Oʻzbekiston Respublikasi Budjet kodeksiga muvofiq, shuningdek, Oʻzbekiston Respublikasi Moliya vazirligining Yagona gʻazna hisobvaragʻidagi vaqtincha boʻsh mablagʻlarni joylashtirish jarayonlarini yagona tizimga oʻtkazish va undan foydalanish samaradorligini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Moliya vazirligi Gʻaznachiligi (keyingi oʻrinlarda Moliya vazirligi Gʻaznachiligi deb ataladi) Oʻzbekiston Respublikasi Moliya vazirligining Yagona gʻazna hisobvaragʻidagi vaqtincha boʻsh mablagʻlarni tijorat banklari depozitlariga joylashtirish boʻyicha yagona organ etib belgilansin.

2. Oʻzbekiston Respublikasi Moliya vazirligining Yagona gʻazna hisobvaragʻidagi vaqtincha boʻsh mablagʻlarni joylashtirish tartibi toʻgʻrisidagi nizom ilovaga muvofiq tasdiqlansin.

3. Belgilab qoʻyilsinki:

ilgari joylashtirilgan vaqtincha boʻsh mablagʻlar depozit muddati tugaguniga qadar tijorat banklarining depozit xisobvaraqlarida saqlanadi va depozit shartnomasida belgilangan muddatlarda qaytariladi;

davlat maqsadli jamgʻarmalari va budjetdan tashqari boshqa jamgʻarmalar, shuningdek budjet tashkilotlari vaqtincha boʻsh mablagʻlarni tijorat banklari depozitlariga oʻzlari mustaqil yoki oʻz xohishlari bilan Gʻaznachilik boʻlinmalariga buyurtmanomalar taqdim etish yoʻli bilan joylashtirishlari mumkin.

4. Oʻzbekiston Respublikasi Moliya vazirligi Gʻaznachiligi tomonidan vaqtincha boʻsh mablagʻlarni tijorat banklarining depozitlariga joylashtirish jarayonida inson omilini istisno etishni nazarda tutuvchi, vaqtincha boʻsh mablagʻlarni joylashtirish boʻyicha takliflarni elektron saralash uchun moʻljallangan va Markaziy bank hamda barcha tijorat banklarining ulanishini taʼminlovchi dasturiy mahsul ishlab chiqilayotganligi maʼlumot uchun qabul qilinsin.

5. Belgilab qoʻyilsinki, ushbu qarorning 4-bandida nazarda tutilgan dasturiy mahsulni ishlab chiqish va amaliyotga joriy qilish Oʻzbekiston Respublikasi Moliya vazirligining Axborot-hisoblash markazi tomonidan Oʻzbekiston Respublikasi Moliya vazirligi Gʻaznachiligi bilan birgalikda amalga oshiriladi.

6. Vazirlar Mahkamasining “Oʻzbekiston Respublikasi Budjet kodeksini amalga oshirishga doir normativ-huquqiy hujjatlarni tasdiqlash toʻgʻrisida” 2015-yil 22-maydagi 135-son qarori oʻz kuchini yoʻqotgan deb hisoblansin (Oʻzbekiston Respublikasi QT, 2015-y., 5-son, 40-modda).

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Oʻzbekiston Respublikasi Moliya vaziri J.A. Qoʻchqorov zimmasiga yuklansin.

1. Ushbu Nizom Oʻzbekiston Respublikasi Moliya vazirligi Gʻaznachiligi tomonidan (keyingi oʻrinlarda Moliya vazirligining Gʻaznachiligi deb ataladi) tomonidan Oʻzbekiston Respublikasi Moliya vazirligining Yagona gʻazna hisobvaragʻidagi vaqtincha boʻsh mablagʻlarni (keyingi oʻrinlarda vaqtincha boʻsh mablagʻlar deb ataladi) tijorat banklari depozitlariga joylashtirish tartibini va ularni joylashtirishdan olingan daromadlardan foydalanish yoʻnalishlarini belgilaydi.

Vaqtincha boʻsh mablagʻlarni joylashtirish va ularni tijorat banklarining depozitlariga joylashtirishdan olingan daromadlardan foydalanish ushbu Nizomga ilovaga muvofiq sxema boʻyicha amalga oshiriladi.

2. Ushbu Nizomning amal qilishi Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining qabul qilingan qarorlariga muvofiq ajratiladigan budjet ssudalari va texnik koʻmaklashish mablagʻlariga tatbiq etilmaydi.

