O‘zbekiston Respublikasi Prezidentining “Tadbirkorlik faoliyatini himoya qilish tizimini tubdan takomillashtirish va prokuratura organlari faoliyatini optimallashtirish chora-tadbirlari to‘g‘risida” 2019-yil 15-martdagi PF-5690-son Farmonini ijro etish yuzasidan, shuningdek, O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil (keyingi o‘rinlarda Tadbirkorlarning huquqlarini himoya qilish bo‘yicha vakil deb ataladi) faoliyatini samarali tashkil etish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Tadbirkorlik faoliyatini himoya qilish tizimini tubdan takomillashtirish va prokuratura organlari faoliyatini optimallashtirish chora-tadbirlari to‘g‘risida” 2019-yil 15-martdagi PF-5690-son Farmoni bilan Qoraqalpog‘iston Respublikasi, viloyatlar va Toshkent shahar prokurorlarining soliq va bojxona islohotlarini amalga oshirish sohasida qonunchilik ijrosi ustidan nazorat qilishga mas’ul bo‘lgan o‘rinbosarlariga biriktirilgan transport vositalari, shuningdek, Tadbirkorlarning huquqlarini himoya qilish bo‘yicha vakil apparatining xodimlari hududlarda faoliyatni samarali amalga oshirishi uchun zarur bo‘lgan kompyuter texnikasi Tadbirkorlarning huquqlarini himoya qilish bo‘yicha vakilga berilganligi ma’lumot uchun qabul qilinsin.

2. O‘zbekiston Respublikasi Moliya vazirligi:

a) 2019-yilda Tadbirkorlarning huquqlarini himoya qilish bo‘yicha vakil apparatiga transport vositalari, idora mebeli, kompyuter texnikasi, tashkiliy texnika, shuningdek, boshqa tovar-moddiy boyliklar va xizmatlarni joriy saqlash va sotib olish uchun O‘zbekiston Respublikasi Vazirlar Mahkamasining zaxira jamg‘armasidan asoslangan hisob-kitoblar bo‘yicha 1,7 mlrd so‘m mablag‘ ajratsin;

Tadbirkorlarning huquqlarini himoya qilish bo‘yicha vakil apparatiga navbatchi avtotransport vositalari sifatida foydalanish uchun 2 ta yengil xizmat avtomobilini saqlash uchun qo‘shimcha limit ajratsin;

Tadbirkorlarning huquqlarini himoya qilish bo‘yicha vakil apparatiga va uning hududlarda faoliyat yurituvchi xodimlariga belgilangan normativlarga muvofiq texnik va xizmat ko‘rsatuvchi xodimlarning qo‘shimcha shtat birliklarini ajratsin;

b) 2020-yildan boshlab har yili O‘zbekiston Respublikasi Davlat budjeti parametrlarida Tadbirkorlarning huquqlarini himoya qilish bo‘yicha vakil apparatini joriy saqlashga mablag‘larni nazarda tutsin.

3. Belgilab qo‘yilsinki:

Tadbirkorlarning huquqlarini himoya qilish bo‘yicha vakil apparati moliya sektorining buxgalteri va moddiy buxgalteri (kassir)ga O‘zbekiston Respublikasi Prezidenti Administratsiyasi bosh buxgalteri va bosh buxgalterning o‘rinbosari uchun belgilangan mehnatga haq to‘lash va moddiy rag‘batlantirish shartlari tatbiq etiladi;

Tadbirkorlarning huquqlarini himoya qilish bo‘yicha vakil devonining texnik xodimlariga O‘zbekiston Respublikasi Prezidenti Administratsiyasining tegishli xizmatchi xodimlari, shu jumladan, operatorlarga mutaxassis lavozimi uchun belgilangan mehnatga haq to‘lash va moddiy rag‘batlantirish shartlari tatbiq etiladi.

Tadbirkorlarning huquqlarini himoya qilish bo‘yicha vakil devonining xizmat ko‘rsatuvchi xodimlariga O‘zbekiston Respublikasi Prezidenti Administratsiyasi Transport bo‘limining tegishli xizmat ko‘rsatuvchi xodimlari uchun belgilangan mehnatga haq to‘lash va moddiy rag‘batlantirish shartlari tatbiq etiladi.

Tadbirkorlarning huquqlarini himoya qilish bo‘yicha vakil apparatining navbatchi transport vositalarini Toshkent shahrida saqlash O‘zbekiston Respublikasi Prezidenti Administratsiyasi Transport bo‘limi tomonidan, hududlarda esa — Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan bepul asosda amalga oshiriladi.

4. Tadbirkorlarning huquqlarini himoya qilish bo‘yicha vakil apparati avtotransport vositalarini rasmiylashtirish, qayta rasmiylashtirish va davlat raqami belgilarini berishda davlat bojlari va yig‘imlar to‘lashdan ozod qilinsin.

O‘zbekiston Respublikasi Ichki ishlar vazirligi Tadbirkorlarning huquqlarini himoya qilish bo‘yicha vakil apparatiga avtotransport vositalarini rasmiylashtirish, qayta rasmiylashtirish va davlat raqami belgilari berilishida ko‘maklashsin.

5. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi Tadbirkorlarning huquqlarini himoya qilish bo‘yicha vakil apparati buyurtmanomasi bo‘yicha belgilangan tartibda:

Tadbirkorlarning huquqlarini himoya qilish bo‘yicha vakil apparati aloqaning zarur turlari, shu jumladan, Hukumat aloqasi bilan jihozlanishini, shuningdek, Internet axborot tarmog‘idan keng polosali foydalanishini;

Tekshiruvlarni elektron ro‘yxatga olish yagona tizimi takomillashtirilishi va uning uzluksiz ishlashi qo‘llab-quvvatlanishini ta’minlasin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — moliya vaziri J.A. Qo‘chqorov zimmasiga yuklansin.