Tovar aylanishini hisobga olishni tartibga solish va naqd pulning bank muassasalariga tushishini ta’minlash, emissiyani qisqartirish va naqd pulning bankdan tashqari muomalada bo‘lishiga qarshi kurashni kuchaytirish, shuningdek iste’mol tovarlariga chakana narxlarning asossiz ravishda o‘sishini to‘xtatish maqsadida Vazirlar Mahkamasi qapop qiladi:

1. Qoraqalpog‘iston Respublikasi Vazirlar Kengashi, viloyatlar, shaharlar va tumanlar hokimliklari, O‘zbekiston Respublikasi Davlat soliq qo‘mitasi, tijorat banklariga ular savdo korxonalari va tashkilotlari ro‘yxatdan o‘tkazilishi va ularning schyotlarini ochilishini zarur darajada nazorat qilmayotganligi, natijada chakana narxlarni sun’iy ravishda ko‘tarayotgan savdo-vositachilik tuzilmalari tashkil etilayotganligi ko‘rsatib o‘tilsin.

2. Belgilansinki:

yuridik shaxslar tomonidan o‘zlari ishlab chiqargan tovarlarni boshqa yuridik shaxslarga va yakka tartibdagi tadbirkorlarga sotish qonunchilikka muvofiq naqd pulda yoki naqd pulsiz tartibda, shuningdek, bank korporativ kartalari orqali amalga oshirilishi mumkin. Bunda, o‘zaro hisob-kitoblar bitta shartnoma doirasida respublikada belgilangan bazaviy hisoblash miqdorining 100 baravarigacha naqd pulda nazorat-kassa mashinalaridan foydalangan holda amalga oshirilishiga ruxsat etiladi;

naqd pul tushumlari belgilangan tartibda inkassatsiya qilinadi (banklarga topshiriladi);

yuridik shaxslar — iste’mol tovarlari ishlab chiqaruvchilar o‘zlari ishlab chiqargan tovarlarni chakana sotishni o‘z firma do‘konlari, shu jumladan, ishlab chiqarish joyida tashkil etilgan o‘z firma do‘konlari yoki o‘zlariga tegishli bo‘lgan yoxud belgilangan tartibda ijaraga olingan turg‘un savdo shahobchalari orqali, faqat belgilangan namunalardagi nazorat-kassa mashinalaridan, qonunchilikda nazarda tutilgan hollarda esa onlayn nazorat-kassa mashinalari yoki virtual kassadan, to‘lovlarni plastik kartochkalar bo‘yicha qabul qilish hisob-kitob terminallaridan foydalangan holda amalga oshirishlari mumkin.

3. Vazirlar Mahkamasining Iste’mol bozori kompleksi O‘zbekiston Respublikasi Davlat soliq qo‘mitasi, Moliya vazirligi huzuridagi Monopoliyadan chiqarish va raqobatni rivojlantirish qo‘mitasi, Adliya vazirligi bilan birgalikda:

tovarlarni mayda ulgurji sotish tartibi va normativlarini;

ulgurji bozorlarda yuridik shaxslar va yakka tartibda savdo faoliyati bilan shug‘ullanuvchi jismoniy shaxslar tomonidan tovarlarni ulgurji va mayda ulgurji sotish tartibini, bunda tovarlarni mayda ulgurji sotish bilan yakka tartibda shug‘ullanuvchi jismoniy shaxslarni ro‘yxatdan o‘tkazish, ularga soliq solish, ulgurji va mayda ulgurji operatsiyalardan olinadigan tushumni hisobga olish va topshirish xususiyatlarini nazarda tutgan holda, ikki hafta muddatda ishlab chiqsin va tasdiqlash uchun Vazirlar Mahkamasiga kiritsin.

4. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bir oy muddatda:

chakana va ulgurji savdo bozorlarini oziq-ovqat va nooziq-ovqat tovarlari yo‘nalishlari bo‘yicha ajratish;

O‘zbekiston Respublikasi Davlat soliq qo‘mitasi bilan birgalikda hamma joyda kassa apparatlari o‘rnatishni va ulardan foydalanishni nazarda tutgan holda ulgurji buyum bozorlarida tovarlarni ulgurji va mayda ulgurji sotish bilan shug‘ullanuvchi jismoniy va yuridik shaxslarning tovarlari aylanishini hisobga olish uchun shart-sharoitlar yaratish;

vakolatli tijorat banklari bilan birgalikda ulgurji bozorlarda tovarlarni ulgurji va mayda ulgurji sotishdan yuridik va jismoniy shaxslar tomonidan olinadigan naqd pul tushumini qabul qilish punktlari tashkil etish chora-tadbirlarini ko‘rsinlar.

5. Mazkur qarorda ko‘rsatilgan chora-tadbirlarga rioya etilishi uchun shaxsiy javobgarlik Davlat soliq qo‘mitasi va hududiy soliq organlarining birinchi rahbarlariga yuklansin.

6. Mazkur qarorning bajarilishini nazorat qilish Bosh vazir o‘rinbosari M.Z. Usmonov, Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari zimmasiga yuklansin.