Respublikada sogʻliqni saqlash tizimini isloh qilish tadbirlari izchil amalga oshirilishi natijasida aholi sogʻligʻini saqlash va mustahkamlashga yoʻnaltirilgan qonunchilik bazasi shakllantirildi. Qishloq vrachlik punktlaridan tortib respublika ixtisoslashtirilgan tibbiyot markazlarigacha barcha darajalarni qamrab oluvchi aholiga tibbiy-profilaktik yordam berishning yaxlit tashkiliy tuzilmasi tashkil etildi.

Sanitariya-epidemiologiya masalalarida aholining xotirjamligini taʼminlash yuzasidan amalga oshirilayotgan chora-tadbirlar natijasida respublikada alohida oʻta xavfli yuqumli kasalliklar chetdan kirib kelishining oldi olindi, chaqaloqlarning poliomiyelit, difteriya, qizilcha, qoqshol kasalliklari qayd etilmayapti. Bolalarni rejali emlash bilan qamrab olish 98,3 foizni tashkil etdi.

Shu bilan birga, Oʻzbekiston Respublikasi Sogʻliqni saqlash vazirligi va Davlat sanitariya-epidemiologiya xizmati, shuningdek ularning hududiy boʻlinmalari, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari tomonidan “Fuqarolarning sogʻligʻini saqlash toʻgʻrisida” va “Davlat sanitariya nazorati toʻgʻrisida”gi Oʻzbekiston Respublikasi qonunlari talablari toʻliq hajmda bajarilishi taʼminlanmayapti.

Rahbarlik usullarini takomillashtirish, sanitariya-epidemiologiya xizmati faoliyatini muvofiqlashtirish, uning moddiy-texnika bazasini nazorat qilish va kadrlar salohiyatini mustahkamlashning ahvoli, shuningdek sanitariya-epidemiologiya masalalarida aholining xotirjamligini taʼminlash yuzasidan amalga oshirilayotgan chora-tadbirlar oʻsib borayotgan zamonaviy talablarga javob bermaydi.

Sanitariya-epidemiologiya nazorati markazlarining moddiy-texnika bazasini tahlili maxsus laboratoriyalarning zamonaviy asbob-uskunalar bilan jihozlanganligi 60 — 70 foizni tashkil etishini koʻrsatdi.

Sanitariya-epidemiologiya xizmati rahbar kadrlarini tanlash tizimida, birinchi navbatda ularning malakasi yetarlicha emasligi va qoʻyiladigan talablarga nomuvofiqligi bilan bogʻliq jiddiy kamchiliklar va nuqsonlar mavjud. Sanitariya-epidemiologiya xizmatining vrach kadrlar bilan taʼminlanganligi 84,4 foizni tashkil etadi. Vrachlar umumiy sonining 45 foizi malaka toifasiga ega emas, shu jumladan rahbar xodimlar orasida ushbu koʻrsatkich 30 foizni tashkil etadi. Lavozim mavqeyini suiisteʼmol qilish va oʻz kasbi bilan bogʻliq vazifalarga sovuqqonlik bilan qarash kabi salbiy holatlar bartaraf etilmagan.

Sogʻliqni saqlash tizimini isloh qilishni yanada chuqurlashtirish, sanitariya-epidemiologiya masalalarida aholining xotirjamligini taʼminlash, boshqaruvning ilgʻor shakllari va usullarini joriy etish, yuksak kasbiy va maʼnaviy-axloqiy fazilatlarga ega boʻlgan, zamonaviy axborot-kommunikatsiya texnologiyalarini egallagan, zamonaviy talablarga javob beradigan yuqori malakali kadrlarni tanlash va ular bilan toʻliq taʼminlash masalalarida davlat sanitariya-epidemiologiya nazorati markazlari faoliyati samaradorligini oshirish maqsadida Vazirlar Mahkamasi qaror qiladi:

1. Shunday tartib oʻrnatilsinki, unga muvofiq:

ish beruvchilar Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasining (keyingi oʻrinlarda — Sanepidqoʻm) Qoraqalpogʻiston Respublikasi, viloyatlar va Toshkent shahar boshqarmalari, tumanlar va shaharlar boʻlimlari boshliqlari bilan 5 yildan ortiq boʻlmagan muddatga mehnat shartnomasi tuzadilar;

Sanepidqoʻm Qoraqalpogʻiston Respublikasi, viloyatlar va Toshkent shahar boshqarmalari, tumanlar va shaharlar boʻlimlari boshliqlari 3 yilda bir marta davriylikda attestatsiyadan oʻtishlari kerak;

Sanepidqoʻm Qoraqalpogʻiston Respublikasi, viloyatlar va Toshkent shahar boshqarmalari, tumanlar va shaharlar boʻlimlari boshliqlari egallab turgan lavozimida muvaffaqiyatli ishlashning besh yillik muddati tamom boʻlgandan keyin egallab turgan lavozimidan past boʻlmagan lavozimga yangi ish joyiga oʻtkazilishi kerak. Ishda jiddiy kamchiliklar mavjud boʻlgan taqdirda, ushbu shartli muddat sezilarli darajada qisqartirilishi mumkin;

Sanepidqoʻm organlari tizimining rahbar va boshqaruv kadrlari yangi ish joyiga oʻtkazilganda qonun hujjatlarida belgilangan tartibda xizmat turar joyi yoki u ijaraga olinganligi uchun kompensatsiya toʻlovi bilan taʼminlanadilar.

