O‘zbekiston SSJ Mustaqilligi to‘g‘risida e’lon qilingan Deklaratsiya asosida davlat ijtimoiy-iqtisodiy va ilmiy-texnikaviy siyosatini shakllantirish, jamoat ishlab chiqarishini o‘stirish resurslari va manbalaridan samarali foydalanish hamda aholi farovonligini yaxshilash yo‘nalishlarini ishlab chiqish va amalga oshirish, ko‘rsatma asosidagi rejalashtirishdan xalq xo‘jaligini rivojlantirishni boshqarishning iqtisodiy shakllariga izchil o‘tishni ta’minlash maqsadida hamda boshqariladigan bozor iqtisodiyotiga o‘tish sharoitida zamonaviy boshqaruv va ishlab chiqarish tuzilmalarini tashkil etishning o‘sib borayotgan ahamiyatini e’tiborga olib:

1. O‘zbekiston SSJ Davlat reja qo‘mitasi negizida O‘zbekiston SSJ Iqtisodiyot qo‘mitasi tashkil etilsin.

2. O‘zbekiston SSJ Iqtisodiyot qo‘mitasi zimmasiga:

— jumhuriyatning tabiiy va mehnat resurslarini, ilmiy-texnikaviy hamda ishlab chiqarish imkoniyatini hisobga olib, uni iqtisodiy va ijtimoiy rivojlantirishning istiqbolga mo‘ljallangan taxminlarini ishlab chiqish hamda joriy ko‘rsatkichlarini belgilash;

— jumhuriyatning bozor munosabatlariga o‘tish siyosatini shakllantirish va uning dasturlari ro‘yobga chiqarilishini nazorat qilish;

— asosiy xo‘jalik, tabiiy-moddiy, moliyaviy va boshqa balanslarni tuzish, katta xo‘jalik, ijtimoiy va ilmiy-texnikaviy muammolarni hal etishga oid umumjumhuriyat dasturlarini tayyorlash;

— boshqa jumhuriyatlar va mintaqalar bilan o‘zaro samarali ishlab-chiqarish-iqtisodiy aloqalarni mustahkamlash;

— xo‘jalik mexanizmini, xalq xo‘jaligini rivojlantirish jarayoniga iqtisodiy ta’sir vositalari va usullarini takomillashtirish vazifalari yuklatilsin.

3. O‘zbekiston SSJ Vazirlar Mahkamasi Raisining o‘rinbosari, umumiqtisodiy kompleks rahbari o‘rtoq B.S. Hamidov bir oy muddat ichida O‘zbekiston SSJ Iqtisodiyot qo‘mitasini malakali kadrlar bilan muttasil butlasin va uning samarali ishlashini ta’minlasin; O‘zbekiston SSJ Iqtisodiyot qo‘mitasi qaramog‘idagi tashkilotlarni hisobga olib, uning to‘g‘risidagi nizom loyihasini ishlab chiqsin va O‘zbekiston SSJ Vazirlar Mahkamasining tasdiqlashi uchun taqdim etsin.