Oʻzbekiston Respublikasining “Normativ-huquqiy hujjatlar toʻgʻrisida”gi Qonuni (Oʻzbekiston Respublikasi Oliy Majlisi palatalarining Axborotnomasi, 2012-y., 12-son, 333-modda), Oʻzbekiston Respublikasi Prezidentining 2011-yil 23-avgustdagi PQ-1602-son “Oʻzbekiston Respublikasi Adliya vazirligi faoliyatini yanada takomillashtirish chora-tadbirlari toʻgʻrisida”gi qarori (Oʻzbekiston Respublikasi qonun hujjatlari toʻplami, 2012-y., 29-son, 329-modda) hamda Oʻzbekiston Respublikasi Vazirlar Mahkamasining 2000-yil 5-avgustdagi 304-son “Qonun hujjatlarini turkumlashni takomillashtirish va huquqiy axborotlarni tarqatishni tartibga solish chora-tadbirlari toʻgʻrisida”gi qarori (Oʻzbekiston Respublikasi Hukumati qarorlarining toʻplami, 2000-yil, 8-son, 47-modda)ga muvofiq buyuraman:

1. Normativ-huquqiy hujjatlarni eʼlon qilish va tarqatish, qonun hujjatlari maʼlumotlari elektron bazalari yaratish qoidalari ilovaga muvofiq tasdiqlansin.

2. Mazkur buyruq davlat roʻyxatidan oʻtkazilsin va Idoraviy meʼyoriy hujjatlarni davlat roʻyxatidan oʻtkazish boshqarmasi (B. Boliyev) Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining davlat reyestriga tegishli yozuv kiritsin.

3. Qonun hujjatlarini turkumlash va huquqiy axborot boshqarmasi (S. Nuriyev) ushbu buyruqni “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

4. Mazkur buyruq davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

5. Mazkur buyruq ijrosini nazorat qilish vazirning birinchi oʻrinbosari E. Kanyazov zimmasiga yuklansin.

Ushbu Qoidalar Oʻzbekiston Respublikasining “Normativ-huquqiy hujjatlar toʻgʻrisida”gi Qonuni (Oʻzbekiston Respublikasi Oliy Majlisi palatalarining Axborotnomasi, 2012-y., 12-son, 333-modda), Oʻzbekiston Respublikasi Prezidentining 2011-yil 23-avgustdagi PQ-1602-son “Oʻzbekiston Respublikasi Adliya vazirligi faoliyatini yanada takomillashtirish choralari toʻgʻrisida”gi qarori (Oʻzbekiston Respublikasi qonun hujjatlari toʻplami, 2012-y., 29-son, 329-modda) hamda Oʻzbekiston Respublikasi Vazirlar Mahkamasining 2000-yil 5-avgustdagi 304-son “Qonun hujjatlarini turkumlashni takomillashtirish va huquqiy axborotlarni tarqatishni tartibga solish chora-tadbirlari toʻgʻrisida”gi qaroriga (Oʻzbekiston Respublikasi Hukumati qarorlarining toʻplami, 2000-yil 8-son, 47-modda) muvofiq normativ-huquqiy hujjatlarni eʼlon qilish va tarqatish, shuningdek qonun hujjatlari maʼlumotlari elektron bazalari (qonun hujjatlarining elektron maʼlumot tizimlari) yaratish tartibini belgilaydi.

1. Normativ-huquqiy hujjatlar rasmiy va norasmiy nashrlarda, shu jumladan qonun hujjatlarining elektron maʼlumot tizimlarida, shuningdek davlat va xoʻjalik boshqaruvi organlari, mahalliy davlat hokimiyati organlarining rasmiy veb-saytlarida ularni eʼlon qilish yoʻli bilan tarqatiladi, maxfiy tusga ega boʻlgan yoki eʼlon qilinmaydigan hujjatlar matnlari bundan mustasno.

2. Oʻzbekiston Respublikasining “Normativ-huquqiy hujjatlar toʻgʻrisida”gi Qonuni 29-moddasiga muvofiq quyidagilar normativ-huquqiy hujjatlarni eʼlon qilishning rasmiy manbalari hisoblanadi:

“Oʻzbekiston Respublikasi Oliy Majlisi palatalarining Axborotnomasi”;

“Oʻzbekiston Respublikasi qonun hujjatlari toʻplami”;

“Oʻzbekiston Respublikasi Hukumati qarorlarining toʻplami”;

“Xalq soʻzi” va “Narodnoye slovo” gazetalari;

Oʻzbekiston Respublikasi vazirliklari, davlat qoʻmitalari va idoralarining rasmiy nashrlari;

mahalliy davlat hokimiyati organlarining rasmiy nashrlari.

