Maktabgacha bolalar muassasalari faoliyati samaradorligini oshirish, maktabgacha taʼlim tizimida raqobat muhitini yaratish, Kadrlar tayyorlash milliy dasturiga muvofiq maktabgacha yoshdagi bolalarni tarbiyalash va har tomonlama kamol toptirish uchun shart-sharoitlarni takomillashtirish maqsadida Vazirlar Mahkamasi qaror qiladi:

1. Toshkent shahar hokimligi, Oʻzbekiston Respublikasi Davlat mulki qoʻmitasi va Moliya vazirligining davlat maktabgacha bolalar muassasalari bilan bir qatorda tijorat asosida faoliyat koʻrsatuvchi, davlatga qarashli boʻlmagan maktabgacha bolalar muassasalari tarmogʻini kengaytirish toʻgʻrisidagi takliflari maʼqullansin.

2. Belgilansinki:

davlatga qarashli boʻlmagan maktabgacha bolalar muassasalari oʻz ustav jamgʻarmasini muassislarning mablagʻlari hisobiga shakllantiradi, har xil tashkiliy-huquqiy shakllarda tashkil etiladi va amaldagi qonun hujjatlariga muvofiq faoliyat koʻrsatadi;

davlatga qarashli boʻlmagan maktabgacha bolalar muassasalari belgilangan tartibga muvofiq xususiylashtiriladigan davlat maktabgacha muassasalari negizida ham tashkil etilishi mumkin;

tugatilayotgan davlat maktabgacha bolalar muassasalarining boʻshayotgan binolari va inshootlari mavjud jihozlari va asbob-uskunalari bilan birgalikda, keyinchalik sotib olish huquqi bilan 3 yilgacha muddatga ijara haqi undirmasdan, davlatga qarashli boʻlmagan maktabgacha bolalar muassasalariga ijaraga berilishi mumkin.

3. Davlatga qarashli boʻlmagan maktabgacha bolalar muassasalarining ishlab turgan davlat maktabgacha bolalar muassasalari tarkibi va hududida, shuningdek boshqa davlat maktabgacha bolalar muassasalariga ega boʻlmagan aholi yashash joylaridagi ishlab turgan davlat maktabgacha muassasalari oʻrniga tashkil etilishiga yoʻl qoʻyilmaydi.

4. Oʻzbekiston Respublikasi Xalq taʼlimi vazirligi Sogʻliqni saqlash vazirligi, Moliya vazirligi, Adliya vazirligi, boshqa manfaatdor vazirliklar va idoralar bilan birgalikda Davlatga qarashli boʻlmagan maktabgacha bolalar muassasasi (tashkiloti) toʻgʻrisida Nizomni bir oy muddatda ishlab chiqsin va Vazirlar Mahkamasiga tasdiqlash uchun kiritsin, unda ularni tashkil etish tartibini, ularning tashkiliy-huquqiy maqomini, tegishli davlat standartlarini taʼminlash boʻyicha asosiy talablarni, koʻrsatiladigan xizmatlar uchun haq toʻlash tartibini, mablagʻ bilan taʼminlash mexanizmini va boshqalarni nazarda tutsin.

5. Xizmat koʻrsatiladigan bolalarning sifatli ovqatlantirilishini tashkil etish uchun davlatga qarashli boʻlmagan maktabgacha bolalar maktabgacha muassasalariga olinadigan daromadlarning 15 foizgachasini chakana savdo tarmoqlaridan va dehqon bozorlaridan naqd pulga oziq-ovqat mahsulotlari sotib olishga sarflash huquqi berilsin.

6. Tashkil etilayotgan davlatga qarashli boʻlmagan maktabgacha bolalar muassasalari barcha turdagi soliqlar va majburiy toʻlovlardan (Pensiya jamgʻarmasiga ajratmalardan tashqari) ular davlat roʻyxatidan oʻtkazilgan vaqtdan boshlab uch yil muddatga ozod qilinsin, koʻrsatib oʻtilgan mablagʻlar ularning moddiy-texnika bazasini mustahkamlashga, asbob-uskunalar va jihozlar, didaktik materiallar, bolalar oʻyinchoqlari va adabiyotlari sotib olish uchun maqsadli sarflansin.

