“Taʼlim toʻgʻrisida”gi Oʻzbekiston Respublikasi Qonunining ijrosini taʼminlash hamda taʼlim tizimida islohotlar doirasida belgilangan vazifalarni izchil va sifatli amalga oshirish, oʻrta maxsus, kasb-hunar taʼlimi muassasalari oʻquvchilari oʻqishini koʻchirish, qayta tiklash va oʻqishdan chetlashtirish tartibini yanada takomillashtirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi oʻrta maxsus, kasb-hunar taʼlimi muassasalari oʻquvchilari oʻqishini koʻchirish, qayta tiklash va oʻqishdan chetlashtirish tartibi toʻgʻrisidagi nizom 1-ilovaga muvofiq;

Harbiy akademik litseylar oʻquvchilarini oʻqishdan chetlashtirish va boshqa taʼlim muassasasiga oʻtkazish tartibi toʻgʻrisidagi nizom 2-ilovaga muvofiq tasdiqlansin.

2. Oʻzbekiston Respublikasi Oliy va oʻrta maxsus taʼlim vazirligi manfaatdor vazirliklar va idoralar bilan birgalikda bir oy muddatda idoraviy normativ-huquqiy hujjatlarni ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I.Ikramov zimmasiga yuklansin.

1. Ushbu Nizom oʻrta maxsus, kasb-hunar taʼlimi muassasalari oʻquvchilari oʻqishini koʻchirish, qayta tiklash va oʻqishdan chetlashtirish tartibini belgilaydi.

2. Oʻrta maxsus, kasb-hunar taʼlimi muassasalari oʻquvchilari oʻqishini koʻchirish, qayta tiklash va oʻqishdan chetlashtirish masalalari Oʻzbekiston Respublikasi fuqarolarining majburiy oʻrta maxsus, kasb-hunar taʼlimi olish huquqini inobatga olgan holda hal etiladi.

3. Oʻquvchilarning oʻqishini bir oʻrta maxsus, kasb-hunar taʼlimi muassasasidan boshqasiga koʻchirish, shuningdek ilgari oʻqishdan chetlashtirilgan oʻquvchilarni oʻqishga qayta tiklash, qoidaga koʻra, yozgi taʼtil davrida, tegishli kurs (semestr)da oʻquv mashgʻulotlari boshlanishiga qadar amalga oshiriladi.

4. Oʻrta maxsus, kasb-hunar taʼlimi muassasalarida oʻqishni koʻchirish yoki qayta tiklash jarayoni bepul amalga oshiriladi.

5. Oʻrta maxsus, kasb-hunar taʼlimining tayyorlov yoʻnalishlari, kasblar va ixtisosliklar tasniflagichiga muvofiq (keyingi oʻrinlarda — Tasniflagich deb yuritiladi) bir tayyorlov yoʻnalishi doirasida oʻquvchilar oʻqishini bir taʼlim muassasasi doirasida koʻchirish ushbu oʻrta maxsus, kasb-hunar taʼlimi muassasasi direktorining buyrugʻi bilan amalga oshiriladi.

6. Bir mintaqa (Qoraqalpogʻiston Respublikasi, viloyatlar va Toshkent shahri) doirasida oʻquvchilar oʻqishini Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tasarrufidagi bir oʻrta maxsus, kasb-hunar taʼlim muassasasidan Tasniflagichning bir bilim sohasi ichidagi boshqa taʼlim muassasasiga koʻchirish oʻrta maxsus, kasb-hunar taʼlimi tegishli hududiy boshqarmasining ruxsati bilan amalga oshiriladi.

