Vazirlar Mahkamasi qayd etadiki, belgilangan topshiriqlardan ortiqcha ishlab chiqarilgan, chetga jo‘natilishi kerak bo‘lgan tola o‘rniga, o‘rnatilgan tartibga zid ravishda, Qoraqalpog‘iston Respublikasi Vazirlar Kengashining paxta tolasini sotish to‘g‘risida o‘zboshimchalik bilan qabul qilgan qarorlari natijasida “Karakalpakintorg” va “Karakalpakxlopkoprom” tomonidan davlat resurslaridan Turkiyaning “Yazeks” korporatsiyasiga 8,6 ming tonna va MDH mamlakatlariga 2,6 ming tonna paxta tolasi jo‘natilgan. Bu bilan amaldagi tartibni chetlab o‘tgan holda tolani chetga chiqarishga ruxsat bergan O‘zbekiston Respublikasi Tashqi iqtisodiy aloqalar vazirligi va Davlat bojxona qo‘mitasi nazoratsizlikka va yuzaki yondashuvga yo‘l qo‘ydilar.

Vazirlar Mahkamasi qaror qiladi:

1. Qoraqalpog‘iston Respublikasi Vazirlar Kengashining sobiq raisi (o‘rtoq Tojiyev)ga, O‘zbekiston Respublikasi Tashqi iqtisodiy aloqalar vazirligi (o‘rtoq Sultonov)ga, “O‘zpaxtasanoat” respublika ishlab chiqarish birlashmasi (o‘rtoq Maqsudov)ga va Davlat bojxona qo‘mitasi (o‘rtoq Oripov)ga paxta tolasini Qoraqalpog‘iston Respublikasidan chetga chiqarish hujjatlarini rasmiylashtirishda yuzaki yondashilganlik ko‘rsatib o‘tilsin. Ulardan tolani O‘zbekiston Respublikasidan tashqariga jo‘natishning asoslanganligi bo‘yicha nazoratni kuchaytirish talab qilinsin.

2. Qoraqalpog‘iston Respublikasi Vazirlar Kengashining raisi o‘rtoq R.I. Yo‘ldoshev paxta tolasini O‘zbekiston Respublikasidan tashqariga jo‘natish bo‘yicha huquqqa zid va o‘zboshimchalik bilan qarorlar qabul qilishga bundan keyin yo‘l qo‘ymaslik to‘g‘risida ogohlantirilsin.

Qoraqalpog‘iston Respublikasi Vazirlar Kengashiga “Karakalpakintorg” bosh direktori o‘rtoq M.A. Mambetnazarovning va “Karakalpakxlopkoprom” boshlig‘i o‘rtoq T. Poluashevning mazkur paxta tolasini sotishda yo‘l qo‘ygan buzilishlar uchun egallab turgan lavozimlarida qolish-qolmasliklari to‘g‘risidagi masalani ko‘rib chiqish yuklatilsin.

1992-yilda noqonuniy sotilgan paxta tolasi hajmining o‘rni shu yilgi rejadagi paxta hosilining 15 foizi va rejadan tashqari hosil hisobiga to‘ldirilsin.