3. Pul-kredit va soliq-budjet siyosati sohasidagi harakatlar muvofiqlashtirilishini taʼminlash maqsadida Moliya vazirligi Gʻaznachiligi kelgusi chorak uchun oylar boʻyicha tijorat banklarining depozitlariga joylashtirilishi rejalashtirilayotgan vaqtincha boʻsh mablagʻlar hajmi toʻgʻrisidagi maʼlumotni Oʻzbekiston Respublikasi Markaziy bankiga (keyingi oʻrinlarda Markaziy bank deb ataladi) taqdim etadi.

Moliya vazirligi Gʻaznachiligi tomonidan taqdim etiladigan maʼlumotdan kelib chiqib Markaziy bank joylashtiriladigan boʻsh pul mablagʻlarining maksimal hajmi va minimal foiz stavkasini aniqlaydi hamda bu haqda Moliya vazirligi Gʻaznachiligini xabardor qiladi. Zarurat boʻlganda ushbu koʻrsatkichlar oylik va choraklik asosda aniqlashtiriladi.

4. Iqtisodiyotda inflyatsiya xatarlari vujudga kelgan taqdirda Markaziy bank bu haqda Moliya vazirligi Gʻaznachiligini xabardor qiladi. Markaziy bankning xabarnomasi Moliya vazirligi Gʻaznachiligi tomonidan vaqtincha boʻsh mablagʻlarni tijorat banklari depozitlariga joylashtirilishini toʻxtatib turish uchun asos hisoblanadi.

5. Tijorat banklarining depozitlariga vaqtincha boʻsh mablagʻlarni joylashtirishda tijorat banklariga qoʻyiladigan asosiy talablar quyidagilar hisoblanadi:

har yillik tashqi audit ijobiy xulosasining mavjudligi;

tijorat bankida Moliya vazirligi Gʻaznachiligi tomonidan ilgari joylashtirilgan depozitlar boʻyicha muddati oʻtkazib yuborilgan qarzdorlikning yoʻqligi.

6. Moliya vazirligi Gʻaznachiligi zaruriyat boʻlganda tijorat banklaridan ularning moliyaviy holati toʻgʻrisidagi axborotni soʻrashi mumkin.

7. Ushbu Nizomning 5-bandida koʻrsatilgan talablarga javob beruvchi, vaqtincha boʻsh mablagʻlar depozitlariga joylashtirilishi mumkin boʻlgan tijorat banklarini aniqlash boʻyicha tanlov Moliya vazirligi Gʻaznachiligi tomonidan Oʻzbekiston Respublikasi Moliya vazirligining tegishli axborot tizimida (keyingi oʻrinlarda axborot tizimi deb ataladi) eʼlon joylashtirish yoʻli oʻtkaziladi.

8. Davlat maqsadli jamgʻarmalari va budjetdan tashqari boshqa jamgʻarmalar, shuningdek, budjet tashkilotlari vaqtincha boʻsh mablagʻlarni tijorat banklari depozitlariga oʻzlari mustaqil yoki oʻz xohishlari bilan Gʻaznachilik boʻlinmalariga buyurtmanomalar taqdim etish yoʻli bilan joylashtirishlari mumkin.

9. Buyurtmanomada depozitga joylashtirish uchun vaqtincha boʻsh mablagʻlar hajmi va joylashtirish muddati majburiy tartibda koʻrsatiladi.

10. Oʻzbekiston Respublikasi Davlat budjeti mablagʻlari tijorat banklari depozitlariga bir moliya yili doirasida joylashtiriladi.

Davlat maqsadli jamgʻarmalari va budjetdan tashqari boshqa jamgʻarmalar, shuningdek, budjet tashkilotlarining budjetdan tashqari mablagʻlari tijorat banklari depozitlariga 12 oygacha muddatga joylashtiriladi.

11. Moliya vazirligi Gʻaznachiligi tanlov boshlanishidan kechi bilan bir kun avval tanlov ishtirokchilariga qoʻyiladigan talablar, mablagʻ hajmi, minimal foiz stavkasi, depozit muddati, tanlovning tugash sanasi, vaqti va tanlov boʻyicha boshqa talablarni koʻrsatgan holda eʼlon joylashtiradi.

12. Tanlov axborot tizimi tomonidan har bir eʼlon boʻyicha oʻtkaziladi hamda depozit summasi va tanlov shartlarida koʻrsatilgan muddat boʻyicha eng yuqori daromad foizini taklif etgan tijorat banki tanlov gʻolibi hisoblanadi.

