Oʻzbekiston Respublikasidagi aholi yashash joylarini, obyektlarni yongʻinga qarshi ishonchli himoya qilishni taʼminlash, shuningdek, yongʻin soqchiligini mustahkamlash maqsadida Vazirlar Mahkamasi qaror qiladi:

1. Belgilab qoʻyilsinki:

a) Oʻzbekiston Respublikasi Ichki ishlar vazirligining harbiylashtirilgan yongʻin soqchiligi alohida davlat ahamiyatiga ega boʻlgan yoki yongʻin chiqish va portlash xavfi koʻproq boʻlgan obyektlarda, shuningdek, aholisi 50 ming va undan ziyod boʻlgan shaharlar (roʻyxati ilova* qilinmoqda)da tashkil etiladi.

Tashkil etilayotgan harbiylashtirilgan yongʻin soqchiligining xodimlari soni va tuzilmasi tasdiqlangan xodimlar soni va ularni saqlash uchun budjetdan ajratilgan mablagʻlar doirasida Ichki ishlar vazirligi tomonidan belgilanadi;

b) Oʻzbekiston Respublikasi Ichki ishlar vazirligining professional yongʻin soqchiligi qolgan obyektlarda, shaharlarda, shahar koʻrinishidagi shaharchalarda, tumanlarning markazlarida va aholi yashaydigan boshqa joylarda tashkil etiladi.

Professional soqchilik tashkil etilishi lozim boʻlgan shaharlar, shahar koʻrinishidagi shaharchalar, tumanlarning markazlari hamda aholi yashash joylari roʻyxati va ushbu soqchilik xodimlari soni Oʻzbekiston Respublikasi Moliya vazirligi bilan kelishilgan holda Ichki ishlar vazirligi tomonidan belgilanadi (yiliga bir marta 1-sentabrda);

v) xalq xoʻjaligi obyektlarini yongʻindan saqlash (Mudofaa vazirligi, Milliy xavfsizlik xizmati va “Oʻzdavzaxira” qoʻmitasi obyektlari bundan mustasno) korxonalar, tashkilotlar, muassasalar rahbarlarining Ichki ishlar vazirligi organlari bilan tuziladigan shartnomalariga koʻra amalga oshiriladi.

Harbiylashtirilgan yoki professional yongʻin soqchiligi tashkil etilishi zarur boʻlgan xalq xoʻjaligi obyektlari roʻyxati va ushbu soqchilik xodimlari soni amaldagi normalar va qoidalar asosida Oʻzbekiston Respublikasi Ichki ishlar vazirligi tomonidan belgilanadi;

g) Ichki ishlar vazirligining yongʻin soqchiligini mablagʻ bilan taʼminlash uchun xarajatlar:

shaharlarni muhofaza qiluvchi harbiylashtirilgan yongʻin soqchiligi boʻyicha — Oʻzbekiston Respublikasi respublika budjeti hisobiga;

shaharlarni, shahar koʻrinishidagi shaharchalarni, tumanlar markazlarini muhofaza qiluvchi professional yongʻin soqchiligi boʻyicha — Oʻzbekiston Respublikasi respublika budjeti hisobiga;

sanoat korxonalarining va boshqa obyektlarning yongʻin xavfsizligini taʼminlovchi harbiylashtirilgan va professional yongʻin soqchiligi boʻyicha — tegishli korxonalar, tashkilotlar va muassasalar bilan tuziladigan shartnomalarga koʻra olinadigan mablagʻlar hisobiga amalga oshiriladi;

