LexUZ sharhi
Mazkur qaror O‘zbekiston Respublikasi Vazirlar Mahkamasining 1997-yil 31-martdagi 165-sonli “Tovar bozorlarida monopolistik faoliyatni cheklash va raqobat to‘g‘risida”gi O‘zbekiston Respublikasi Qonunini amalga oshirish chora-tadbirlari haqida”gi qaroriga muvofiq o‘z kuchini yo‘qotgan.
Respublikada raqobatni rivojlantirish, xo‘jalik yurituvchi subyektlarni monopoliyadan chiqarishni kengaytirish va iqtisodiy islohotlarni chuqurlashtirish maqsadida Vazirlar Mahkamasi qaror qiladi:
1. Vazirlar Mahkamasining 1993-yil 30-martdagi 160-son qarori bilan tasdiqlangan “O‘zbekiston Respublikasining tovar bozorlarida monopolistik mavqeini egallagan xo‘jalik yurituvchi subyektlarning Davlat reyestri to‘g‘risida Nizom” 2-bandining birinchi, ikkinchi va uchinchi xatboshilari quyidagi tahrirda bayon qilinsin:
“2. Monopolist reyestrga agar uning muayyan tovar bozoridagi ulushi 65 foizni yoki undan ko‘proqni tashkil etsa, yoxud ushbu ulush O‘zbekiston Respublikasi Moliya vazirligi huzuridagi Monopoliyadan chiqarish va raqobatni rivojlantirish qo‘mitasi tomonidan quyidagi holatlarga bog‘liq ravishda 35 foizdan 65 foizgacha bo‘lgan diapazonda belgilangan taqdirda kiritiladi:
xo‘jalik yurituvchi subyektning tovar aylanishi sharoitlariga mustaqil ravishda yoki xo‘jalik yurituvchi boshqa subyektlar bilan birgalikda harakat qilgan holda hal qiluvchi ta’sir ko‘rsata olish imkoniyati;
xo‘jalik yurituvchi subyekt xatti-harakatlari (xatti-harakatsizligining monopoliyaga qarshi qonunchilikni buzishi va boshqa xo‘jalik yurituvchi subyektlarning bozorga kirishini qiyinlashtirishi”.