Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid davlat dasturi toʻgʻrisida” 2019-yil 17-yanvardagi PF-5635-son Farmoni ijrosini taʼminlash maqsadida Vazirlar Mahkamasi qaror qiladi:

1. Vazirlar Mahkamasining 2014-yil 29-iyuldagi 205-son qarori (Oʻzbekiston Respublikasi QT, 2014-y., 7-son, 76-modda) bilan tasdiqlangan Ommaviy tadbirlarni oʻtkazish qoidalariga ilovaga muvofiq oʻzgartirishlar va qoʻshimchalar kiritilsin.

2. Oʻzbekiston Respublikasi Ichki ishlar vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.

1. 1-banddagi “ichki ishlar organlarining” soʻzlari “ichki ishlar organlari, Oʻzbekiston Respublikasi Milliy gvardiyasi boʻlinmalari, shuningdek, davlat boshqa organlarining” soʻzlari bilan almashtirilsin.

2. 5-bandning birinchi xatboshidagi “Ommaviy tadbir uni oʻtkazishda xavfsizlikni taʼminlash toʻgʻrisida ichki ishlar organlari bilan shartnoma tuzilgandan keyin” soʻzlari chiqarib tashlansin.

3. 8-bandning birinchi xatboshi quyidagi tahrirda bayon qilinsin:

“Birinchi toifadagi ommaviy tadbirlarni oʻtkazish uchun ruxsatnomalar Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari, viloyatlar ichki ishlar boshqarmalari va Oʻzbekiston Respublikasi Milliy gvardiyasi tegishli boʻlinmalarining rahbariyati bilan kelishilgan holda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan beriladi”.

4. 13-bandning ikkinchi xatboshi quyidagi tahrirda bayon qilinsin:

“Birinchi toifadagi ommaviy tadbirni oʻtkazish toʻgʻrisidagi masalani koʻrib chiqishda komissiya tarkibiga Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari, viloyatlar ichki ishlar boshqarmalarining ijtimoiy-siyosiy, madaniy-ommaviy tadbirlarni oʻtkazishda xavfsizlikni taʼminlash boʻlinmasi (keyin oʻrinlarda OBOKM boʻlinmasi deb ataladi) komandiri, shuningdek, Oʻzbekiston Respublikasi Milliy gvardiyasi tegishli boʻlinmasining rahbari kiritiladi”.

5. 15-banddagi:

birinchi va ikkinchi xatboshilar quyidagi tahrirda bayon qilinsin:

“Ommaviy tadbirlarni oʻtkazishda fuqarolarning xavfsizligini va jamoat tartibini taʼminlash chora-tadbirlari:

birinchi toifadagi ommaviy tadbirlarni oʻtkazishda — OBOKM boʻlinmalari va Oʻzbekiston Respublikasi Milliy gvardiyasining tegishli boʻlinmalari tomonidan amalga oshiriladi”;

toʻrtinchi xatboshiga “hududiy ichki ishlar organlari” soʻzlaridan keyin “, shuningdek, Oʻzbekiston Respublikasi Milliy gvardiyasining tegishli boʻlinmalari” soʻzlari qoʻshilsin.

6. 16-band oʻz kuchini yoʻqotgan deb hisoblansin.

7. 21¹–banddagi “ushbu Nizomning 21-bandida” soʻzlari “ushbu Qoidalarning 21-bandida” soʻzlari bilan almashtirilsin.

8. 25-bandning uchinchi xatboshi quyidagi tahrirda bayon qilinsin:

“Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari, viloyatlar ichki ishlar boshqarmalari va Oʻzbekiston Respublikasi Milliy gvardiyasi tegishli boʻlinmalarining rahbariyatiga — birinchi toifadagi ommaviy tadbirni oʻtkazish uchun ruxsatnoma berilishi toʻgʻrisidagi arizani olganda”.

9. 37-band oʻz kuchini yoʻqotgan deb hisoblansin.

10. 38-bandning ikkinchi xatboshidagi “ichki ishlar organining” soʻzlari “ichki ishlar organi va Oʻzbekiston Respublikasi Milliy gvardiyasi tegishli boʻlinmasining” soʻzlari bilan almashtirilsin

11. 44-banddagi “ichki ishlar organini” soʻzlari “ichki ishlar organi va Oʻzbekiston Respublikasi Milliy gvardiyasining tegishli boʻlinmasini” soʻzlari bilan almashtirsin.

