LexUZ sharhi
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Respublika mintaqalari iste’mol bozorini mamlakatimizda ishlab chiqarilgan tovarlar bilan yanada to‘laroq to‘ldirish, iste’mol tovarlari ishlab chiqaruvchi korxonalar hamda chakana savdo tashkilotlari o‘rtasida uzviy savdo-iqtisodiy aloqalarini o‘rnatish maqsadida Vazirlar Mahkamasi qaror qiladi:
1. O‘zbekiston Respublikasi Vazirlar Mahkamasining Iste’mol tovarlari ishlab chiqarish va savdo kompleksining, Qashqadaryo, Namangan, Samarqand, Xorazm viloyatlari va Toshkent shahar hokimliklarining Vazirlar Mahkamasining “Ulgurji savdo korxonalarini rivojlantirishga doir qo‘shimcha chora-tadbirlar to‘g‘risida” 2003-yil 4-fevraldagi 62-son qaroriga muvofiq ulgurji savdo korxonalari negizida ilovaga muvofiq doimiy ishlovchi iste’mol tovarlari mintaqaviy ko‘rgazma-yarmarkalarini tashkil etish to‘g‘risidagi taklifi qabul qilinsin.
2. Quyidagilar doimiy ishlovchi tovarlari mintaqaviy ko‘rgazma-yarmarkalarining asosiy vazifalari etib belgilansin:
respublika tovar ishlab chiqaruvchilari tomonidan ishlab chiqarilayotgan tovarlarni sotish bo‘yicha turli ko‘rgazma-yarmarkalar, shu jumladan mavsumiy, tematik yarmarkalar, ko‘rgazmali sotish, tovarlarning yangi modellarini namoyish qilish hamda sotish va boshqalarni tashkil etish;
iste’mol tovarlari ichki bozori konyunkturasining marketing tadqiqotlarini o‘tkazish, bu axborotlarni yarmarka savdolari qatnashchilariga berish;
tovar ishlab chiqaruvchilarga aholi o‘rtasida xaridorgir bo‘lgan tovarlar ishlab chiqarish yuzasidan asoslangan buyurtmanomalar tayyorlash, ishlab chiqarilayotgan mahsulot assortimentini kengaytirish, tovarlar dizaynini, sifatini va o‘rab-joylanishini yaxshilashga qaratilgan tavsiyanomalar ishlab chiqish;
yarmarkalarda qatnashish uchun vatanimiz iste’mol tovarlari ishlab chiqaruvchi korxonalarining, shu jumladan kichik va o‘rta biznes korxonalarining keng doirasini jalb qilish, ular tomonidan ishlab chiqarilayotgan tovarlarni yarmarka savdolariga qo‘yish va sotish;
tovarlar ishlab chiqaruvchi korxonalar hamda savdo tashkilotlari o‘rtasida yaqin savdo-iqtisodiy aloqalarini o‘rnatishga ko‘maklashish;
respublika sanoat korxonalari bilan iste’mol tovarlari yetkazib berish hamda tovarlarni o‘z vaqtida yarmarka omborlariga olib kelish yuzasidan uzoq muddatli shartnomalar tuzish;
vatanimizda ishlab chiqarilgan tovarlarning ichki iste’mol bozorlariga kirib borish maqsadida reklama-axborot faoliyati yuzasidan kompleks chora-tadbirlarni amalga oshirish.
3. Belgilansinki, doimiy ishlovchi mintaqaviy ko‘rgazma-yarmarkalari hududiy yaqinlik prinsipi bo‘yicha yuridik shaxs sifatida tashkil etiladi va ustav fondi miqdoridan qat’i nazar, o‘zining ulgurji va chakana savdo faoliyatini amalga oshiradi.
4. Qashqadaryo, Namangan, Samarqand, Xorazm viloyatlari va Toshkent shahar hokimliklari, O‘zbekiston Respublikasi Davlat mulki qo‘mitasi “O‘zbeksavdo”, “O‘zbekbirlashuv” aksiyadorlik kompaniyalari va “O‘zko‘rgazmasavdo” aksiyadorlik jamiyati bilan birgalikda:
Vazirlar Mahkamasining “Ulgurji savdo korxonalarini rivojlantirishga doir qo‘shimcha chora-tadbirlar to‘g‘risida” 2003-yil 4-fevraldagi 62-son qaroriga muvofiq ilgari tashkil etilgan ulgurji bazalarning omborlari va savdo asbob-uskunalaridan foydalangan holda ularni tegishli savdo-texnologiya asbob-uskunalari bilan ta’minlab doimiy ishlovchi ko‘rgazma-yarmarkalarni tashkil etish uchun zarur shart-sharoitlar yaratsinlar;
yarmarka qatnashchilariga tegishli xizmatlar ko‘rsatgan va zamonaviy aloqa vositalari bilan ta’minlagan holda ko‘rgazma-yarmarkalar huzurida mini-banklar, sug‘urta, transport kompaniyalari va boshqa bozor infratuzilmasi vakolatxonalarini tashkil etishda ko‘maklashsinlar.