7. Quyidagi hollarda oʻquvchilar oʻqishini koʻchirish va qayta tiklash Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi ruxsati bilan amalga oshiriladi:

a) boshqa davlatlarning taʼlim muassasalarida tahsil olgan Oʻzbekiston Respublikasi fuqarolarining oʻqishini respublika oʻrta maxsus, kasb-hunar taʼlimi muassasalariga koʻchirish;

b) oʻrta maxsus, kasb-hunar taʼlimi muassasalari oʻquvchilarini ota-onalari bilan birgalikda doimiy yashash uchun Oʻzbekiston Respublikasi tashqarisiga chiqib ketishi munosabati bilan oʻqishdan chetlashtirish;

v) oʻquvchilarni bir mintaqadagi oʻrta maxsus, kasb-hunar taʼlimi muassasalaridan boshqa mintaqalarning (Qoraqalpogʻiston Respublikasi, viloyatlar va Toshkent shahri) oʻrta maxsus, kasb-hunar taʼlimi muassasalariga koʻchirish;

g) bir hudud doirasida oʻquvchilarni bir oʻrta maxsus, kasb-hunar taʼlimi muassasalaridan turli vazirliklar (idoralar) tasarrufidagi boshqa oʻrta maxsus, kasb-hunar taʼlimi muassasasiga koʻchirish;

d) oʻquvchilarni Tasniflagichga muvofiq bir bilim sohasidan boshqa bilim sohasiga koʻchirish.

8. Oʻrta maxsus, kasb-hunar taʼlimi muassasalari oʻquvchilarini boshqa vazirliklar (idoralar)ning oʻrta maxsus kasb-hunar taʼlimi muassasalariga koʻchirish va qayta tiklash Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan koʻrsatib oʻtilgan vazirliklar (idoralar) bilan kelishgan holda amalga oshiriladi.

9. Oʻquvchilarni koʻchirish va qayta tiklash toʻgʻrisidagi barcha arizalar bevosita oʻquvchilar oʻqiyotgan oʻrta maxsus, kasb-hunar taʼlimi muassasasida qabul qilinadi.

Koʻrib chiqish oʻrta maxsus, kasb-hunar taʼlimi muassasasi direktori vakolatiga kiradigan arizalar 20-avgustga qadar qabul qilinadi.

Oʻzbekiston Respublikasi Oliy va oʻrta maxsus taʼlimi vazirligining Oʻrta maxsus, kasb-hunar taʼlimi markazi vakolati doirasida koʻrib chiqiladigan arizalar 1-avgustga qadar qabul qilinadi va oʻrta maxsus, kasb-hunar taʼlimi muassasasi tomonidan hududiy viloyat boshqarmalariga yuboriladi.

Oʻzbekiston Respublikasi Oliy va oʻrta maxsus taʼlimi vazirligining Oʻrta maxsus, kasb-hunar taʼlimi markazi vakolati doirasida koʻrib chiqiladigan arizalar oʻrta maxsus, kasb-hunar taʼlimi hududiy viloyat boshqarmalari tomonidan rasmiy xat bilan Oʻzbekiston Respublikasi Oliy va oʻrta maxsus taʼlimi vazirligining Oʻrta maxsus, kasb-hunar taʼlimi markaziga yuboriladi.

10. Oʻquvchilarning oʻqishini koʻchirish yoki qayta tiklashda oʻrta maxsus, kasb-hunar taʼlimi muassasasi direktori tomonidan oʻquv rejalari va dasturlarga fanlar boʻyicha farqlarni yoki qarzlarni topshirish tartibi va muddatlari (ikki oydan ortiq boʻlmagan), shuningdek oʻquvchilarni oʻqitish kursi belgilanadi.

11. Oʻquvchilar oʻqishini bir oʻrta maxsus, kasb-hunar taʼlimi muassasasidan boshqasiga koʻchirishda oʻrta maxsus, kasb-hunar taʼlimi hududiy boshqarmasiga quyidagi hujjatlar taqdim etiladi:

a) oʻquvchining yozma arizasi, oʻquvchi voyaga yetmagan boʻlsa uning ota-onasidan birining (yoki ularning oʻrnini bosuvchi shaxslarning) arizasi;

b) taʼlim muassasasining nomi, mutaxassislik, kurs, guruh koʻrsatilgan holda taʼlim muassasasining gerbli muhri bilan tasdiqlangan reyting daftarcha nusxasi;

v) oʻquvchi pasporti nusxasi, voyaga yetmagani sababli pasporti boʻlmaganda tugʻilganlik toʻgʻrisidagi guvohnoma hamda ota-onasi (yoki ularning oʻrnini bosuvchi shaxslar)ning doimiy yashash joyi koʻrsatilgan pasporti nusxasi.