12. 53-bandning oltinchi xatboshidagi “ichki ishlar organi (OBOKM boʻlinmasi)ning” soʻzlari “ichki ishlar organi (OBOKM boʻlinmasi) va Oʻzbekiston Respublikasi Milliy gvardiyasi tegishli boʻlinmasining” soʻzlari bilan almashtirilsin.

13. IX bobning nomidagi “va ichki ishlar organlarining” soʻzlari “, ichki ishlar organlari, Oʻzbekiston Respublikasi Milliy gvardiyasi boʻlinmalari va davlat boshqa organlarining” soʻzlari bilan almashtirilsin.

14. 58-banddagi “ichki ishlar organlari xodimlarining” soʻzlari “ichki ishlar organlari va Oʻzbekiston Respublikasi Milliy gvardiyasi boʻlinmalari xodimlarining” soʻzlari bilan almashtirilsin.

15. 59-bandning beshinchi xatboshidagi “ichki ishlar organlari xodimlarining” soʻzlari “ichki ishlar organlari va Oʻzbekiston Respublikasi Milliy gvardiyasining boʻlinmalari vakillarining” soʻzlari bilan almashtirilsin.

16. 61-bandda:

toʻrtinchi xatboshidagi “va Davlat xavfsizlik xizmati” soʻzlari “Oʻzbekiston Respublikasi Milliy gvardiyasi va Davlat xavfsizlik xizmati” soʻzlari bilan almashtirilsin;

oltinchi xatboshidagi:

“va Davlat xavfsizlik xizmati” soʻzlari “Oʻzbekiston Respublikasi Milliy gvardiyasi va Davlat xavfsizlik xizmati” soʻzlari bilan almashtirilsin;

“xodimlarini” soʻzi “vakillarini” soʻzi bilan almashtirilsin;

sakkizinchi xatboshi oʻz kuchini yoʻqotgan deb hisoblansin;

toʻqqizinchi xatboshidagi “ichki ishlar organlarining xodimlarini” soʻzlari “ichki ishlar organlari va Oʻzbekiston Respublikasi Milliy gvardiyasi boʻlinmalarining vakillarini” soʻzlari bilan almashtirilsin;

oʻn uchinchi xatboshidagi “Davlat xavfsizlik xizmati” soʻzlari “Oʻzbekiston Respublikasi Milliy gvardiyasi va Davlat xavfsizlik xizmati” soʻzlari bilan almashtirilsin”;

oʻn toʻrtinchi xatboshiga “ichki ishlar organlari” soʻzlaridan keyin “va Oʻzbekiston Respublikasi Milliy gvardiyasi” soʻzlari qoʻshilsin;

oʻn beshinchi xatboshidagi “Davlat xavfsizlik xizmati” soʻzlari “Oʻzbekiston Respublikasi Milliy gvardiyasi va Davlat xavfsizlik xizmati” soʻzlari bilan almashtirilsin;

oʻn oltinchi xatboshidagi “ichki ishlar organlari va Davlat xavfsizlik xizmati xodimlariga” soʻzlari “ichki ishlar organlari, Oʻzbekiston Respublikasi Milliy gvardiyasi va Davlat xavfsizlik xizmati xodimlariga” soʻzlari bilan almashtirilsin.

17. 62-bandning ikkinchi xatboshi quyidagi tahrirda bayon qilinsin:

“ommaviy tadbirni oʻtkazishda ruxsatnoma bilan zimmasiga fuqarolarning xavfsizligini va jamoat tartibini taʼminlash chora-tadbirlarini amalga oshirish yuklangan ichki ishlar organi va Oʻzbekiston Respublikasi Milliy gvardiyasining tegishli boʻlinmasidan kuch va texnik vositalar ajratilishini talab qilish”.

18. 63-bandning uchinchi xatboshidagi “ichki ishlar organlari xodimlarining” soʻzlari “ichki ishlar organlari va Oʻzbekiston Respublikasi Milliy gvardiyasi boʻlinmalari vakillarining” soʻzlari bilan almashtirilsin.