Keyingi tahrirga qarang.
5. Iste’mol tovarlari ishlab chiqaruvchi korxonalarga o‘zlari ishlab chiqargan tovarlarni doimiy ishlovchi ko‘rgazma-yarmarkalarga konsignatsiya shartlarida berishiga ruxsat etilsin. Bunda konsignatsiya shartlarida berilgan tovarlar uchun korxonalar tomonidan soliqlar ularning sotilishiga qarab, tovar yuklab jo‘natilgan (berilgan) sanadan boshlab 60 kundan ortiq bo‘lmagan muddatda to‘lanadi.
6. O‘zbekiston Respublikasining eksport imkoniyatlarini keng targ‘ib qilish, vatanimiz tovar ishlab chiqaruvchilari va tadbirkorlari tomonidan ishlab chiqarilayotgan ishlab-chiqarish-texnika yo‘nalishidagi va iste’mol tovarlarini reklama qilish maqsadida O‘zbekiston Respublikasi Tashqi iqtisodiy aloqalar agentligi “O‘zekspomarkaz” respublika savdo-ko‘rgazma markazining ekspozitsiya maydonlarida doimiy ishlovchi ko‘rgazma-yarmarka tashkil etsin.
Keyingi tahrirga qarang.
7. O‘zbekiston Respublikasi Vazirlar Mahkamasining Iste’mol tovarlari ishlab chiqarish va savdo kompleksi hamda O‘zbekiston Respublikasi Davlat soliq qo‘mitasi yarmarka savdosini tashkil etish va o‘tkazishni tartibga soluvchi normativ-huquqiy hujjatlarning maxsus to‘plami ikki hafta muddatda nashr etilishini va uning yarmarka savdolari qatnashchilari o‘rtasida tarqatilishini ta’minlasinlar.
8. “O‘zteleradio” kompaniyasi, O‘zbekiston Milliy axborot agentligi ommaviy axborot vositalari orqali tashkil etilayotgan doimiy ishlovchi mintaqaviy ko‘rgazma-yarmarkalarning maqsadlari va vazifalari, respublika tovar ishlab chiqaruvchilari tomonidan ishlab chiqarilayotgan yangi tovarlar to‘g‘risida aholining keng xabardor qilinishini ta’minlasinlar.
9. Vazirlar Mahkamasining “Ulgurji savdo korxonalarini rivojlantirishga doir qo‘shimcha chora-tadbirlar to‘g‘risida” 2003-yil 4-fevraldagi 62-son qarori o‘z kuchini yo‘qotgan deb hisoblansin.
10. O‘zbekiston Respublikasi Adliya vazirligi manfaatdor vazirliklar va idoralar bilan birgalikda amaldagi qonun hujjatlariga mazkur qarordan kelib chiquvchi o‘zgartirish va qo‘shimchalar yuzasidan bir oy muddatda Vazirlar Mahkamasiga takliflar kiritsin.
11. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari M.Z. Usmonov zimmasiga yuklansin.
T/r | Doimiy ishlovchi ko‘rgazma-yarmarkalar tashkil etilayotgan viloyatlar | Doimiy ishlovchi ko‘rgazma-yarmarkalarning joylashgan joyi | Xizmat ko‘rsatiladigan hududlar |
1. | Qashqadaryo | Qarshi shahri, O‘zbekiston ko‘chasi, 184 “Bolalar dunyosi” savdo kompleksi | Qashqadaryo va Surxondaryo viloyatlari |
2. | Samarqand | Samarqand shahri, Toshkent ko‘chasi 18, “Samarqand univermagi” savdo kompleksi | Samarqand, Buxoro va Navoiy viloyatlari |
3. | Namangan | Namangan shahri, Bobur ko‘chasi “Lola” savdo kompleksi | Namangan, Andijon va Farg‘ona viloyatlari |
4. | Xorazm | Urganch shahri, Sanoat ko‘chasi 9, Markaziy univermag | Xorazm viloyati va Qoraqalpog‘iston Respublikasi |
5. | Toshkent shahri | Toshkent shahri, “O‘zko‘rgazma savdo” aksiyadorlik jamiyati Kichik paviloni | Toshkent shahri, Jizzax va Sirdaryo viloyatlari |