Keyingi vaqtlarda oʻta taqchil oziq-ovqat mahsulotlarini va dorivor vositalarni respublika tashqarisiga noqonuniy olib ketish hollari tez-tez sodir boʻlmoqda. Oziq-ovqat mahsulotlaridan, nooziq-ovqat tovarlaridan, tibbiyot maqsadlaridagi buyumlar va dori-darmonlardan maqsadli foydalanishni taʼminlash maqsadida Vazirlar Mahkamasi qaror qiladi:

1. Normalangan tovarlarni berish tartibini qoʻpol ravishda buzishga va ularni respublika tashqarisiga noqonuniy olib ketishga yoʻl qoʻyganligi uchun “Oʻzbekbirlashuv” boshqaruvining qarori bilan Toshkent viloyat matlubot jamiyatlari uyushmasining raisi M.A. Zokirov egallab turgan lavozimidan boʻshatilganligi, Andijon viloyat matlubot jamiyatlari uyushmasining raisi S.K. Iminovga qattiq xayfsan eʼlon qilinganligi maʼlumot uchun qabul qilinsin.

2. “Oʻzbekbirlashuv” (oʻrtoq G.G. Volkov), “Oʻzbeksavdo” uyushmasi (oʻrtoq M.3. Usmonov) Oʻrta Chirchiq nohiya matlubot jamiyatlari uyushmasining korxonalari tomonidan qand-shakar va unni, Qarshi Markaziy universal magazini tomonidan gazlamalarni katta miqdorda sotish, shuningdek, koʻrsatilgan tovarlarni respublika tashqarisiga noqonuniy olib ketishga urinish hollarini oʻrganib chiqsinlar, bunda aybdor boʻlgan xodimlarga nisbatan egallab turgan lavozimidan boʻshatishgacha eng qattiq jazo choralarini koʻrsinlar.

3. Ichki ishlar vazirligi (oʻrtoq 3.A. Almatov) aniqlangan faktlarni toʻliq oʻrganish va aybdor shaxslarni aniqlash uchun zarur choralarni koʻrsin, materiallarni prokuratura organlariga topshirsin.

Oziq-ovqatlar, xalq isteʼmoli tovarlari va dori-darmonlarni noqonuniy olib ketish yoʻllarini keskin yoʻqotsin.

Qoida buzuvchilarga tezda taʼsir koʻrsatish uchun noqonuniy olib ketish hollari toʻgʻrisida tegishli vazirliklar va idoralarni oʻz vaqtida xabardor qilsin.

4. Mudofaa vazirligi (oʻrtoq R.U. Ahmedov) vazirlikka qarashli muassasalarda dorivor vositalarning saqlanishini, zaharli-narkotik dorilardan foydalanish ustidan qattiq nazoratni taʼminlash choralarini koʻrsin.

5. Qoraqalpogʻiston Respublikasi Vazirlar Kengashining raisi, viloyatlar va Toshkent shahar hokimlari oʻz shaxsiy javobgarliklari ostida oziq-ovqat va nooziq-ovqat tovarlarining, dorivor vositalarning saqlanishini hamda ularning respublika tashqarisiga noquniy olib ketilishini nazorat qilishni taʼminlasinlar.

6. Sogʻliqni saqlash vazirligi (oʻrtoq Sh.I. Karimov), Moliya vazirligi (oʻrtoq E.J. Boqiboyev) bilan birgalikda Toshkent shahri, Toshkent, Fargʻona, Andijon viloyatlaridagi dorixona muassasalarining xoʻjalik-moliya faoliyatini taftish qilsin. Taftish yakunlari sogʻliqni saqlash vazirligi hayʼatida koʻrib chiqilsin. Dorivor vositalarning saqlanishi va ulardan maqsadli foydalanish ustidan nazoratni boʻshashtirib yuborgan shaxslarga nisbatan jazo choralari kuchaytirilsin.

7. “Oʻzbeksavdo” uyushmasi (oʻrtoq M.3. Usmonov), Oʻzbekbirlashuv (oʻrtoq G.G. Volkov), “Oʻzkooptayyorlovsavdo” (oʻrtoq E. Qurbonov), savdo shoxobchalariga va oziq-ovqat mahsulotlarini qayta ishlash sexlariga ega boʻlgan vazirliklar, idoralar, uyushmalar, konsernlar, birlashmalar rahbarlari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tovarlarni sotish tartibiga rioya qilish ustidan nazoratni kuchaytirsinlar, ularni bazalar va omborlardan sotishga, shuningdek, ularni normadan ortiqcha berishga yoʻl qoʻymasinlar. Xalq isteʼmoli tovarlarini respublika tashqarisiga noqonuniy olib ketish va joʻnatish hollariga qatʼiy barham bersinlar. Ushbu masalalarda qoida buzishlarga yoʻl qoʻygan xodimlarni qonunda belgilangan tartibda jazolasinlar.

Savdo tashkilotlari va korxonalari rahbarlarining tovarlarni belgilangan normalarga qatʼiy muvofiq holda berilishining toʻgʻriligi uchun shaxsan javobgarligini belgilasinlar.

8. “Oʻzdonmahsulot” (oʻrtoq R.A. Ahmedov), “Oʻzmevasabzavotuzumsanoat” (oʻrtoq A.X. Toshkenboyev), “Oʻzoziqovqatsanoat” (oʻrtoq N.I. Hamidov) konsernlari, Mahalliy sanoat vazirligi (oʻrtoq V.A. Chjen) rahbarlari oziq-ovqat xalq isteʼmoli tovarlarini saqlash va savdo tashkilotlariga oʻz vaqtida yetkazish yuzasidan kechiktirib boʻlmaydigan choralarni koʻrsinlar, xomashyo va oziq-ovqatlardan maqsadli foydalanish ustidan nazoratni kuchaytirsinlar. Qoida buzishlar aniqlanganda materiallar tergov organlariga oshirilsin.

9. Mazkur qarorning bajarilishini nazorat qilish Vazirlar Mahkamasi Raisining birinchi oʻrinbosari oʻrtoq I.H. Joʻrabekov zimmasiga yuklatilsin.