida qayd etilgan O‘zbekiston Respublikasi Prezidentining Farmoni va Vazirlar Mahkamasining qarorini bajarish, respublika bozorlarida zarur tartib o‘rnatish borasidagi ishlari qoniqarsiz deb hisoblansin. Ular ishning ushbu sohasi uchun shaxsan mas’ul ekanliklari haqida ogohlantirilsin.

2. Qoraqalpog‘iston Respublikasi Vazirlar Kengashi raisi, viloyatlar, Toshkent shahri hokimlari zimmasiga:

bozorlar faoliyatini tashkil qilishda mas’uliyatsizlikka yo‘l qo‘ygan tuman, shahar hokimlarini intizomiy javobgarlikka tortish;

ikki hafta muddatda dehqon bozorlari rahbarlarini attestatsiyadan o‘tkazish yuzasidan komissiya tuzish;

bozorlarning layoqatsiz, nopok rahbarlarini o‘z vazifalaridan ozod qilish, ularning bozor ma’muriyatlaridagi boshqa lavozimlarda qolishiga yo‘l qo‘ymaslik;

bozorlarni obodonlashtirish yuzasidan qo‘shimcha chora-tadbirlarni amalga oshirish;

aholini qishloq xo‘jaligi, chorvachilik mahsulotlari va boshqa keng iste’mol tovarlari bilan ta’minlash, bozor ma’muriyatlari xodimlari o‘rtasida intizomni mustahkamlash yuzasidan qat’iy choralar ko‘rish yuklansin.

3. Ko‘rilgan choralar haqida bir oy muddatda O‘zbekiston Respublikasi Vazirlar Mahkamasiga axborot berilsin.

4. O‘zbekiston Respublikasi Prokuraturasi (B. Mustafoyev), Ichki ishlar vazirligi (Z. Almatov) va Davlat soliq qo‘mitasi (V. Beganov)ga bozorlar faoliyatini tashkil qilish ustidan nazoratni yanada kuchaytirish, aniqlangan qonunbuzarliklar yuzasidan aybdor mansabdor shaxslarga nisbatan jinoiy javobgarlikkacha bo‘lgan qattiq choralar ko‘rish topshirilsin.

5. O‘zbekiston Respublikasi Adliya vazirligi (S. Mirsafoyev), Oliy xo‘jalik sudi (M. Abdusalomov) bozor ma’muriyatlari tomonidan mahsulot yetkazib berish haqida tuziladigan shartnomalarning sifati va samaradorligini oshirish yuzasidan amaliy tadbirlar ko‘rsinlar.

6. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari I. Jo‘rabekov zimmasiga yuklansin.