12. Oʻqishni koʻchirish toʻgʻrisidagi ariza taʼlim muassasasi direktori, oʻrta maxsus, kasb-hunar taʼlimi hududiy boshqarmasi yoki Oʻrta maxsus, kasb-hunar taʼlimi markazi tomonidan ariza berilgan kundan boshlab 15 kun mobaynida koʻrib chiqiladi.

Oʻrta maxsus, kasb-hunar taʼlimi markazining yozma javobi tegishli oʻrta maxsus, kasb-hunar taʼlimi hududiy boshqarmasiga yuboriladi. Oʻrta maxsus, kasb-hunar taʼlimi hududiy boshqarmasi olingan javob asosida ariza beruvchining va tegishli taʼlim muassasalarining manziliga xat yuboradi.

Tasniflagichga muvofiq oʻquvchining bilimlarning bir sohasi ichida, bir mintaqa doirasida joylashgan taʼlim muassasasiga oʻqishni koʻchirish toʻgʻrisidagi arizasi oʻrta maxsus, kasb-hunar taʼlimi hududiy boshqarmasi tomonidan koʻrib chiqiladi, natijalar haqida ariza beruvchiga va taʼlim muassasalariga yozma xabar beriladi.

Oʻquvchining oʻqishini koʻchirish toʻgʻrisida ijobiy qaror chiqarilganda oʻquvchini qabul qiluvchi oʻrta maxsus, kasb-hunar taʼlimi muassasasi 3 kun muddatda oʻquvchi tahsil olgan oʻrta maxsus, kasb-hunar taʼlimi muassasasiga oʻquvchining hujjatlarini joʻnatish toʻgʻrisida soʻrovnoma yuboradi.

Oʻquvchi bungacha oʻqigan taʼlim muassasasi ushbu soʻrovnoma asosida 3 kun muddatda oʻquvchining hujjatlarini yangi oʻqish joyiga yuboradi.

Oʻquvchining hujjatlar yigʻmajildi oʻquvchining oʻziga – ariza beruvchiga yoki uning ota-onalariga (ularning oʻrnini bosuvchi shaxslarga) berilishiga yoʻl qoʻyilmaydi.

Oʻquvchini qabul qiluvchi oʻrta maxsus, kasb-hunar taʼlimi muassasasi direktori qonun hujjatlarida belgilangan tartibda 10 kun muddatda oʻquvchilarni oʻqishga qabul qilish toʻgʻrisida buyruq chiqarishi shart.

13. Oʻquvchilarni oʻqishga qayta tiklash uchun oʻquvchi voyaga yetmagan boʻlsa uning ota-onasidan biri (yoki ularning oʻrnini bosuvchi shaxslar) chetlashtirish sabablarini koʻrsatgan holda oʻrta maxsus, kasb-hunar taʼlimi muassasasi direktori nomiga ariza berishi kerak.

14. Oʻquvchining, oʻquvchi voyaga yetmagan boʻlsa uning ota-onasidan birining (yoki ularning oʻrnini bosuvchi shaxslarning) oʻquvchini oʻqishga qayta tiklash haqidagi arizasi ariza berilgan kundan boshlab 15 kun muddatda koʻrib chiqiladi.

15. Oʻquvchini boshqa oʻrta maxsus, kasb-hunar taʼlimi muassasasiga oʻqishga qayta tiklashda u oldin oʻqigan oʻrta maxsus, kasb-hunar taʼlimi muassasasining roziligi talab etilmaydi.