Bunda tanlov ishtirokchilari tomonidan bir xil foiz stavkalari va shartlar taklif etilgan hollarda birinchi boʻlib tegishli taklif bergan tijorat banki ishtirokchilar orasida gʻolib boʻladi.

13. Alohida hollarda Oʻzbekiston Respublikasi Prezidenti yoki Oʻzbekiston Respublikasi Hukumatining tegishli qarorlariga asosan vaqtincha boʻsh mablagʻlar tanlov oʻtkazilmasdan joylashtirilishi mumkin.

14. Ushbu Nizomning 5-bandi talablariga javob bermaydigan hamda moliyaviy holati Moliya vazirligi Gʻaznachiligi tomonidan qoniqarsiz deb topilgan tijorat banklari tanlovlarda ishtirok etishiga yoʻl qoʻyilmaydi.

15 Vaqtincha boʻsh mablagʻlar tijorat banklarining depozitlariga belgilangan tartibda Moliya vazirligi Gʻaznachiligi hamda tegishli tijorat banki oʻrtasida tuziladigan depozit shartnomasi (keyingi oʻrinlarda shartnoma deb ataladi) asosida joylashtiriladi.

16. Shartnoma axborot tizimi orqali avtomatik tarzda shakllantiriladi, Moliya vazirligi Gʻaznachiligi va tanlov gʻolibi tomonidan imzolanadi va Moliya vazirligi Gʻaznachiligida roʻyxatdan oʻtkazilganidan soʻng kuchga kiradi.

Bunda shartnoma vakolatli shaxsning elektron raqamli imzosidan foydalangan holda elektron shartnoma shaklida tuzilishi mumkin.

17. Elektron raqamli imzodan foydalangan holda elektron shartnoma tuzishda elektron raqamli imzoning haqiqiyligini tekshirish axborot tizimi tomonidan amalga oshiriladi.

18. Oʻzbekiston Respublikasi Davlat budjetining vaqtincha boʻsh mablagʻlarini tijorat banklarining depozitlariga joylashtirishdan olingan daromadlar quyidagi tartibda taqsimlanadi:

80 foizi — Oʻzbekiston Respublikasining respublika budjeti daromadiga;

20 foizi — Oʻzbekiston Respublikasi moliya tizimini ijtimoiy rivojlantirish va xodimlarni moddiy ragʻbatlantirish jamgʻarmasiga.

Bunda vaqtincha boʻsh mablagʻlarni joylashtirishdan Oʻzbekiston Respublikasi Oʻzbekiston Respublikasi moliya tizimini ijtimoiy rivojlantirish va xodimlarni moddiy ragʻbatlantirish jamgʻarmasiga olingan daromadlardan foydalanish faqat Oʻzbekiston Respublikasi moliya vazirining qarori boʻyicha amalga oshiriladi.

19. Davlat maqsadli jamgʻarmalari va budjetdan tashqari boshqa jamgʻarmalar, shuningdek, budjet tashkilotlarining vaqtincha boʻsh mablagʻlarini tijorat banklari depozitlariga joylashtirishdan olingan daromadlar, ikki ish kuni mobaynida toʻliq ularning tegishli gʻazna hisobvaraqlariga oʻtkaziladi.

20. Vaqtincha boʻsh mablagʻlarni tijorat banklari depozitlariga joylashtirishdan olingan daromadlardan foydalanish qonun hujjatlariga muvofiq amalga oshiriladi.

21. Tijorat banklarining depozitlariga joylashtirilgan mablagʻlarni qaytarish va ular boʻyicha foizlarni toʻlash shartnomada belgilangan tartibda va muddatlarda amalga oshiriladi.

Zarurat boʻlganda Moliya vazirligi Gʻaznachiligi tijorat banklarining depozitlariga joylashtirilgan mablagʻlar muddatidan avval qaytarilishini talab qilishi mumkin. Muddatidan avval qaytarish shartlari shartnomada belgilanadi.

22. Tijorat banklari depozitlariga joylashtirilgan vaqtincha boʻsh mablagʻlar, shu jumladan, foizlar oʻz vaqtida qaytarilmagan taqdirda Moliya vazirligi Gʻaznachiligi shartnomaga muvofiq:

shartnomada belgilangan tartibda qarzdorlikni undiradi;

har bir kechiktirilgan kun uchun muddati oʻtkazib yuborilgan qarz summasining 0,033 foizi miqdorida penya hisoblaydi.

23. Penya hisobiga kelib tushgan mablagʻlar Oʻzbekiston Respublikasi Moliya vazirligining maxsus jamgʻarmasiga oʻtkaziladi.