19. 64-bandning ikkinchi xatboshidagi “ichki ishlar organlari xodimlaridan” soʻzlari “ichki ishlar organlari va Oʻzbekiston Respublikasi Milliy gvardiyasi vakillaridan” soʻzlari bilan almashtirilsin.

20. 65-bandning beshinchi xatboshidagi “va ichki ishlar organlari” soʻzlari “, ichki ishlar organlari, Oʻzbekiston Respublikasi Milliy gvardiyasi va Favqulodda vaziyatlar vazirligi” soʻzlari bilan almashtirilsin.

21. 67-bandda:

oltinchi xatboshiga “ichki ishlar organlariga” soʻzlaridan keyin “va Oʻzbekiston Respublikasi Milliy gvardiyasining tegishli boʻlinmalariga” soʻzlari qoʻshilsin;

oʻn birinchi xatboshiga “ichki ishlar organlari” soʻzlaridan keyin “va Oʻzbekiston Respublikasi Milliy gvardiyasi” soʻzlari qoʻshilsin.

22. 68-bandning toʻrtinchi xatboshidagi “ichki ishlar organlari va Davlat xavfsizlik xizmati xodimlariga” soʻzlari “ichki ishlar organlari, Oʻzbekiston Respublikasi Milliy gvardiyasi va Davlat xavfsizligi xizmati vakillariga” soʻzlari bilan almashtirilsin.

23. 69-bandda:

uchinchi xatboshiga “Davlat xavfsizlik xizmati” soʻzlaridan oldin “Oʻzbekiston Respublikasi Milliy gvardiyasi” soʻzlari qoʻshilsin;

oʻn beshinchi xatboshiga “Favqulodda vaziyatlar vazirligi” soʻzlaridan keyin “Milliy gvardiyasi” soʻzlari qoʻshilsin.

24. Quyidagi mazmundagi 70¹ — 70¹²-bandlar qoʻshilsin:

“70¹. Ommaviy tadbirlarni oʻtkazishda quyidagilar Oʻzbekiston Respublikasi Milliy gvardiyasi boʻlinmalarining vazifalari hisoblanadi:

ichki ishlar organlari bilan birgalikda xizmat oʻtash va zarur boʻlganda ular faoliyatining jangovar himoyasini taʼminlash;

ichki ishlar organlariga ommaviy tadbirni oʻtkazish obyektiga tutash hududda jismoniy toʻsiq hosil qilish va ruxsat bilan kiritish tartibini amalga oshirishda, muhandislik-texnik vositalardan foydalangan holda obyektga borish yoʻllarini oʻrab olish chegaralarini hosil qilishda, shuningdek, avtotransport vositalarini koʻzdan kechirishda koʻmaklashish;

ommaviy tadbirlarni oʻtkazishda obyektning koʻrsatilgan joylarda zaxira kuchlari va vositalarining jangovar shay holatini taʼminlash;

terrorchilarni qoʻlga olish, zararsizlantirish va yoʻq qilish tadbirlarini amalga oshirishda ishtirok etish;

jamoat xavfsizligini taʼminlashda ichki ishlar organlarining boʻlinmalariga, boshqa manfaatdor vazirliklar hamda idoralarga koʻmaklashish.

Oʻzbekiston Respublikasi Milliy gvardiyasi boʻlinmalari qonun hujjatlariga muvofiq boshqa vazifalarni ham amalga oshirishi mumkin.

70². Ommaviy tadbirlarni oʻtkazishda quyidagilar Oʻzbekiston Respublikasi Milliy gvardiyasi boʻlinmalarining huquqlari hisoblanadi:

ommaviy tadbirni oʻtkazish obyektining hududini oʻrab olishda (qurshab olishda) ishtirok etish;

ichki ishlar organlari bilan birgalikda zaxira kuchlarini shakllantirish;

ommaviy tadbirni oʻtkazish obyektida favqulodda vaziyatlar yuzaga kelganda, manfaatdor vazirliklar va idoralar bilan birgalikda amaldagi maxsus rejalarga muvofiq zarur choralar koʻrish.