d) oʻt oʻchiruvchilar deposi qurilishi shaharlarda, shahar koʻrinishidagi shaharchalarda, tumanlarning markazlarida va aholi yashash joylarida shaharlar hamda tumanlar hokimliklarining ijroiya apparatlari tomonidan Qoraqalpogʻiston Respublikasi budjeti, viloyatlar va Toshkent shahar mahalliy budjetlari, kapital qoʻyilmalar rejasi boʻyicha budjetdan ajratiladigan mablagʻlar va oldini olish chora-tadbirlarini oʻtkazish uchun moʻljallangan davlat sugʻurtasi boʻyicha toʻlovlardan ushlab qolinadigan mablagʻlar hisobiga, shuningdek, ulush asosida obyektlar tomonidan ajratiladigan mablagʻlar hisobiga, sanoat va boshqa obyektlarda esa korxonalar, tashkilotlar va muassasalar tomonidan ajratiladigan oʻz mablagʻlari hisobiga amalga oshiriladi;

e) oʻt oʻchiruvchilar deposi binolaridan foydalanish va ularni jihozlash, oʻt oʻchirish, hisoblash va koʻpaytirish texnikalari, avtotransport, yonilgʻi-moylash materiallari, maxsus kiyim-bosh, aloqa vositalari, diagnostika apparatlari, jihozlar va yongʻindan saqlash boʻlinmalari uchun yongʻin-texnika asboblari sotib olish:

shaharlarda tashkil etiladigan harbiylashtirilgan yongʻin soqchiligi boʻyicha — Oʻzbekiston Respublikasi respublika budjeti hisobiga;

shaharlarda, shahar koʻrinishidagi shaharchalarda, tuman markazlarida va aholi yashash joylarida tashkil etiladigan professional yongʻin soqchiligi boʻyicha — shaharlar va tumanlar hokimliklari tomonidan ajratiladigan mablagʻlar hisobiga;

yongʻinga qarshi vositalari va avtomat signallari boʻlgan xalq xoʻjaligi obyektlarida tashkil etiladigan harbiylashtirilgan va professional yongʻin soqchiligi boʻyicha — tuzilgan shartnomalarga muvofiq korxonalar, tashkilotlar va muassasalarning mablagʻlari hisobiga amalga oshiriladi;

j) yongʻin soqchiligi boshqarmalari va boʻlimlari shtatiga — harbiylashtirilgan yongʻin soqchiligi boʻyicha;

yongʻin soqchiligi boshqarmalari va boʻlimlari shtatiga, shuningdek, davlat yongʻin nazorati boʻlimlari (boʻlinmalari, inspeksiyalari) shtatiga — professional yongʻin soqchiligiga rahbarlik qiluvchi qoʻshimcha xodimlar lavozimlarini joriy etish tegishli ravishda harbiylashtirilgan professional yongʻin soqchiligi xodimlari soni va ish haqi fondi hisobiga amalga oshiriladi, lekin u soqchilikning har bir turi xodimlari umumiy sonining 4 foizidan oshib ketmasligi kerak.

2. Oʻzbekiston Respublikasi Moliya vazirligi 1996-yildan boshlab Ichki ishlar vazirligiga mazkur qarordan kelib chiqadigan xarajatlar uchun mablagʻlar ajratishni nazarda tutsin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar, mulkchilik shakllaridan qatʼi nazar, korxonalar va tashkilotlar:

oʻt oʻchirish deposi binolarini qurish, rekonstruksiya qilish va mukammal tuzatish, xalq xoʻjaligi obyektlarini va aholi yashash joylarini yongʻin texnikasi, yongʻin-texnika jihozlari, yongʻinga qarshi himoya qurilmalari bilan taʼminlash va ularni soz holda saqlash yuzasidan chora-tadbirlar koʻrsinlar;

yongʻin xavfsizligi normalari va qoidalari talablarini bajarmaganlik va ularni buzganlik uchun rahbarlarni hamda mansabdor shaxslarni qattiq intizomiy javobgarlikka tortsinlar.

4. Oʻzbekiston SSR Ministrlar Sovetining 1966-yil 27-iyuldagi 384-son va 1977-yil 11-avgustdagi 525-son qarorlari oʻz kuchini yoʻqotgan deb hisoblansin.