LexUZ sharhi
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Iste’mol mollari va xizmatlarga chakana narxlar oshib borayotgan sharoitda respublika aholisini va avvalo uning nochor tabaqalarini ijtimoiy himoya qilishni ta’minlash maqsadida:
1. 1992-yilning 16-martidan xalq ta’limi, sog‘liqni saqlash, madaniyat, ijtimoiy ta’minot, fan, uy-joy-kommunal tarmog‘i, huquqni muhofaza qilish organlari hamda O‘zbekiston Mudofaa ishlari vazirligi tizimi xodimlarining ish haqi, shu jumladan imtiyozli ovqatlanish uchun har oylik tovon to‘lovlari 1,7 baravar oshirilsin.
2. 1992-yilning 16-martidan oliy o‘quv yurtlari talabalarining, aspirantlarning, doktorantlarning stipendiyalari, kiyim-bosh va ovqat bilan ta’minlanmaydigan texnikumlar hamda hunar-texnika bilim yurtlari o‘quvchilarining stipendiyalari 1,5 baravar ko‘paytirilsin, bunda imtiyozli ovqatlanish uchun har oylik qo‘shimcha to‘lovlarning avvalgi miqdorlari hamda talabalarning oshxonalari va bufetlarida tushlik ovqatlarning qiymatidan 50 foizli chegirmalar saqlab qolinsin.
3. 1992-yilning 16-martidan O‘zbekiston Respublikasi huzurida ish haqi va mehnat pensiyasining eng oz miqdori oyiga 550 so‘m qilib belgilansin.
Ulug‘ Vatan urushining qatnashchilari va nogironlariga eng oz miqdori 700 so‘m bo‘lishidan kelib chiqib, pensiyalar miqdori belgilansin, bunda Ulug‘ Vatan urushi III guruh nogironlari pensiyalarining miqdori eng oz ish haqi darajasigacha yetkazilsin.
4. 1992-yilning 1-aprelidan fuqarolarning soliq olinmaydigan daromadlarining eng past darajasi oyiga 550 so‘m miqdorida belgilansin.
5. Aholi daromadlarining darajasini to‘g‘rilab olish maqsadida oyiga 1600 so‘mdan oshadigan ish haqidan daromad solig‘i miqdorlarini oshirish zarur deb hisoblansin. Shunga asosan Vazirlar Mahkamasi daromad solig‘ining konkret miqdorlarini aniqlasin hamda ularni soliq to‘lovchilarga yetkazsin.
6. Respublika vazirliklari, idoralari, uyushmalari, konsernlari, korxonalari va xo‘jaliklari mehnat unumdorligini o‘stirish va ishlab chiqarish (ishlar va xizmatlar)ning hajmlarini oshirish hisobiga ushbu Farmonda belgilangan minimumni e’tiborga olgan holda ishlovchilarning maoshini yanada ko‘paytirishga doir chora-tadbirlar kompleksi amalga oshirilishini ta’minlasinlar.
7. O‘zbekiston Davlat banki, tegishli tijorat banklari, O‘zbekiston Respublikasining vazirliklari va idoralari, Nafaqa jamg‘armasi, Ijtimoiy ta’minot vazirligi, budjet hisobidagi muassasalar va o‘quv yurtlarining rahbarlari 1992-yilning 1-apreligacha ushbu Farmonda belgilangan pensiyalar, stipendiyalar va ish haqi miqdorlaridan kelib chiqib, avans to‘lovlarini ta’minlasinlar.
8. O‘zbekiston Respublikasi Prezidenti huzuridagi Vazirlar Mahkamasi ushbu Farmonni ro‘yobga chiqarishga oid tashkiliy chora-tadbirlarni ko‘zda tutuvchi qaror qabul qilsin.
9. O‘zbekiston Respublikasining Adliya vazirligi bir oy muddat ichida amaldagi qonunlarni mazkur Farmonga muvofiq holga keltirish to‘g‘risidagi takliflarni tayyorlasin.
10. Farmonning bajarilishini nazorat qilish O‘zbekiston Respublikasining Vazirlar Mahkamasi va Davlat banki zimmasiga yuklansin.