Oʻzbekiston Respublikasi Milliy gvardiyasi boʻlinmalari qonun hujjatlariga muvofiq boshqa huquqlarga ham ega boʻlishi mumkin.

70³. Ommaviy tadbirlarni oʻtkazishda quyidagilar Oʻzbekiston Respublikasi Davlat xavfsizligi xizmati boʻlinmalarining vazifalari hisoblanadi:

ommaviy tadbirni oʻtkazish obyektida va unga tutash hududda qoʻporuvchilik-terrorchilik harakati xavfi yoki bunday harakatni sodir etish xavfi yuzaga kelganligi toʻgʻrisidagi tezkor axborotni yigʻish va tahlil qilish, shuningdek, tezkor tusdagi tegishli axborotni huquqni muhofaza qiluvchi boshqa organlar bilan almashish;

ommaviy tadbirni oʻtkazish obyektida jinoiy maqsadlari boʻlgan shaxslarni aniqlash va ularning faoliyatiga chek qoʻyish boʻyicha tezkor-qidiruv chora-tadbirlarini amalga oshirish;

terrorchilarni qoʻlga olish, zararsizlantirish va yoʻq qilish chora-tadbirlarini amalga oshirishda ishtirok etish.

Oʻzbekiston Respublikasi Davlat xavfsizligi xizmati boʻlinmalari qonun hujjatlariga muvofiq boshqa vazifalarni ham amalga oshirishi mumkin.

70⁴. Ommaviy tadbirlarni oʻtkazishda quyidagilar Oʻzbekiston Respublikasi Davlat xavfsizligi xizmati boʻlinmalarining huquqlari hisoblanadi:

ichki ishlar organlari va boshqa huquqni muhofaza qilish organlaridan ommaviy tadbirni oʻtkazish obyektida va unga tutash hududda yuzaga kelgan tezkor holat toʻgʻrisidagi axborotni olish;

ommaviy tadbirni oʻtkazish obyektida jinoiy maqsadlari boʻlgan shaxslarni qoʻlga olish, zararsizlantirish va yoʻq qilish.

Oʻzbekiston Respublikasi Davlat xavfsizligi xizmati boʻlinmalari qonun hujjatlariga muvofiq boshqa huquqlarga ham ega boʻlishi mumkin.

70⁵. Ommaviy tadbirlarni oʻtkazishda quyidagilar Oʻzbekiston Respublikasi Favqulodda vaziyatlar vazirligi boʻlinmalarining vazifalari hisoblanadi:

favqulodda vaziyatlarni, shu jumladan yongʻinni keltirib chiqarishi mumkin boʻlgan xavf va tahdidlar omillarini oʻz vaqtida aniqlash, ularning profilaktikasini va yuzaga kelishining barvaqt oldi olinishini taʼminlash;

Favqulodda vaziyatlar vazirligi va Favqulodda vaziyatlarda ularning oldini olish va harakat qilish davlat tizimining (FVDT) kuchlari va vositalarini tabiiy va texnogen tusdagi favqulodda vaziyatlar, shu jumladan yongʻinlar yuzaga kelganda ularni bartaraf etish va qutqaruv ishlariga jalb qilish;

ommaviy tadbirlarni oʻtkazish davrida obyektda radiatsion, kimyoviy, biologik (bakteriologik) himoyani, yongʻinlarning oldini olish va qutqaruv (shu jumladan suvda qutqaruv) ishlarini amalga oshirish.

Oʻzbekiston Respublikasi Favqulodda vaziyatlar vazirligi boʻlinmalari qonun hujjatlariga muvofiq boshqa vazifalarni ham amalga oshirishi mumkin.

70⁶. Ommaviy tadbirlarni oʻtkazishda quyidagilar Oʻzbekiston Respublikasi Favqulodda vaziyatlar vazirligi boʻlinmalarining huquqlari hisoblanadi:

tabiiy va texnogen tusdagi favqulodda vaziyatlar, shu jumladan yongʻinlarning oldini olish maqsadida ommaviy tadbirni oʻtkazish obyektini oldindan tekshirish;

ommaviy tadbirni oʻtkazish vaqtida ommaviy tadbir obyektlari qutqaruv tuzilmalarining rahbarlari va shaxsiy tarkibini favqulodda vaziyatlarda harakat qilishga tayyorlash, ommaviy tadbirni oʻtkazish dasturida ishtirok etadigan artistlar, sportchilar va boshqa shaxslarga yuz berish ehtimoli yuqori boʻlgan favqulodda vaziyatlar yuzaga kelganda harakat qilish boʻyicha koʻrsatmalar berishga qaratilgan tadbirlarni tashkil qilish.

