O‘zbekiston Respublikasi Vazirlar Mahkamasining
qarori
O‘zbekiston Respublikasi Vazirlar Mahkamasining “Uz-China Uran” mas’uliyati cheklangan jamiyat O‘zbekiston-Xitoy qo‘shma korxonasini tashkil etish to‘g‘risida” 2009-yil 28-avgustdagi 251-son qaroriga o‘zgartirishlar kiritish haqida
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Vazirlar Mahkamasining “Uz-China Uran” mas’uliyati cheklangan jamiyat O‘zbekiston-Xitoy qo‘shma korxonasi faoliyatini kengaytirish chora-tadbirlari to‘g‘risida” 2013-yil 14-yanvardagi 9-son qaroriga muvofiq, shuningdek “Uz-China Uran” mas’uliyati cheklangan jamiyat qo‘shma korxonasi ustav fondining ko‘paytirilishi munosabati bilan Vazirlar Mahkamasi qaror qiladi:
1. Vazirlar Mahkamasining “Uz-China Uran” mas’uliyati cheklangan jamiyat O‘zbekiston-Xitoy qo‘shma korxonasini tashkil etish to‘g‘risida” 2009-yil 28-avgustdagi 251-son qarorining 3-bandi quyidagi tahrirda bayon qilinsin:
“3. Belgilansinki, “Uz-China Uran” mas’uliyati cheklangan jamiyat qo‘shma korxonasining ustav kapitali miqdori 8576,0 ming AQSh dollarini tashkil etadi, undan:
“CGNPC URC” kompaniyasining 50 foiz miqdoridagi ulushi pul mablag‘lari va asbob-uskunalar hisobiga shakllantiriladi;
O‘zbekiston Respublikasi Davlat geologiya va mineral resurslar qo‘mitasining 50 foiz miqdoridagi ulushi Navoiy viloyatidagi istiqbolli Boztov va Meshetin maydonlarida ilgari olib borilgan uran bo‘yicha geologiya-qidiruv ishlari davomida olingan geologik, geofizik va boshqa ma’lumotlar hisobiga shakllantiriladi”.
2. O‘zbekiston Respublikasi Davlat geologiya va mineral resurslar qo‘mitasi muassislarning qo‘shma korxona ustav fondiga qo‘shimcha ulushi munosabati bilan “Uz-China Uran” mas’uliyati cheklangan jamiyat qo‘shma korxonasi ta’sis hujjatlariga 2013-yil 1-avgustgacha bo‘lgan muddatda, belgilangan tartibda tegishli o‘zgartirishlar kiritilishini ta’minlasin.
3. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari G‘.I. Ibragimov zimmasiga yuklansin.
O‘zbekiston Respublikasining Bosh vaziri Sh. MIRZIYOYEV
Toshkent sh.,
2013-yil 7-mart,
70-son
(O‘zbekiston Respublikasi qonun hujjatlari to‘plami, 2013-y., 11-son, 142-modda)