Oʻzbekiston Respublikasining “Soliq maslahati toʻgʻrisida”gi Qonuni 13-moddasiga muvofiq buyuraman:

1. Oʻzbekiston Respublikasi moliya vazirining 2012-yil 28-maydagi 44-son “Soliq maslahati milliy standarti (2-sonli SMMS) “Soliq maslahati boʻyicha hisobot tuzish va mijozga (ishonch bildiruvchiga) taqdim etish tartibi”ni tasdiqlash toʻgʻrisida”gi buyrugʻiga (roʻyxat raqami 2375, 2012-yil 28-iyun) (Oʻzbekiston Respublikasi qonun hujjatlari toʻplami, 2012-y., 26-27-son, 299-modda) ilovaga muvofiq oʻzgartirish va qoʻshimchalar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. Buyruqning nomi va 1-bandi “soliq maslahati boʻyicha hisobot” degan soʻzlardan keyin “va soliq maslahatchilari tashkilotining xulosasini” degan soʻzlar bilan toʻldirilsin.

2. Milliy standartda:

a) nomi va 1-band “soliq maslahati boʻyicha hisobot” degan soʻzlardan keyin “va soliq maslahatchilari tashkilotining xulosasini” degan soʻzlar bilan toʻldirilsin;

b) 9-band quyidagi tahrirda bayon etilsin:

“9. Hisobotning har bir beti soliq maslahatini amalga oshirgan soliq maslahatchisi tomonidan imzolanadi, hisobot soliq maslahatchilari tashkiloti rahbarining imzosi va mazkur tashkilotning muhri bilan (muhr mavjud boʻlgan taqdirda) tasdiqlanadi.”;

v) quyidagi tahrirdagi III¹ va III² boblar bilan toʻldirilsin:

“III¹ bob. Soliq maslahatchilari tashkilotining xulosasi

12¹. Soliq maslahatchilari tashkilotining xulosasi (keyingi oʻrinlarda xulosa deb yuritiladi) soliq maslahatchilari tashkilotining soliqlar va boshqa majburiy toʻlovlarni hisoblab chiqarish, toʻlash, soliq solish bilan bogʻliq boʻlgan obyektlarni aniqlash va hisobini yuritish toʻgʻrisidagi fikrini oʻz ichiga oluvchi yozma shaklda ifodalangan hujjatdir.

Xulosa hisobot asosida tuziladi.

12². Xulosa erkin shaklda tuziladi va majburiy tartibda quyidagilarni oʻz ichiga olishi lozim:

nomi — “Soliq maslahatchilari tashkilotining xulosasi”;

mijozning (ishonch bildiruvchining) manzili, nomi yoki F.I.O.;

tuzilayotgan xulosaga asos boʻlgan hisobot sanasi;

shartnomani bajarishda ishtirok etgan soliq maslahatchisi(lari) toʻgʻrisida maʼlumotlar (F.I.O., soliq maslahatchisi sertifikatining raqami va berilgan sanasi).

12³. Xulosada soliq maslahatchilari tashkilotining shartnoma predmeti boʻyicha asoslangan fikri aniq bayon etilishi kerak.

III² bob. Xulosani tuzish va mijozga (ishonch bildiruvchiga) taqdim etish

12⁴. Xulosa soliq maslahatchisi (soliq maslahatchilari), soliq maslahatchilari tashkilotining rahbari tomonidan imzolanishi va mazkur tashkilotning muhri bilan (muhr mavjud boʻlgan taqdirda) tasdiqlanishi kerak.

12⁵. Xulosa mijozga (ishonch bildiruvchiga) shartnomada belgilangan muddatlarda shaxsan olib borib berish, pochtadan buyurtma xat orqali yoki elektron hujjat tarzida taqdim etiladi.”;

g) IV bobning nomi quyidagi tahrirda bayon etilsin:

“IV bob. Hisobot va xulosaning mazmuni uchun javobgarlik”;

d) 16-band “hisobot” soʻzidan keyin “va xulosa” degan soʻzlar bilan toʻldirilsin.