7. Oʻzbekiston Respublikasi Moliya vazirligi yuqorida belgilangan soliq imtiyozlaridan foydalanuvchi davlatga qarashli boʻlmagan maktabgacha bolalar muassasalari xizmatlari uchun toʻlov miqdorlarining deklaratsiya qilinishini taʼminlasin.

8. Quyidagilarga:

Oʻzbekiston Respublikasi Xalq taʼlimi vazirligiga davlatga qarashli boʻlmagan maktabgacha bolalar muassasalarini rivojlantirish, ularning faoliyat koʻrsatish huquqiga litsenziyalarni belgilangan tartibda rasmiylashtirish boʻyicha ishlarni muvofiqlashtirib borish, shuningdek ularga uslubiy yordam koʻrsatish hamda ularning bolalar tarbiyasi va taʼlimi sohasidagi davlat standartlariga rioya etishlarini nazorat qilish funksiyasi;

Oʻzbekiston Respublikasi Sogʻliqni saqlash vazirligiga davlatga qarashli boʻlmagan maktabgacha bolalar muassasalarida davlat standartlariga muvofiq sanitariya, gigiyena va salomatlikni mustahkamlash darajasi ustidan tibbiy kuzatuv va nazoratni taʼminlash funksiyasi yuklansin.

9. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

davlatga qarashli boʻlmagan maktabgacha bolalar muassasalarini tashkil etishga amaldagi qonun hujjatlari doirasida har tomonlama koʻmaklashsinlar;

Oʻzbekiston Respublikasi Davlat mulki qoʻmitasi, Moliya vazirligi bilan birgalikda ishlab turgan davlat maktabgacha bolalar muassasalarining joylashuvini va bolalar bilan toʻldirilganligini, ularning bir qismini keyinchalik sotish yoki yangidan tashkil etilayotgan maktabgacha bolalar muassasalariga ijaraga berish uchun aniqlab olish maqsadida budjet mablagʻlaridan foydalanishning samaradorligini puxta oʻrganib chiqsinlar;

davlat taʼminoti muassasalari uchun xaridlarning umumiy hajmini aniqlashda davlatga qarashli boʻlmagan maktabgacha bolalar muassasalarining oziq-ovqat mahsulotlariga boʻlgan ehtiyojlarini hisobga olsinlar va davlatga qarashli boʻlmagan maktabgacha bolalar muassasalari tomonidan davlat taʼminoti tizimining savdo korxonalari tarmoqlari, shuningdek chakana savdo tarmoqlari orqali naqdinasiz hisob-kitob boʻyicha mayda ulgurji tartibda oziq-ovqat mahsulotlari sotib olish imkoniyatini taʼminlasinlar.

10. Oʻzbekiston Respublikasi Vazirlar Mahkamasining 1997-yil 14-avgustdagi 397-son qaroriga 1-ilovaning 1.2-bandi 3-xatboshidagi ikkinchi jumla quyidagi tahrirda bayon qilinsin:

“Asosiy oziq-ovqat mahsulotlarini xarid qilish hajmini aniqlashda davlat taʼminoti muassasalari tarkibiga davlatga qarashli boʻlmagan maktabgacha bolalar muassasalari, shuningdek tegishli muassasalar balansida turadigan korxonalar bilan kelishgan holda budjetdan tashqari mablagʻlar hisobiga mablagʻ bilan taʼminlanadigan idoralarga qarashli maktabgacha bolalar, oʻquv va davolash muassasalari kiritilishi mumkin”.

11. Oʻzbekiston Respublikasi Adliya vazirligi Oʻzbekiston Respublikasi Moliya vazirligi, Xalq taʼlimi vazirligi va Sogʻliqni saqlash vazirligi bilan birgalikda bir oy muddatda amaldagi qonun hujjatlariga ushbu qarordan kelib chiqadigan oʻzgartirishlar va qoʻshimchalar toʻgʻrisida taklif kiritsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari B.S. Hamidov va H.S. Karomatov zimmasiga yuklansin.