16. Oʻquvchi oldin oʻqigan tayyorlov yoʻnalishi toʻxtatilgan boʻlsa, uning xohishiga koʻra turdosh tayyorlov yoʻnalishiga oʻqishni tiklash mumkin.

17. Oʻrta maxsus, kasb-hunar taʼlim muassasasi belgilangan davlat taʼlim standartlariga muvofiq oʻqishning taʼlim dasturini bajargan, biroq yakuniy davlat attestatsiyasida ishtirok etmagan yoki undan oʻtmagan 3-bosqich oʻquvchilari Pedagogik kengash qarori asosida yakuniy davlat attestatsiya komissiyasi faoliyat koʻrsatayotgan davrda 3 yil mobaynida yakuniy davlat attestatsiyasini qayta topshirish huquqiga ega.

3 yil mobaynida yakuniy davlat attestatsiyasini topshirmagan oʻquvchilar ushbu Nizomga muvofiq 3-bosqichda qayta oʻqish uchun ariza berishi mumkin.

18. Oʻrta maxsus, kasb-hunar taʼlimi muassasasi oʻquvchilari quyidagi hollarda oʻqishdan chetlashtirilishi mumkin:

a) salomatligi tufayli (tibbiy komissiya maʼlumotnomasi asosida) akademik taʼtil olganda;

b) oʻqishi boshqa taʼlim muassasasiga koʻchirilishi munosabati bilan;

v) doimiy yashash uchun boshqa davlatga chiqib ketganda;

g) sudning qarori bilan ozodlikdan mahrum etilganda;

d) vafot etganligi sababli.

19. Oʻrta maxsus, kasb-hunar taʼlimi muassasasining akademik qarzdorlikka (oʻzlashtirmaslikka) ega boʻlgan yoki oʻquv rejasi talablarini bajarmagan (ishlab chiqarish yoki diplom oldi amaliyotidan oʻtmagan, kurs ishini topshirmagan, 3 va undan ortiq fan boʻyicha “qoniqarsiz” yakuniy yillik baho olgan) oʻquvchilari Pedagogik kengashning qarori boʻyicha oʻquv yili tamom boʻlgach bir yil takroran oʻqish uchun kursda qoldirilishi mumkin.

Oʻrta maxsus, kasb-hunar taʼlimi muassasalari oʻquvchilarini bir yil takroran oʻqish uchun kursda qoldirish tartibi Sogʻliqni saqlash vazirligi, Madaniyat vazirligi, Jismoniy tarbiya va sport davlat qoʻmitasi va Badiiy akademiya bilan kelishgan holda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan belgilanadi.

Oʻqishdan chetlashtirilgan yoki oʻqish uchun takroriy muddatga qoldirilgan oʻquvchilar toʻgʻrisidagi maʼlumotlar oʻrta maxsus, kasb-hunar taʼlimi muassasasi direktori tomonidan tegishli tuman (shahar) hokimliklari huzuridagi voyaga yetmaganlar ishlari boʻyicha komissiyaga taqdim etiladi.

20. Oʻqishi koʻchirilgan yoki oʻqishga tiklangan oʻquvchilarning shaxsiy hujjatlar yigʻma jildiga ariza, buyruq va belgilangan namunadagi reyting daftarcha nusxalari tikib qoʻyiladi.

21. Oʻquvchilarning oʻqishini koʻchirishda, ularni oʻqishga tiklash va oʻqishdan chetlashtirishda hujjatlarning ishonchliligi va toʻgʻri rasmiylashtirilganligi uchun javobgarlik oʻrta maxsus, kasb-hunar taʼlimi muassasasi direktoriga yuklanadi.

22. Oʻrta maxsus, kasb-hunar taʼlimi muassasalari oʻquvchilarining oʻqishini koʻchirish, ularni oʻqishga tiklash va oʻqishdan chetlashtirish uchun asos boʻlib xizmat qilgan barcha hujjatlar mansubligi boʻyicha oʻrta maxsus, kasb-hunar taʼlimining tegishli hududiy boshqarmalarida, oʻz tasarrufida oʻrta maxsus, kasb-hunar taʼlimi muassasalariga ega boʻlgan vazirliklar va idoralarda belgilangan tartibda saqlanishi kerak.

