Vazirlar Mahkamasining 2002-yil 24-yanvardagi 30-son qarori bilan tasdiqlangan “Qariyalarni qadrlash yili” davlat dasturiga muvofiq va aholining ijtimoiy nochor qatlamlarini qo‘llab-quvvatlash maqsadida Vazirlar Mahkamasi qaror qiladi:

1. Vazirlar Mahkamasining “Bolalikdan nogironlarga, qariyalarga va mehnatga layoqatsiz fuqarolarga nafaqalar tayinlash va to‘lash tartibi to‘g‘risida” 1994-yil 24-iyundagi 319-son qaroriga muvofiq hayot chog‘ida nafaqa olgan shaxslarning dafn marosimi uchun 2002-yil 1 maydan boshlab eng kam oylik ish haqining ikki baravari miqdorida bir yo‘la beriladigan nafaqa belgilansin.

2. Keksalar va mehnatga layoqsatsiz fuqarolar, nogiron bolalar va bolalikdan nogironlarning dafn marosimi uchun bir yo‘la beriladigan nafaqalar tayinlash va to‘lash tartibi to‘g‘risidagi Nizom ilovaga muvofiq tasdiqlansin.

3. Belgilab qo‘yilsinki, keksalar va mehnatga layoqatsiz fuqarolar, nogiron bolalar va bolalikdan nogironlarning dafn marosimi uchun bir yo‘la beriladigan nafaqalarga soliq solinmaydi.

4. O‘zbekiston Respublikasi Mehnat va aholini ijtimoiy muhofaza qilish vazirligi bir oy muddatda amaldagi idoraviy normativ hujjatlarni mazkur qarorga muvofiqlashtirsin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S.Azimov zimmasiga yuklansin.

1. Dafn marosimi uchun bir yo‘la beriladigan nafaqani (keyingi o‘rinlarda “bir yo‘la beriladigan nafaqa” deb yuritiladi) olish huquqiga Vazirlar Mahkamasining “Bolalikdan nogironlarga, qariyalarga va mehnatga layoqatsiz fuqarolarga nafaqalar tayinlash va to‘lash tartibi to‘g‘risida” 1994-yil 24-iyundagi 319-son qaroriga muvofiq hayot chog‘ida nafaqa olgan keksalar va mehnatga layoqatsiz fuqarolar, nogiron bolalar va bolalikdan nogironlarni dafn etgan oila a’zolaridan biri yoki jismoniy shaxs ega bo‘ladi.

2. Bir yo‘la beriladigan nafaqa mazkur Nizomning 1-bandida ko‘rsatilgan fuqarolar vafot etgan kunda belgilangan eng kam oylik ish haqining ikki baravari miqdorida tayinlanadi va to‘lanadi.

3. Bir yo‘la beriladigan nafaqa, uni olish uchun fuqaro vafot etgan kundan boshlab 6 oydan kechikmay murojaat qilingan taqdirda tayinlanadi.

4. Bir yo‘la beriladigan nafaqani tayinlash to‘g‘risidagi ariza vafot etgan shaxs nafaqa oluvchi sifatida hisobda turgan tuman (shahar) O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi bo‘limiga beriladi.

5. Bir yo‘la beriladigan nafaqa tayinlash to‘g‘risidagi arizaga quyidagi hujjatlar ilova qilinishi kerak:

a) bir yo‘la beriladigan nafaqa olish uchun fuqarolik holatlarini qayd etish organi tomonidan vafot etganlik to‘g‘risida berilgan ma’lumotnoma (asl nusxasi);

b) fuqarolarning o‘zini o‘zi boshqarish organining dafn etishning arizachi tomonidan amalga oshirilishini tasdiqlovchi ma’lumotnomasi.

6. Bir yo‘la beriladigan nafaqa tayinlash to‘g‘risidagi arizani qabul qilish:

a) agar vafot etgan fuqaro nafaqa oluvchi sifatida tuman (shahar) O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi bo‘limida hisobda turmagan bo‘lsa;

b) nafaqa tayinlash yuzasidan ushbu Nizomning 1-bandida ko‘rsatilgan shaxslar vafot etgan kundan boshlab 6 oy o‘tgandan keyin murojaat qilinganda;

v) ushbu Nizomning 5-bandida ko‘rsatilgan hujjatlardan birortasi taqdim etilmaganda rad qilinadi.

Arizachi bir yo‘la beriladigan nafaqa tayinlash to‘g‘risidagi arizani qabul qilishning rad etilishi yuzasidan yuqori tashkilotga yoki sudga belgilangan tartibda shikoyat qilishi mumkin.

7. Bir yo‘la beriladigan nafaqa tayinlash to‘g‘risidagi ariza tuman (shahar) O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi bo‘limi tomonidan barcha zarur hujjatlar bilan birgalikdagi ariza tushgandan keyin 3 kundan kechikmay ko‘rib chiqiladi.

Bir yo‘la beriladigan nafaqa tayinlash O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi bo‘limi qaroriga binoan rasmiylashtiriladi.

8. O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi bo‘limi nafaqa tayinlash to‘g‘risida qaror chiqarilgandan keyin 3 kundan kechikmay tegishli qaror nusxasi bilan birgalikda bildirishnomani arizachining qo‘liga beradi yoki unga pochta orqali jo‘natadi.

9. Tuman (shahar) O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi bo‘limi tayinlangan bir yo‘la beriladigan nafaqani nafaqa tayinlash to‘g‘risida ariza berilgan oydan keyingi oydan kechikmay to‘laydi.

Arizachining xohishiga ko‘ra nafaqa aloqa bo‘limi orqali pochta jo‘natmasi tarzida yoki bankdagi omonatga o‘tkazish yo‘li bilan to‘lanadi.

10. Bir yo‘la beriladigan nafaqalarni to‘lash budjetdan tashqari Pensiya jamg‘armasi hisobidan amalga oshiriladi.

11. Bir yo‘la beriladigan nafaqa soliqqa tortilmaydi va ulardan soliq puli ushlab qolinmaydi.

12. Bir yo‘la beriladigan nafaqa to‘lash bo‘yicha hisobga olish va hisobot berish tartibi O‘zbekiston Respublikasi Moliya vazirligi tomonidan belgilanadi.