LexUZ sharhi
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Millatlararo aloqalarni kengaytirish va mustahkamlashga ko‘maklashish hamda xalqaro turizm bozoriga uzviy qo‘shilish, O‘zbekistonning madaniy-tarixiy va ma’naviy merosini jahon hamjamiyatida targ‘ib qilish, shuningdek sayyohlarga xizmat ko‘rsatish sifatini jahon andozalari darajasiga yetkazish maqsadida:
1. 2005-yilgacha bo‘lgan davrda O‘zbekistonda turizmni rivojlantirish Dasturi va uni amalga oshirish bo‘yicha Muvofiqlashtiruvchi kengash tarkibi, 1, 2-ilovalarga* muvofiq ma’qullansin.
2. Mulkchilik shaklidan qat’i nazar, sayyohlik tashkilotlari chetdan keltiriladigan texnologiya va mehmonxona uskunalari, sayyohlik maqsadlariga mo‘ljallangan transport vositalari uchun bojxona poshlinalari to‘lashdan 3 yil muddatga ozod qilinsin.
3. “O‘zbekturizm” Milliy kompaniyasi tizimidagi korxonalarga xorijiy turistlarga erkin ayirboshlanadigan valyuta hisobidan sayyohlik xizmati va qo‘shimcha xizmatlar ko‘rsatish huquqi berilib, buning uchun maxsus kassalar ochilsin.
O‘zbekiston Respublikasi Moliya vazirligi Markaziy bank bilan birgalikda ikki hafta muddatda xorijiy sayyohlarga erkin ayirboshlanadigan valyuta hisobidan xizmatlar ko‘rsatish tartibini ishlab chiqib, tasdiqlasin.
Keyingi tahrirga qarang.
4. O‘zbekiston Respublikasi Madaniyat ishlari vazirligi, Oliy va o‘rta maxsus ta’lim vazirligining,“O‘zbekturizm” Milliy kompaniyasining Madaniyat instituti Madaniyat va turizm institutiga aylantirish to‘g‘risidagi takliflari qabul qilinsin.
Mazkur vazirliklar va idoralar1999/2000 o‘quv yilidan boshlab, turizm sohasida yuqori malakali kadrlar tayyorlash uchun belgilangan tartibda zarur chora-tadbirlarni ko‘rsinlar.
Keyingi tahrirga qarang.
5. “Umid” jamg‘armasi har yili talabalarni sayyohlik industriyasi mutaxassisliklari bo‘yicha yetakchi xorijiy mamlakatlarga ta’lim olish uchun yuborishni ko‘zda tutsin.
6. O‘zbekiston Respublikasi Tashqi ishlar vazirligi, Moliya vazirligi, Madaniyat ishlari vazirligi va “O‘zbekturizm” Milliy kompaniyasi O‘zbekiston Respublikasining AQSh, Yaponiya, Buyuk Britaniya, Germaniya, Fransiya va Italiyadagi elchixonalarida madaniyat va turizm masalalari bo‘yicha maslahatchi lavozim birliklarini joriy etsinlar.
Maslahatchilar lavozimi ta’minotining 50 foizi “O‘zbekturizm” Milliy kompaniyasi mablag‘lari hisobidan amalga oshirilishi ma’lumot uchun qabul qilinsin.
7. O‘zbekiston Respublikasi Adliya vazirligi bir oy muddatda O‘zbekiston Respublikasi qonun hujjatlariga ushbu Farmondan kelib chiqadigan o‘zgartish va qo‘shimchalar to‘g‘risida takliflar kiritsin.
8. Mazkur Farmonning bajarilishini nazorat qilish O‘zbekiston Respublikasi Bosh vaziri O‘. Sultonov zimmasiga yuklansin.