“Ichki ishlar organlari to‘g‘risida”gi O‘zbekiston Respublikasi Qonuniga muvofiq O‘zbekiston Respublikasi Adliya vazirligi va Ichki ishlar vazirligi qaror qiladi:

1. O‘zbekiston Respublikasi Adliya vazirligi va Ichki ishlar vazirligining 2007-yil 12-yanvardagi 2/1, 2-son qarori (ro‘yxat raqami 1654, 2007-yil 15-yanvar) (O‘zbekiston Respublikasi qonun hujjatlari to‘plami, 2007-y., 3-son, 30-modda) bilan tasdiqlangan Sudga kelishdan bosh tortgan shaxslarni majburiy keltirish bo‘yicha sud topshiriqlarini ijro etish tartibi to‘g‘risidagi yo‘riqnomaning 12-bandi quyidagi tahrirda bayon etilsin:

“12. Qonuniy talablarga qarshilik ko‘rsatilganda yoki ashaddiy bo‘ysunmaslik holatlarida ichki ishlar organlari xodimlari “Ichki ishlar organlari to‘g‘risida”gi O‘zbekiston Respublikasi Qonuniga muvofiq jismoniy kuch, maxsus vosita va o‘qotar qurolni qo‘llash huquqiga ega. Mazkur holda bayonnoma tuziladi va unda huquqbuzarlikning xususiyati, vaqti va joyi hamda shaxsga nisbatan qo‘llanilgan choralar ko‘rsatiladi. Bayonnoma qonunda nazarda tutilgan choralar qo‘llanilganligi to‘g‘risidagi bildirgi bilan birga ichki ishlar organi bo‘lim boshlig‘iga taqdim etiladi. Bu haqda ajrimi bo‘yicha majburiy keltirish amalga oshirilgan sudya xabardor qilinadi.

Jismoniy kuch ishlatilganligi va maxsus vositalar qo‘llanilganligi natijasida jismoniy yoxud yuridik shaxslarning hayotiga, sog‘lig‘iga yoki mol-mulkiga zarar yetkazilgan har bir holat haqida, shuningdek o‘qotar qurol qo‘llanilgan barcha hollar to‘g‘risida prokurorga darhol xabar beriladi”.

2. Mazkur qaror O‘zbekiston Respublikasi Oliy sudi bilan kelishilgan.

3. Mazkur qaror 2017-yil 17-martdan kuchga kiradi.