3. Oʻzbekiston Respublikasi Adliya vazirligi kodekslar va qonun hujjatlari toʻplamlarining, shu jumladan, normativ-huquqiy hujjatlarni eʼlon qilishning rasmiy manbai hisoblangan “Oʻzbekiston Respublikasi qonun hujjatlari toʻplami”ni rasmiy nashr etilishini tashkil etadi.

3¹. Vazirliklar, davlat qoʻmitalari, idoralar va mahalliy davlat hokimiyati organlari tomonidan taʼsis etilgan taʼsis hujjatlarida ularda koʻrsatib oʻtilgan organlar tomonidan qabul qilingan normativ-huquqiy hujjatlarni rasman eʼlon qilish nazarda tutilgan ommaviy axborot vositalari ularning rasmiy nashrlari hisoblanadi.

Vazirliklar, davlat qoʻmitalari va idoralar normativ-huquqiy hujjatni “Oʻzbekiston Respublikasining qonun hujjatlari toʻplami”da rasman eʼlon qilingunga qadar oʻzlarining rasmiy nashrlarida eʼlon qilgan taqdirda bu haqda eʼlon qilingan kundan kechikmay, rasmiy nashr rekvizitlarini koʻrsatgan holda Oʻzbekiston Respublikasi Adliya vazirligiga maʼlum qiladilar.

4. Ushbu Qoidalarning 2 va 3-bandlarida koʻrsatib oʻtilgan normativ-huquqiy hujjatlarni eʼlon qilishning rasmiy manbalari va nashrlar rasmiy nashrlar hisoblanadi.

“Oʻzbekiston Respublikasi Oliy Majlisi palatalarining Axborotnomasi”, “Oʻzbekiston Respublikasi qonun hujjatlari toʻplami”, “Oʻzbekiston Respublikasi Hukumati qarorlarining toʻplami” qonun hujjatlarining rasmiy davriy nashrlari hisoblanadi.

Ushbu Qoidalarning 2 va 3-bandlarida nazarda tutilmagan nashrlar normativ-huquqiy hujjatlarni eʼlon qilishning norasmiy manbalari hisoblanadi (norasmiy nashrlar).

5. Qonun hujjatlarining rasmiy davriy nashrlari davlat tilida, talabni hisobga olgan holda boshqa tillarda ham nashr etiladi.

6. Qonun hujjatlarining rasmiy davriy nashrlariga yangidan qabul qilinadigan normativ-huquqiy hujjatlar matnlari kiritiladi.

Qonun hujjatlarining rasmiy davriy nashrlarida eʼlon qilinadigan normativ-huquqiy hujjatlar izchil xronologik tartibda, tegishli tartib raqamlari boʻlgan moddalarga joylashtiriladi.

Normativ-huquqiy hujjatlarga ilovalar ham hujjatlar joylashtirilgan moddalarga joylashtiriladi.

Agar, qonun hujjatlarining rasmiy davriy nashrlarida normativ-huquqiy hujjatning bir qismi eʼlon qilinayotgan boʻlsa, hujjat nomidan keyin “Koʻchirma” degan yozuv kiritiladi.

7. Rasmiy nashrlarda eʼlon qilinadigan normativ-huquqiy hujjatlar ushbu hujjatni qabul qilgan organ tomonidan rasman yuborilgan (rasmiy tarqatma) normativ-huquqiy hujjat matniga muvofiq boʻlishi kerak.

8. Qonun hujjatlarining rasmiy nashrlarida eʼlon qilinadigan normativ-huquqiy hujjatlar matnini normativ-huquqiy hujjatning rasmiy tarqatma orqali joʻnatilgan matniga yoki normativ-huquqiy hujjatlarni eʼlon qilishning rasmiy manbalarida eʼlon qilingan matniga muvofiqligi matnni bosma mahsulotni eʼlon qilish talablariga muvofiq oʻqish, korrekturasini tekshirish yoʻli bilan taʼminlanadi.