23. Oʻquvchilar oʻqishini koʻchirish, ularni oʻqishga qayta tiklash va oʻqishdan chetlashtirish toʻgʻrisidagi qarordan norozi boʻlganlar belgilangan tartibda Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markaziga yoki sud organlariga murojaat qilish huquqiga egadir.

24. Ushbu Nizom talablari buzilishida aybdor boʻlgan shaxslar qonun hujjatlarida belgilangan tartibda javob beradilar.

1. Ushbu Nizom “Taʼlim toʻgʻrisida”gi Oʻzbekiston Respublikasi Qonuniga, Oʻzbekiston Respublikasi Vazirlar Mahkamasining “Harbiy akademik litseylar faoliyatini yanada takomillashtirish chora-tadbirlari toʻgʻrisida” 2010-yil 17-fevraldagi 21-son qarori bilan tasdiqlangan Harbiy akademik litsey toʻgʻrisidagi Nizomga muvofiq ishlab chiqilgan hamda harbiy akademik litseylar oʻquvchilarini oʻqishdan chetlashtirish va boshqa taʼlim muassasasiga oʻtkazish tartibini belgilaydi.

2. Harbiy akademik litseylar oʻquvchilarini oʻqishdan chetlashtirish va boshqa taʼlim muassasasiga oʻtkazish masalalari boʻyicha qaror Oʻzbekiston Respublikasi oʻquvchilarining oʻrta maxsus, kasb-hunar taʼlimi olishga boʻlgan huquqlarini taʼminlash hisobga olingan holda qabul qilinadi.

3. Oʻquvchilarni boshqa taʼlim muassasalaridan harbiy akademik litseylarga oʻtkazish taqiqlanadi.

4. Oʻqishdan chetlashtirilganlarni tiklash, shuningdek oʻquvchilarni bir harbiy akademik litseydan boshqa harbiy akademik litseyga oʻtkazish taqiqlanadi.

5. Oʻquvchilarni harbiy akademik litseydan chetlashtirish va boshqa taʼlim muassasasiga oʻtkazish bepul amalga oshiriladi.

6. Oʻquvchilarni harbiy akademik litseydan chetlatish va boshqa oʻrta maxsus, kasb-hunar taʼlimi muassasasiga oʻtkazish quyidagi hollarda amalga oshiriladi:

a) sogʻligʻi tufayli (tibbiy komissiyaning maʼlumotnomasi asosida);

b) harbiy akademik litseyda oʻqishni xohlamaslik;

v) akademik oʻzlashtirmaslik, bir semestr mobaynida ikki hafta davomida (76 soat) uzrli sabablarsiz mashgʻulotlarda qatnashmaslik;

g) harbiy akademik litseyning ichki tartibini qoʻpol ravishda buzish;

d) sudning qaroriga koʻra ozodlikdan mahrum etish;

e) vafot etganligi munosabati bilan.

7. Pedagogik kengashning oʻquvchilarni harbiy akademik litseydan chetlashtirish va boshqa taʼlim muassasasiga oʻtkazish toʻgʻrisidagi qarori hamda harbiy akademik litsey direktorining yozma murojaati asosida oʻrta maxsus, kasb-hunar taʼlimi hududiy boshqarmasi Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markaziga rasmiy xat bilan murojaat qiladi.

