LexUZ sharhi
Mazkur Farmon O‘zbekiston Respublikasi Prezidentining 2021-yil 30-apreldagi PF-6218-sonli “Milliy qonunchilik bazasini kompleks tizimlashtirish chora-tadbirlari to‘g‘risida”gi Farmoniga asosan o‘z kuchini yo‘qotgan.
Aholini ijtimoiy himoya qilishni ta’minlashda fuqarolarning o‘zini-o‘zi boshqarish organlari rolini yanada oshirish, uning aniq yo‘naltirilishini kuchaytirish, hududlarni ijtimoiy rivojlantirish borasidagi chora-tadbirlarni amalga oshirishda ushbu organlarning vakolatlarini va mas’uliyatini kengaytirish maqsadida, shuningdek muhtoj oilalarga aniq yo‘naltirilgan ijtimoiy madad ko‘rsatish borasida to‘plangan ijobiy tajribani e’tiborga olib:
1. 1999-yil 1-martidan boshlab aholini ijtimoiy qo‘llab-quvvatlash bo‘yicha amaldagi chora-tadbirlar bilan bir qatorda fuqarolarning o‘zini-o‘zi boshqarish organlari orqali quyidagilarni amalga oshirish maqsadga muvofiq deb topilsin:
ishlamaydigan onalarga bolasi ikki yoshga yetgunga qadar uni parvarish qilish bo‘yicha nafaqalar tayinlash va to‘lash;
o‘zgalarning parvarishiga muhtoj bo‘lgan yolg‘iz pensionyerlarni asosiy oziq-ovqat mahsulotlari bilan ta’minlash.
Belgilab qo‘yilsinki, fuqarolarning o‘zini-o‘zi boshqarish organlari tomonidan aholiga ijtimoiy madad ko‘rsatish chog‘ida ijtimoiy adolat tamoyillariga, qarorlar qabul qilish chog‘ida oshkoralikka, madadning aniq yo‘naltirilishiga rioya etish hamda boqimandalikka yo‘l qo‘ymaslik, shuningdek ajratilgan mablag‘lardan samarali va maqsadli foydalanish asosiy shartlar hisoblanadi.
O‘zbekiston Respublikasi Moliya vazirligi har yilgi budjetlarini shakllantirish chog‘ida fuqarolarning o‘zini-o‘zi boshqarish organlariga ushbu bandda ko‘rsatilgan to‘lovlarni amalga oshirish uchun zarur mablag‘lar ajratib berilishini ko‘zda tutsin.
2 O‘zbekiston Respublikasi Xalq banki fuqarolarning yuridik shaxs huquqiga ega bo‘lgan o‘zini-o‘zi boshqarish organlari uchun “Ishlamaydigan onalarga bolasi ikki yoshga yetgunga qadar uni parvarish qilish bo‘yicha nafaqalar” va “Yolg‘iz pensionyerlarini asosiy oziq-ovqat mahsulotlari bilan ta’minlash” maxsus ilova hisobvaraqlarini ochsin
3. Fuqarolarning o‘zini-o‘zi boshqarish organlari zimmasiga kommunal xizmat korxonalari bilan birgalikda fuqarolarning Xalq banki muassasalari orqali belgilangan tartibda hisob-kitoblarni amalga oshirgan holda foydalanish sarf-xarajatlari hamda kommunal xizmatlariga to‘liq va o‘z vaqtida haq to‘lashlarini tashkil etish hamda nazorat qilish vazifasi yuklansin.
O‘zbekiston Respublikasi Moliya vazirligi va Kommunal xizmat vazirligi o‘y-joy-kommunal xizmatlar haqini aholi to‘liq to‘lashini ta’minlaganlik uchun fuqarolarning o‘zini-o‘zi boshqarish organlarini rag‘batlantirish tizimini joriy etib, bunda quyidagilarni ko‘zda tutsinlar:
foydalanish sarf-xarajatlari va kommunal xizmatlar uchun to‘lovlarning belgilangan tushumlari 100 foiz ta’minlangan taqdirda fuqarolarning o‘zini-o‘zi boshqarish organlariga ana shu tushumlar summasining 20 foizi ajratiladi;
tushumlarning 75 foizdan ko‘prog‘i ta’minlanganda esa fuqarolarning o‘zini-o‘zi boshqarish organlariga tushumlar summasining 10 foizi ajratiladi.
Fuqarolarning o‘zini-o‘zi boshqarish organlariga ushbu mablag‘larni uy-joy-kommunal xizmatlari haqini to‘lash uchun ta’minlangan oilalarga yordam ko‘rsatish, fuqarolarning o‘zini-o‘zi boshqarish organlari xodimlarini rag‘batlantirish, shuningdek mahallalar, posyolkalar, qishloqlar va ovullarni obodonlashtirish ishlarini o‘tkazish uchun maqsadli foydalanishga yo‘naltirish huquqi berilsin.
Keyingi tahrirga qarang.
4. Fuqarolarning o‘zini-o‘zi boshqarish organlariga o‘z mablag‘lari hamda jalb etilgan mablag‘lar hisobidan, shuningdek yuridik va jismoniy shaxslarning ixtiyoriy xayriya mablag‘lari hisobidan moddiy madadga muhtoj bo‘lgan yosh oilalarga har tomonlama yordam ko‘rsatish tavsiya etilsin.
5. Qoraqalpog‘iston Respublikasi Vazirlar Kengashi, viloyatlar, shaharlar va tumanlarning hokimliklari zimmasiga ijtimoiy imtiyozlarni tayinlash chog‘ida oshkoralik va ijtimoiy adolat tamoyillariga rioya etilishi, shuningdek fuqarolarning o‘zini-o‘zi boshqarish organlari tomonidan mablag‘lar qat’iyan aniq maqsad yo‘lida foydalanilishi ustidan doimiy nazoratni ta’minlash vazifasi yuklansin.
6. O‘zbekiston Respublikasi Matbuot davlat qo‘mitasi, O‘zbekiston Milliy axborot agentligi, O‘zteleradio kompaniyasi, ommaviy axborot vositalari fuqarolarning o‘zini-o‘zi boshqarish organlari zimmasiga yuklangan yangi yumushlar hamda vazifalar to‘g‘risida aholi o‘rtasida keng tushuntirish ishlarini olib borsinlar, aholining ijtimoiy himoyasini ta’minlash bo‘yicha fuqarolarning o‘zini-o‘zi boshqarish organlari faoliyati to‘g‘risida axborot berib borsinlar.
7. Ushbu Farmonning bajarilishini nazorat qilish O‘zbekiston Respublikasi Bosh vaziri O‘. Sultonov zimmasiga yuklansin.