Oʻzbekiston Respublikasi Favqulodda vaziyatlar vazirligining boʻlinmalari qonun hujjatlariga muvofiq boshqa huquqlarga ham ega boʻlishi mumkin.

70⁷. Ommaviy tadbirlarni oʻtkazishda quyidagilar prokuratura organlarining vazifalari hisoblanadi:

ommaviy tadbirni oʻtkazish obyektida va unga tutash hududda yuzaga kelgan tezkor holat toʻgʻrisida ichki ishlar organlari, Oʻzbekiston Respublikasi Davlat xavfsizligi xizmati, Milliy gvardiyasi va Favqulodda vaziyatlar vazirligi bilan tezkor axborot almashish;

ommaviy tadbirni oʻtkazish davrida huquqbuzarlik sodir etgan shaxslarga nisbatan qonuniy choralar koʻrilganligini nazorat qilish;

ommaviy tadbirni oʻtkazish davrida yuzaga kelgan kutilmagan holatlarning (yongʻinlar, avariyalar va boshqalar) kelib chiqish omillari va sabablarini oʻrganish hamda oʻrganish natijalari boʻyicha aybdor shaxslarga nisbatan qonuniy choralar koʻrilishini taʼminlash.

Prokuratura organlari qonun hujjatlariga muvofiq boshqa vazifalarni ham amalga oshirishi mumkin.

70⁸. Ommaviy tadbirlarni oʻtkazishda quyidagilar prokuratura organlarining huquqlari hisoblanadi:

ichki ishlar organlari va huquqni muhofaza qiluvchi boshqa organlardan ommaviy tadbirni oʻtkazish obyektida va unga tutash boʻlgan hududda yuzaga kelgan tezkor holat toʻgʻrisida axborot olish;

ommaviy tadbirni oʻtkazish davrida huquqbuzarlikni sodir etgan shaxslarga nisbatan ichki ishlar organlari tomonidan tuzilgan hujjatlarning qonuniyligini oʻrganish;

ommaviy tadbirni oʻtkazish davrida kutilmagan holatlarning (yongʻinlar, avariyalar va boshqalar) yuzaga kelish omillari va sabablarini tekshirish, shuningdek, aybdor shaxslarga nisbatan tergov tadbirlarini oʻtkazish.

Prokuratura organlari qonun hujjatlariga muvofiq boshqa huquqlarga ham ega boʻlishi mumkin.

70⁹. Ommaviy tadbirlarni oʻtkazishda quyidagilar Oʻzbekiston Respublikasi Sogʻliqni saqlash vazirligi organlarining vazifalari hisoblanadi:

ommaviy tadbir ishtirokchilariga, jamoat tartibini himoya qilish va jamoat xavfsizligini taʼminlash tadbirlariga jalb qilingan xodimlar va harbiy xizmatchilarga tibbiy yordam koʻrsatish uchun doimiy tayyor holatni saqlash;

favqulodda vaziyatlarda jabrlanganlarga shoshilinch tibbiy va birinchi tibbiy-sanitariya yordamini koʻrsatish;

favqulodda vaziyatlar yuzaga kelganda, jabrlanganlarga tez tibbiy yordam koʻrsatishda ishtirok etish (avariya-qutqaruv xizmatlari bilan birgalikda).

Oʻzbekiston Respublikasi Sogʻliqni saqlash vazirligi organlari qonun hujjatlariga muvofiq boshqa vazifalarni ham amalga oshirishi mumkin.