8. Xatga quyidagi hujjatlar ilova qilinadi:

a) oʻquvchilar va ular ota-onalarining (yoki ularning oʻrnini bosuvchi shaxslarning) Oʻrta maxsus, kasb-hunar taʼlimi markazi direktori nomiga boshqa taʼlim muassasasiga oʻtkazish (ushbu Nizomning 6-bandi “d” va “e” kichik bandlari bundan mustasno) toʻgʻrisidagi arizasi;

b) oʻquvchilarning belgilangan namunadagi toʻldirilgan va tasdiqlangan reyting daftarchasi nusxasi;

v) tibbiy komissiyaning maʼlumotnomasi (zarur hollarda);

g) belgilangan namunadagi yashash joyidan berilgan maʼlumotnoma (voyaga yetmaganlar uchun – doimiy yashash joyi koʻrsatilgan holda ularning ota-onalarining yoki ularning oʻrnini bosuvchi shaxslarning pasportlari nusxasi).

9. Harbiy akademik litsey oʻquvchilarini oʻqishdan chetlatish va boshqa oʻrta maxsus, kasb-hunar taʼlimi muassasasiga oʻtkazish toʻgʻrisidagi xat Oʻrta maxsus, kasb-hunar taʼlimi markazi tomonidan bir oy muddatda koʻrib chiqiladi va Oʻrta maxsus, kasb-hunar taʼlimi markazining tegishli buyrugʻi qabul qilinadi.

10. Harbiy akademik litsey direktori Oʻrta maxsus, kasb-hunar taʼlimi markazining buyrugʻi asosida uch kun mobaynida oʻquvchilarning shaxsiy hujjatlar yigʻma jildini oʻquvchi oʻtkazilayotgan taʼlim muassasasiga yuboradi.

11. Qabul qiluvchi oʻrta maxsus, kasb-hunar taʼlimi muassasasi direktori 10 kun mobaynida oʻquvchilarni oʻqishga qabul qilish toʻgʻrisida belgilangan tartibda buyruq chiqaradi.

12. Oʻquvchilarni oʻtkazish uchun hujjatlarni rasmiylashtirishda oʻrta maxsus, kasb-hunar taʼlimi muassasasi direktori belgilangan tartibda akademik qarzdorlikni yoki oʻquv rejalari va dasturlaridagi farqni, ularni topshirish muddatlarini (ikki oydan ortiq emas) va tartibini, oʻqish bosqichini belgilaydi.

13. Oʻquvchilarni oʻtkazish toʻgʻrisidagi buyruq, ariza va reyting daftarcha oʻquvchilarning shaxsiy hujjatlar yigʻma jildida saqlanadi.

Shaxsiy hujjatlar yigʻma jildini oʻquvchilarning qoʻliga yoki ularning ota-onalariga (yoki ularning oʻrnini bosuvchi shaxslarga) berish taqiqlanadi.

14. Oʻquvchilarni harbiy akademik litseydan chetlashtirish va boshqa taʼlim muassasasiga oʻtkazish toʻgʻrisidagi taqdim etilgan hujjatlarning toʻgʻri rasmiylashtirilishi va ishonchliligi uchun javobgarlik oʻrta maxsus, kasb-hunar taʼlim muassasalari direktorlariga yuklanadi.

15. Zarur hollarda Oʻrta maxsus, kasb-hunar taʼlimi markazi harbiy akademik litseyga taqdim etilgan hujjatlarning toʻgʻriligi va ishonchliligini tasdiqlashni iltimos qilib rasmiy xat bilan murojaat qilishi mumkin.

16. Oʻquvchilarni harbiy akademik litseydan chetlatish va boshqa taʼlim muassasasiga oʻtkazish uchun asos boʻlgan hujjatlar belgilangan tartibda Oʻrta maxsus, kasb-hunar taʼlimi markazida saqlanadi.

17. Oʻquvchilarni harbiy akademik litseydan chetlatish va boshqa taʼlim muassasasiga oʻtkazishdan norozi boʻlgan shaxslar belgilangan tartibda Oʻrta maxsus, kasb-hunar taʼlimi markaziga yoki sud organlariga murojaat qilish huquqiga egadir.

18. Ushbu Nizom talablari buzilishida aybdor boʻlgan shaxslar qonun hujjatlarida belgilangan tartibda javob beradilar.