2004-yil hosili paxta xomashyosi yig‘im-terimini o‘z vaqtida va uyushqoqlik bilan o‘tkazish, tuzilgan kontraktatsiya shartnomalarining bajarilishini ta’minlash, yetishtirilgan paxta xomashyosi yig‘im-terimini qisqa muddatlarda o‘tkazganlik uchun qishloq xo‘jaligi korxonalarini rag‘batlantirish maqsadida Vazirlar Mahkamasi qaror qiladi:

1. O‘zbekiston Respublikasi Moliya vazirligi, Iqtisodiyot vazirligi Qishloq va suv xo‘jaligi vazirligi, “O‘zpaxtasanoat” uyushmasi bilan birgalikda O‘zbekiston Respublikasi Prezidentining “Paxta narxini shakllantirish mexanizmi to‘g‘risida” 2002-yil 20-avgustdagi PF-3114-son Farmonini bajarish yuzasidan paxta tolasi uchun jahon bozorida vujudga kelgan narxlar konyunkturasini hisobga olgan holda bir hafta muddatda 2004-yil hosili paxta xomashyosi uchun xarid narxlarini belgilasinlar hamda xarid narxlari preyskurantini va hisob-kitob qilish tartibini paxtachilik xo‘jaliklariga yetkazsinlar.

2. Paxta yetishtiruvchi qishloq xo‘jaligi korxonalarining paxta xomashyosi yetishtirishni ko‘paytirishdan manfaatdorligini rag‘batlantirish uchun O‘zbekiston Respublikasi Vazirlar Mahkamasining “Paxta xomashyosi yetishtirishda bozor prinsiplarini amalga oshirish va uni yetishtirishni tashkil etishni yanada takomillashtirish chora-tadbirlari to‘g‘risida” 2003-yil 19-fevraldagi 93-son qarori bilan prognozda belgilangan hajmlardan ortiqcha yetishtirilgan paxta xomashyosi uchun joriy hisob-kitoblar shartnomaviy narxlar bo‘yicha, yagona xarid narxlaridan 20 foiz ortiq bo‘lgan narxlarda amalga oshiriladigan tartib tasdiqlanganligi ma’lumot uchun qabul qilinsin.

3. Belgilab qo‘yilsinki, 2004-yil hosilining ham qo‘lda, ham mashinada terilgan paxta xomashyosi uchun to‘lov miqdori o‘tgan yilgi hosil terimi uchun to‘lov darajasidan kamida 15 foiz yuqori bo‘lishi kerak.

O‘zbekiston Respublikasi Moliya vazirligi, Qishloq va suv xo‘jaligi vazirligi, “O‘zagromashservis” uyushmasi paxta xomashyosi terimi uchun tariflarni belgilashda mashina terimini ko‘paytirishni rag‘batlantirishni nazarda tutsinlar.

Paxta yetishtiruvchi qishloq xo‘jaligi korxonalari texnologiya kartalariga muvofiq paxta xomashyosi yetishtirish xarajatlarini hisobga olgan holda, shuningdek paxta hosildorligiga hamda moliyaviy imkoniyatlarga qarab terimchilarga O‘zbekiston Respublikasi Moliya vazirligi tomonidan belgilangan eng kam narxlardan kelib chiqib, tabaqalashtirilgan holda haq to‘lanishini ta’minlasinlar.

4. Qoraqalpog‘iston Respublikasi Vazirlar Kengashi, viloyatlar hokimliklari, O‘zbekiston Respublikasi Qishloq va suv xo‘jaligi vazirligi “O‘zpaxtasanoat” va “O‘zagromashservis” uyushmalari, “O‘zqishloqxo‘jalikmash-xolding” kompaniyasi bilan birgalikda 2004-yil paxta hosili yig‘im-terimining o‘z vaqtida va sifatli o‘tkazilishiga qaratilgan kompleks tashkiliy-iqtisodiy chora-tadbirlar amalga oshirilishini ta’minlasinlar. Shu yilning 15-avgustiga qadar buning uchun zarur bo‘lgan barcha moddiy-texnik baza tayyorlanishini tugallasinlar.

5. “O‘zkimyosanoat” kompaniyasi, “O‘zbekiston havo yo‘llari” milliy aviakompaniyasi Qoraqalpog‘iston Respublikasi Vazirlar Kengashi, viloyatlar hokimliklari bilan birgalikda g‘o‘zani defolatsiya qilishni o‘z vaqtida o‘tkazish uchun defoliantlar bilan ta’minlashda, texnik vositalarni tayyorlashda va zarur miqdordagi samolyotlar ajratishda paxta yetishtiruvchi xo‘jaliklarga amaliy yordam ko‘rsatsinlar.

6. “O‘zbekneftgaz” milliy xolding kompaniyasi va “O‘zneftmahsulot” aksiyadorlik kompaniyasi yonilg‘i-moylash materiallarining zarur zaxirasini yaratsinlar va ularning qishloq xo‘jaligi korxonalari, mashina-traktor parklari hamda paxta terimida, paxta xomashyosini transportda tashish va unga ishlov berishda band bo‘lgan boshqa tashkilotlarga ko‘rsatib o‘tilgan ishlarni bajarish uchun zarur hajmlarda uzluksiz yetkazib berilishini belgilangan tartibda tashkil etsinlar.

7. Mazkur qarorning bajarilishini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.