70¹⁰. Ommaviy tadbirlarni oʻtkazishda quyidagilar Oʻzbekiston Respublikasi Sogʻliqni saqlash vazirligi organlarining huquqlari hisoblanadi:

ommaviy tadbirni oʻtkazish obyekti hududida tez tibbiy yordam brigadalarining navbatchiligini, jabrlanganlarning eng yaqin joydagi davolash muassasalariga shoshilinch yetkazilishini taʼminlash;

favqulodda vaziyatlarda jabrlanganlarni tibbiy muassasalarga vaqtincha joylashtirish va davolashni taʼminlash.

Oʻzbekiston Respublikasi Sogʻliqni saqlash vazirligi organlari qonun hujjatlariga muvofiq boshqa huquqlarga ham ega boʻlishi mumkin.

70¹¹. Ommaviy tadbirlarni oʻtkazishda quyidagilar Qoraqalpogʻiston Respublikasi Vazirlar Kengashi, viloyatlar va tumanlar (shaharlar) hamda Toshkent shahar hokimliklarining vazifalari hisoblanadi:

Qoraqalpogʻiston Respublikasi Vazirlar Kengashi, viloyatlar va tumanlar (shaharlar) hamda Toshkent shahar hokimliklari huzuridagi komissiyalarning faoliyatini va ularning ish reglamentini muntazam nazorat qilish;

jismoniy va yuridik shaxslar tomonidan ommaviy tadbirlar tegishli ruxsatnomalarni olmasdan oʻtkazilishi, shuningdek, ommaviy tadbirlar belgilangan talablarga javob bermaydigan obyektlarda oʻtkazilishining oldini olish;

komissiyalar tomonidan tuzilgan ishchi guruhlar aniqlagan kamchiliklarni ommaviy tadbirlarni oʻtkazish obyektlari maʼmuriyatlarining belgilangan muddatlarda bartaraf etishini nazorat qilish.

Qoraqalpogʻiston Respublikasi Vazirlar Kengashi, viloyatlar va tumanlar (shaharlar) hamda Toshkent shahar hokimliklari qonun hujjatlariga muvofiq boshqa vazifalarni ham amalga oshirishi mumkin.

70¹². Ommaviy tadbirlarni oʻtkazishda quyidagilar Qoraqalpogʻiston Respublikasi Vazirlar Kengashi, viloyatlar va tumanlar (shaharlar) hamda Toshkent shahar hokimliklarining huquqlari hisoblanadi:

ommaviy tadbirlarning belgilangan talablarga javob beradigan obyektlarda oʻtkazilishini taʼminlash;

ommaviy tadbir tashkilotchisi va (yoki) ommaviy tadbirni oʻtkazish obyektining maʼmuriyati tomonidan ushbu tadbirlarni oʻtkazish shartlarining buzilishiga yoʻl qoʻyilganda, komissiyalarga ommaviy tadbirlarni oʻtkazish shartlariga rioya etilishini tekshirish boʻyicha qonun hujjatlarida belgilangan tartibda topshiriqlar berish.

Qoraqalpogʻiston Respublikasi Vazirlar Kengashi, viloyatlar va tumanlar (shaharlar) hamda Toshkent shahar hokimliklari qonun hujjatlariga muvofiq boshqa huquqlarga ham ega boʻlishi mumkin”.

25. 1-ilovada:

2-bosqich “Subyektlar” ustunidagi “Toshkent shahar ichki ishlar bosh boshqarmasi, viloyatlar ichki ishlar boshqarmasi” soʻzlari “Toshkent shahar va Toshkent viloyati ichki ishlar boshqarmalari, viloyatlar ichki ishlar boshqarmalari va Oʻzbekiston Respublikasi Milliy gvardiyasining tegishli boʻlinmasi” soʻzlari bilan almashtirilsin;

2-bosqich “Tadbirlar” ustunining 2-bandidagi “Toshkent shahar ichki ishlar bosh boshqarmasi, viloyatlar ichki ishlar boshqarmalari” soʻzlari “Toshkent shahar va Toshkent viloyati ichki ishlar boshqarmalari, viloyatlar ichki ishlar boshqarmalari va Oʻzbekiston Respublikasi Milliy gvardiyasining tegishli boʻlinmasi” soʻzlari bilan almashtirilsin.

26. 4-ilova oʻz kuchini yoʻqotgan deb hisoblansin.