9. Hajmi katta boʻlgan normativ-huquqiy hujjatlarning matni rasmiy davriy nashrlarga kiritilmasligi mumkin. Bunda ular rasmiy davriy nashrlarga ilova koʻrinishida yoki ularni qabul qilgan organlar tomonidan alohida nashr shaklida eʼlon qilinishi kerak.

10. Normativ-huquqiy hujjatlarni eʼlon qilishning rasmiy manbasi “Oʻzbekiston Respublikasi qonun hujjatlari toʻplami”, boshqa qonun hujjatlari toʻplamlari, kodekslarni rasmiy nashr qilishni taʼminlash Oʻzbekiston Respublikasi Adliya vazirligi Qonun hujjatlarini turkumlash va huquqiy axborot boshqarmasi tomonidan amalga oshiriladi.

11. Kodekslar, qonun hujjatlari toʻplamlarini nashr qilishda ular nashr qilinayotgan sanaga mos ravishda nazorat holatiga keltirilgan boʻlishi lozim.

Titul varagʻida eʼlon qilinayotgan normativ-huquqiy hujjatga qaysi sanagacha boʻlgan oʻzgartirish va qoʻshimchalar kiritilganligi koʻrsatiladi.

Normativ-huquqiy hujjatlarning matnlarida eʼlon qilinayotgan normativ-huquqiy hujjatga oʻzgartirish va qoʻshimchalar kirituvchi normativ-huquqiy hujjatning rekvizitlari va rasmiy manbalari quyidagi tartibda koʻrsatiladi:

normativ-huquqiy hujjat yangi tahrirda berilayotgan boʻlsa uning nomi va rekvizitlaridan keyin kursiv bilan qaysi hujjatga asosan yangi tahrirda berilayotganligi koʻrsatiladi;

agar qonunning boʻlimi, kichik boʻlimi, bobi, paragrafi, moddasi yoki boshqa normativ-huquqiy hujjatning boʻlimi, kichik boʻlimi, bandi yangi tahrirda berilayotgan boʻlsa yoxud ularga oʻzgartirish va qoʻshimchalar kiritilgan boʻlsa, boʻlim, kichik boʻlim, bob, paragraf, modda (band) oxirida yangi xatboshida, qaysi normativ-huquqiy hujjatga asosan ular yangi tahrirda berilayotganligi yoxud oʻzgartirish va qoʻshimchalar kiritilayotganligi kursivda koʻrsatiladi;

agar qonun moddasining qismi, bandi, xatboshisi yoki boshqa normativ-huquqiy hujjat bandining xatboshisi yangi tahrirda berilayotgan boʻlsa yoxud ularga oʻzgartirish va qoʻshimchalar kiritilgan boʻlsa, qism, band, kichik band, xatboshi oxirida qaysi normativ-huquqiy hujjatga asosan ushbu norma yangi tahrirda berilayotgani yoxud unga oʻzgartirish va qoʻshimchalar kiritilgani kursivda koʻrsatiladi.

12. Qonun hujjatlari toʻplamlariga huquqning alohida sohasiga tegishli boʻlgan yoxud u yoki bu ijtimoiy munosabatlarni tartibga soladigan qonun hujjatlari kiritiladi.

Qonun hujjatlari toʻplamlariga ushbu toʻplam mavzusiga mos boʻlgan qonun hujjatlari toʻlaligicha yoxud ularning boʻlimi, kichik boʻlimi, bobi, paragrafi, moddasi, bandi va h. k. kiritiladi. Bunda normativ-huquqiy hujjatning nomi, raqami, qabul qilingan sanasi, eʼlon qilingan rasmiy manbasi toʻliq koʻrsatiladi. Agar toʻplamda normativ-huquqiy hujjatning bir qismidan foydalanilgan boʻlsa, nomidan soʻng “Koʻchirma” degan yozuv kiritiladi.

13. Normativ-huquqiy hujjatlarni norasmiy nashrlarda eʼlon qilish barcha davlat organlari va xoʻjalik boshqaruvi organlari, boshqa yuridik shaxslar tomonidan qonun hujjatlarida belgilangan tartibda amalga oshirilishi mumkin.

14. Normativ-huquqiy hujjatlarni norasmiy bosma nashrlarda eʼlon qilish bilan shugʻullanuvchi yuridik shaxslar oʻz faoliyatini litsenziya asosida amalga oshiradi.

