Vazirlar Mahkamasi qayd etadiki, qishloq xo‘jaligi ekinlari payhon qilinishi hollariga yo‘l qo‘ymaslik va ularning oldini olish yuzasidan Qoraqalpog‘iston Respublikasi Vazirlar Kengashi, viloyatlar va tumanlar hokimliklari, Qishloq va suv xo‘jaligi vazirligi, Ichki ishlar vazirligi va respublika Prokuraturasi tomonidan ko‘rilayotgan chora-tadbirlar ko‘pchilik hollarda zarur samara bermayotir.

Ekinlarning payhon qilinishi tufayli g‘alla va boshqa qishloq xo‘jaligi ekinlari hosilining sezilarli darajada nobud bo‘lishiga yo‘l qo‘yilmoqda.

Ekinlarni saqlash bilan bog‘liq vujudga kelgan ahvol xo‘jaliklar rahbarlarining ekinlarni saqlash muammolariga yetarli e’tibor bermayotganliklari, ba’zan esa, ushbu muammolardan o‘zlarini chetga olayotganliklari, viloyatlar va tumanlar hokimlari, respublika huquqni muhofaza qilish organlari tomonidan ularga nisbatan talabchanlik bo‘shashtirib yuborilganligi oqibatidir.

Mavjud kamchiliklarni bartaraf etish va qishloq xo‘jaligi ekinlari payhon qilinishi hollariga yo‘l qo‘ymaslik va ularning oldini olishga doir ishlarning samaradorligini oshirish maqsadida Vazirlar Mahkamasi qaror qiladi:

1. Qoraqalpog‘iston Respublikasi Vazirlar Kengashi, viloyatlar va tumanlar hokimliklari, fuqarolarning o‘zini o‘zi boshqarish organlari hamda xo‘jaliklar rahbarlarining O‘zbekiston Respublikasi Prezidentining “Ekinlarni payhon qilishga qarshi kurashni kuchaytirish to‘g‘risida” 1994-yil 21-noyabrdagi Farmoni talablarini bajarishga doir ishlari yetarli emas deb hisoblansin.

Ulardan qishloq xo‘jaligi ekinlarining saqlanishini ta’minlash yuzasidan shoshilinch chora-tadbirlar ko‘rish talab etilsin. Ushbu maqsadlarda:

ekinzorlarda mol boqish va ularni haydab o‘tish, ekinzorlardan avtotransport vositalari, qishloq xo‘jaligi texnikasi o‘tishi hollariga, shuningdek, ekinlarning nobud bo‘lishi va payhon qilinishiga olib keluvchi boshqa salbiy harakatlarga qarshi kurashni kuchaytirsinlar;

qishloq xo‘jaligi korxonalari va fermer xo‘jaliklari rahbarlari ichki ishlar organlari, fuqarolarning o‘zini o‘zi boshqarish organlari vakillari va jamoat tashkilotlari bilan hamkorlikda ekinlarni payhon qilish hollarini aniqlash va ularning oldini olish bo‘yicha muntazam ravishda qo‘shma reydlar o‘tkazsinlar. Payhon qilinishi mumkin bo‘lgan joylarda kuzatuv postlari o‘rnatsinlar. Dala qorovullari ishlari samaradorligini oshirsinlar;

ekinlarni payhon qilish hollari aniqlangan taqdirda mollar, avtotransport, qishloq xo‘jaligi texnikasi yoki ekinlarni zararlantirish va payhon qilishning boshqa vositalari egalariga nisbatan tezkor choralar ko‘rsinlar. Aybdorlarni respublika qonun hujjatlariga muvofiq javobgarlikka tortish uchun materiallarni tegishli organlarga bersinlar.

2. Belgilansinki, payhon qilingan joylarda olib qo‘yiladigan mollar mol egalarini aniqlash, keyinchalik ularni javobgarlikka tortish uchun mahalliy o‘zini o‘zi boshqarish organlariga beriladi.

3. O‘zbekiston Respublikasi Ichki ishlar vazirligi (Almatov) qishloq xo‘jaligi ekinlarining payhon qilinishiga yo‘l qo‘ymaslikka hamda ularning oldini olishga qaratilgan tashkiliy chora-tadbirlarni amalga oshirsin. Ushbu holatlarga qarshi kurashni faollashtirish uchun tegishli bo‘linmalar va xizmatlarni jalb etsin.

4. O‘zbekiston Respublikasi Prokuraturasi (Xudoyqulov), Ichki ishlar vazirligi (Almatov) mulkchilik shakllaridan qat’i nazar, xo‘jaliklar va ularning tarkibiy bo‘linmalari rahbarlariga nisbatan ekinlarni payhon qilish va zararlantirishning aniqlangan hollari bo‘yicha keskin choralar, shu jumladan, ularni jinoiy va ma’muriy javobgarlikka tortish choralarini ko‘rsinlar.

5. O‘zbekiston Respublikasi Prokuraturasi (Xudoyqulov) O‘zbekiston Respublikasi Prezidentining “Ekinlarni payhon qilishga qarshi kurashni kuchaytirish to‘g‘risida” 1994-yil 21-noyabrdagi Farmonining bajarilishi ustidan nazoratni kuchaytirsin, uning so‘zsiz bajarilishi uchun mansabdor shaxslarga nisbatan talabchanlikni oshirsin.

6. O‘zbekiston Respublikasi Adliya vazirligi (Mirsafoyev) ekinlar payhon qilinganligi uchun javobgarlik to‘g‘risidagi amaldagi qonun hujjatlarini targ‘ib qilish yuzasidan keng tushuntirish ishlari tashkil etilishini ta’minlasin.

7. “O‘zteleradio” kompaniyasi (Ko‘chimov), O‘zbekiston Milliy axborot agentligi (Muhammad Do‘st), ommaviy axborot vositalari ushbu yo‘nalishda olib borilayotgan ishlarning muntazam ravishda yoritib borilishini ta’minlasinlar.

8. Qoraqalpog‘iston Respublikasi Vazirlar Kengashi va viloyatlar hokimliklari, Qishloq va suv xo‘jaligi vazirligi, “O‘zmevasabzavotuzumsanoat-xolding” kompaniyasi va O‘zbekiston Respublikasi Davlat o‘rmon qo‘mitasi ekinlarni va ko‘chatlarni payhon qilish va zararlantirishga qarshi kurash olib borish bo‘yicha ishlar ahvolini 2000-yilning fevralida birgalikda puxta ko‘rib chiqsinlar, uning samaradorligini oshirish yuzasidan aniq yo‘nalishlarni belgilasinlar. Amalga oshirilgan ishlar natijalari to‘g‘risida har oyda Vazirlar Mahkamasiga axborot bersinlar.

9. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B. Olimjonov zimmasiga yuklansin.