2. Quyidagilar Sanepidqoʻm va uning hududiy boʻlinmalari faoliyatining eng muhim yoʻnalishlari etib belgilansin:

respublikada sanitariya-epidemiologik ahvol va radiatsiya holati monitoringini olib borish, kelgusida aholi sogʻligʻini mustahkamlashga, yashash muhiti omillarining insonga zararli taʼsirini bartaraf etishga, atmosfera havosi, tuproq, oziq-ovqat mahsulotlari va ichimlik suv taʼminoti manbalari ifloslanishining oldini olishga qaratilgan kompleks sanitariya-gigiyena, epidemiyaga qarshi va tashkiliy chora-tadbirlarni amalga oshirish;

eng avvalo, oʻta xavfli yuqumli kasalliklar profilaktikasi, ularning oʻchoqlarini bartaraf etish va tarqalib ketishining oldini olishga yoʻnaltirilgan chora-tadbirlarni amalga oshirish hisobiga aholini virusli va yuqumli kasalliklardan himoya qilish tizimining samaradorligi va ishonchliligini oshirish;

binolar va inshootlarni, suv taʼminoti, kanalizatsiya, oqova suvlarni tozalash, gidrotexnika inshootlari tizimlarini va boshqa obyektlarni loyihalashtirish, qurish, rekonstruksiya qilishda, xom ashyoning yangi turlarini, oziq-ovqat mahsulotlari, sanoat buyumlari, qurilish materiallari, ionlashtiruvchi nurlanish manbalari, kimyoviy moddalar, biologiya vositalari, tibbiy va immunobiologik preparatlarni ishlab chiqarish va qoʻllashda sanitariya normalari, qoidalariga va gigiyena normativlariga rioya qilinishi ustidan nazoratni taʼminlash;

aholi punktlari va hududlarni saqlash, sanoat, qishloq xoʻjaligi va xoʻjalik-maishiy chiqindilarni, shu jumladan radioaktiv va zararli moddalarni toʻplash, saqlash, tashish va utilizatsiya qilish ustidan zarur sanitariya-epidemiologik nazoratni taʼminlash;

avariyali vaziyatlarni tugatishda sanitariya-gigiyena va epidemiyaga qarshi tadbirlarni amalga oshirish, manfaatdor vazirliklar va idoralarning tegishli boʻlinmalarini jalb etgan holda yuqumli va parazitar kasalliklarni aniqlash;

oilada tibbiy madaniyatni oshirish, sanitariya normalari va qoidalariga rioya qilinishi, shuningdek sanitariya-epidemiologiya masalalarida xotirjamlikni taʼminlash boʻyicha aholi orasida keng tushuntirish ishlari olib borilishini tashkil etish.

4. Sanepidqoʻm organlari tizimining rahbar va boshqaruv kadrlari lavozimlariga tavsiya etiladigan yuklangan vazifalar va majburiyatlarni samarali bajarishni taʼminlashga qodir boʻlgan nomzodlar tanlanishi boʻyicha shaxsiy masʼuliyat Sogʻliqni saqlash vaziri, Oʻzbekiston Respublikasi Bosh davlat sanitariya vrachi, Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlari zimmasiga yuklansin.

5. Oʻzbekiston Respublikasi Sogʻliqni saqlash vazirligi, Iqtisodiyot vazirligi, Moliya vazirligi Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda ikki oy muddatda Oʻzbekiston Respublikasi Vazirlar Mahkamasiga:

Oʻzbekiston Respublikasi Davlat sanitariya-epidemiologiya xizmatining boshqaruv tuzilmasini yanada takomillashtirish;

oʻquv rejalari va dasturlarni qayta koʻrib chiqish va yangilashga alohida eʼtibor qaratgan holda davlat sanitariya-epidemiologiya xizmati organlari tizimining boshqaruv kadrlari va mutaxassislarini tayyorlash, qayta tayyorlash va ularning malakasini oshirish;

sanitariya-epidemiologiya xizmati muassasalarining moddiy-texnika bazasini yanada mustahkamlash va modernizatsiyalash boʻyicha takliflar kiritsinlar.

6. Oʻzbekiston Respublikasi Sogʻliqni saqlash vazirligi bir oy muddatda Oʻzbekiston Respublikasi Adliya vazirligi va boshqa manfaatdor vazirliklar va idoralar bilan birgalikda:

ushbu qaror talablari hisobga olingan holda “Sanitariya-epidemiologiya masalalarida aholining xotirjamligi toʻgʻrisida”gi qonun loyihasi puxta ishlanishi va Oʻzbekiston Respublikasi Vazirlar Mahkamasiga taqdim etilishini taʼminlasin;

Vazirlar Mahkamasining 1998-yil 8-apreldagi 147-son qarori bilan tasdiqlangan amaldagi Sanitariya qonunlarini buzganlik uchun jazo jarimalaridan tushadigan mablagʻlardan foydalanish tartibi toʻgʻrisidagi nizomni qayta koʻrib chiqsin, bunda davlat sanitariya-epidemiologiya xizmati organlari tizimining rahbar va boshqaruv kadrlari Respublika komissiyasining qarori bilan yangi ish joyiga oʻtkazilganda xizmat turar joyi yoki u ijaraga olinganligi uchun kompensatsiya toʻlovi bilan taʼminlanishini nazarda tutsin;

qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga taklif kiritsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I.Ikramov zimmasiga yuklansin.