15. Norasmiy nashrlarda eʼlon qilinayotgan normativ-huquqiy hujjatlarda, “Normativ-huquqiy hujjatlar toʻgʻrisida”gi Qonunning 25-moddasida koʻrsatilgan barcha rekvizitlar (imzodan tashqari), shuningdek ularni eʼlon qilishning rasmiy manbalari koʻrsatilgan boʻlishi kerak.

16. Normativ-huquqiy hujjatlarni norasmiy nashrlarda eʼlon qilishda, normativ-huquqiy hujjatlarni eʼlon qilishning rasmiy manbalarida eʼlon qilingan normativ-huquqiy hujjatning matnlaridan foydalaniladi.

17. Kodekslar, qonun hujjatlari toʻplamlarini norasmiy nashr qilishda, ushbu Qoidalarning 11 va 12-bandlarida nazarda tutilgan qoidalarga amal qilinishi lozim.

18. Norasmiy nashrlarda normativ-huquqiy hujjatning norasmiy tarjimasi eʼlon qilinishi mumkin. Bunda mazkur tarjimalar norasmiy tarjima ekanligi haqidagi belgiga ega boʻlishi lozim.

19. Normativ-huquqiy hujjatlarning matnlari qonun hujjatlarining elektron maʼlumot tizimlari, shu jumladan Qonun hujjatlari maʼlumotlari milliy bazasi orqali tarqatilishi mumkin.

20. Normativ-huquqiy hujjatlarni qonun hujjatlarining elektron maʼlumot tizimlari orqali tarqatishga, faqatgina normativ-huquqiy hujjat rasmiy nashrlarda eʼlon qilingandan soʻng, rasmiy nashrlarda eʼlon qilingan barcha rekvizitlari (imzodan tashqari) koʻrsatilgan holda yoʻl qoʻyiladi. Bunda normativ-huquqiy hujjatning rasmiy nashrdagi matni soʻzma-soʻz takrorlanishi va ularning nazorat holati taʼminlanmogʻi lozim.

21. Davlat boshqaruvi organlari, mahalliy davlat hokimiyati organlari tomonidan normativ-huquqiy hujjatlar rasmiy veb-saytga normativ-huquqiy hujjat rasman eʼlon qilingandan keyin ikki kundan kechikmay joylashtirilishi kerak.

22. Qonun hujjatlarining elektron maʼlumot tizimlarida joylashtirilgan normativ-huquqiy hujjatning matniga qoʻshilgan norasmiy sharhlar va boshqa tushuntiruvchi maʼlumotlar, oʻzining bayon qilinish usuli boʻyicha (shrifti, rangi va h. k.) farqlanishi lozim.

23. Qonun hujjatlarining elektron maʼlumot tizimlari orqali normativ-huquqiy hujjatlarni tarqatish bilan shugʻullanuvchi shaxslar, oʻz mahsulotini realizatsiya qilishda eʼlon qilinayotgan hujjatlarning nazorat holati qaysi sanagacha taʼminlanganligini koʻrsatishlari lozim.

24. Oʻzbekiston Respublikasi Adliya vazirligi tomonidan Oʻzbekiston Respublikasi qonun hujjatlari maʼlumotlarining turkumlangan davlat yagona elektron bazasi hisoblangan Qonun hujjatlari maʼlumotlari milliy bazasi (keyingi oʻrinlarda — QHMMB)ni yuritish tashkil etiladi.

25. Oʻzbekiston Respublikasi QHMMBga:

Oʻzbekiston Respublikasi Konstitutsiyasi va qonunlari;

Oʻzbekiston Respublikasining xalqaro shartnomalari;

Oʻzbekiston Respublikasi Oliy Majlisi palatalarining qarorlari;

Oʻzbekiston Respublikasi Konstitutsiyaviy sudining qarorlari;

Oʻzbekiston Respublikasi Prezidentining farmonlari, qarorlari va farmoyishlari;

Oʻzbekiston Respublikasi Vazirlar Mahkamasining qarorlari;

idoraviy normativ-huquqiy hujjatlar;

mahalliy davlat hokimiyati organlari qarorlari matnlari kiritiladi.

QHMMBga sudlarning qarorlari va texnik jihatdan tartibga solish sohasidagi normativ hujjatlar matnlari ham kiritilishi mumkin.

26. Qonun hujjatlarini keyinchalik QHMMBga kiritish uchun ishlov berish tartibi Adliya vazirligi huzuridagi Huquqiy axborot bilan taʼminlash markazi tomonidan tasdiqlanadigan normativ hujjatlarni QHMMBga kiritish uchun ishlov berish toʻgʻrisidagi yoʻriqnoma bilan belgilanadi.

27. QHMMBdan foydalanish Internet tarmogʻi orqali tekin amalga oshiriladi.

28. QHMMBdagi normativ-huquqiy hujjatlar Qonunchilik tarmoqlari umumhuquqiy klassifikatori, qonunchilikning mavzuli maʼlumotnomasi va alifbo-predmetli koʻrsatkich hamda normativ-huquqiy hujjatning rekvizitlariga koʻra turkumlanadi.

29. Oʻzbekiston Respublikasi Vazirlar Mahkamasining 2000-yil 5-avgustdagi 304-son qarori bilan tasdiqlangan Meʼyoriy-huquqiy hujjatlarni tarqatish tartibi toʻgʻrisidagi Nizomning 12-bandiga muvofiq, QHMMBda qoʻllangan qonunchilik klassifikatsiyasi Oʻzbekiston Respublikasi davlat va xoʻjalik boshqaruvi organlarida qonun hujjatlarini turkumlashda, shuningdek Oʻzbekiston Respublikasi Qonunchilik tarmoqlari umumhuquqiy klassifikatorini tijorat maqsadlari uchun maʼlumotlarning turkumlangan bazasida qoʻllashda etalon hisoblanadi.

30. QHMMB hujjatlarning kelishiga va ishlov berilishiga qarab, biroq uning rasman eʼlon qilinganidan boshlab bir haftadan kechikmasdan yangilanadi.

31. QHMMBni shakllantirish va doimiy ravishda yangilab borish, belgilangan tartibda elektron maʼlumotlar bazasiga ulashni taʼminlash Oʻzbekiston Respublikasi Adliya vazirligi huzuridagi Huquqiy axborot bilan taʼminlash markazi tomonidan amalga oshiriladi.

32. Agar normativ-huquqiy hujjatni rasmiy nashrlarda eʼlon qilishda uning matnida normativ-huquqiy hujjat rasmiy tarqatmasiga taqqoslaganda xatolarga, matbaa xatosiga, boshqa noaniqlarga yoʻl qoʻyilgan taqdirda, ular aniqlangandan keyin nashrning eng yaqindagi sonida tegishli tuzatishlar eʼlon qilinadi.

Agar kodekslar va qonun hujjatlari toʻplamlarining rasmiy nashrlarida normativ-huquqiy hujjatlar eʼlon qilinishining rasmiy manbai bilan taqqoslaganda xatolarga, matbaa xatolariga, boshqa noaniqliklarga yoʻl qoʻyilgan taqdirda noshir tomonidan ular aniqlangan kundan boshlab 30 kalendar kundan ortiq boʻlmagan muddatda respublika davriy nashrlarida (gazetalar, jurnallar va shu kabilarda) tegishli tuzatishlar eʼlon qilinadi.

Agar norasmiy nashrlarda (gazetalar, jurnallar va shu kabilarda) normativ-huquqiy hujjatlar eʼlon qilinishining rasmiy manbai bilan taqqoslaganda xatolarga, matbaa xatolariga, boshqa noaniqliklarga yoʻl qoʻyilgan boʻlsa, noshir tomonidan ular aniqlangan kundan boshlab 30 kalendar kundan ortiq boʻlmagan muddatda respublika davriy nashrlarida (gazetalar, jurnallar va shu kabilarda) yoki norasmiy nashrning navbatdagi sonini eʼlon qilishda (chiqarishda) tegishli tuzatishlar eʼlon qilinadi.

Agar qonunchilik maʼlumotlari elektron bazalarida normativ-huquqiy hujjatlar eʼlon qilinishining rasmiy manbai bilan taqqoslaganda xatolarga, matbaa xatolariga, boshqa noaniqliklarga yoʻl qoʻyilgan taqdirda, ular darhol bartaraf etilishi kerak.

33. Mazkur Qoidalar talablarini buzganlikda aybdor shaxslar qonun hujjatlariga muvofiq javobgar boʻladi.

34. Ushbu Qoidalar Oʻzbekiston matbuot va axborot agentligi va Oʻzbekiston aloqa va axborotlashtirish agentligi bilan kelishilgan.