“Kichik biznes va xususiy tadbirkorlik yili” Davlat dasturiga muvofiq hamda tadbirkorlik faoliyatini keng rivojlantirish uchun qoʻshimcha qulay shart-sharoitlar yaratish, tadbirkorlik subyektlarini davlat roʻyxatidan oʻtkazish tartibini yanada takomillashtirish va xarajatlarini kamaytirish maqsadida:

1. Oʻzbekiston Respublikasi Iqtisodiyot vazirligi, Adliya vazirligi, Moliya vazirligining 2011-yil 1-iyundan xodimlarining yillik oʻrtacha soni 50 kishidan 100 kishigacha koʻpaytiriladigan kichik korxonalarning faoliyat turlari roʻyxatini 1-ilovaga* muvofiq kengaytirish toʻgʻrisidagi taklifi qabul qilinsin.

2. 2011-yil 1-iyundan quyidagicha tartib belgilansin:

yangi tashkil qilinayotgan masʼuliyati cheklangan va qoʻshimcha masʼuliyatli jamiyatlar ustav fondi (ustav kapitali)ning eng kam hajmi davlat roʻyxatidan oʻtish uchun hujjatlar taqdim etilgan sanada qonunchilikda belgilangan eng kam ish haqi miqdorining qirq baravaridan kam boʻlmasligi kerak;

tadbirkorlik subyektlarini davlat roʻyxatidan oʻtkazish ularning arizasiga koʻra, namunaviy taʼsis hujjatlari asosida amalga oshirilishi mumkin;

tuman (shahar) hokimliklari huzuridagi tadbirkorlik subyektlarini roʻyxatga olish boʻyicha tegishli inspeksiyalarda tadbirkorlik subyektlarini davlat roʻyxatidan oʻtkazish uchun toʻlanadigan davlat boji stavkasi eng kam ish haqi miqdorining bir baravariga tengdir;

tadbirkorlik subyektlarini davlat roʻyxatidan oʻtkazishda notarial tarzda tasdiqlangan taʼsis hujjatlarini taqdim etish haqidagi talab bekor qilinadi, xorijiy investitsiyali korxonalar va chet el sarmoyasi ishtirokidagi boshqa korxonalar bundan mustasno.

3. Oʻzbekiston Respublikasi Adliya vazirligi bir oy muddatda manfaatdor vazirliklar, idoralar va tashkilotlar bilan birgalikda belgilangan tartibda tadbirkorlik subyektlarini davlat roʻyxatidan oʻtkazish uchun zarur boʻlgan namunaviy taʼsis hujjatlarini ishlab chiqsin va tasdiqlasin.

4. Oʻzbekiston Respublikasi Davlat statistika qoʻmitasi 2011-yilning 1-iyunidan muassislar yoki roʻyxatdan oʻtkazuvchi organning elektron buyurtmasiga koʻra, internet tarmogʻi orqali firma nomlarining markazlashgan maʼlumotlar bazasida xoʻjalik yurituvchi subyektning firma nomini zaxira qilib qoʻyish amaliyotini joriy etsin.

5. Oʻzbekiston Respublikasi Iqtisodiyot vazirligi, Adliya vazirligi, Davlat statistika qoʻmitasi Oʻzbekiston Savdo-sanoat palatasi, Milliy axborot agentligi va Milliy teleradiokompaniyasi bilan birgalikda tadbirkorlik subyektlari va aholi oʻrtasida mazkur qarorda koʻzda tutilgan chora-tadbirlarning mazmunini, mamlakatimizda tadbirkorlikni yanada jadal rivojlantirishdagi ularning ahamiyatini ochib beruvchi keng koʻlamli tushuntirish ishlari amalga oshirilishini taʼminlasin.

6. Oʻzbekiston Respublikasi Prezidenti va Oʻzbekiston Respublikasi Hukumatining ayrim qarorlariga 2-ilovaga muvofiq oʻzgartish va qoʻshimchalar kiritilsin.

7. Oʻzbekiston Respublikasi Adliya vazirligi boshqa manfaatdor vazirlik va idoralar bilan birgalikda bir oy muddatda Vazirlar Mahkamasiga qonunchilikka ushbu qarordan kelib chiqadigan oʻzgartish va qoʻshimchalar boʻyicha takliflar kiritsin.

8. Mazkur qaror ijrosini nazorat qilish Oʻzbekiston Respublikasining Bosh vaziri Sh. Mirziyoyev zimmasiga yuklatilsin.

1. Oʻzbekiston Respublikasi Prezidentining 2006-yil 24-maydagi PQ-357-son qarori bilan tasdiqlangan Tadbirkorlik subyektlarini davlat roʻyxatiga olish va hisobga qoʻyishning xabardor qilish tartibi toʻgʻrisidagi Nizomda:

a) II boʻlimning nomlanishi quyidagi tahrirda bayon etilsin:

b) 7—9-bandlar quyidagi tahrirda bayon etilsin:

“7. Oʻzbekiston Respublikasi Davlat statistika qoʻmitasining firma nomlarining markazlashtirilgan maʼlumotlar bazasida soʻrab olinadigan qulay firma nomlarini zaxiraga olish taʼsischilarning oʻzlari tomonidan yoki roʻyxatga olayotgan organ tomonidan elektron talabnoma asosida Internet tarmogʻi orqali amalga oshiriladi.

Elektron zaxiraga olish tizimi va firma nomlarining markazlashtirilgan maʼlumotlar bazasining ishlash tartibi Oʻzbekiston Respublikasi Davlat statistika qoʻmitasi tomonidan belgilanadi.

8. Yuridik shaxslarning firma nomini zaxiraga olish Oʻzbekiston Respublikasining “Firma nomlari toʻgʻrisida”gi Qonuni bilan belgilangan talablarni hisobga olgan holda amalga oshiriladi.

Firma nomini zaxiraga olish uchun taʼsischilar roʻyxatga oluvchi organga ogʻzaki murojaat qilgan taqdirda, roʻyxatga oluvchi organning masʼul xodimlari elektron talabnomani bir soat ichida Internet tarmogʻi orqali rasmiylashtirishlari lozim.

Firma nomini zaxiraga olish uchun elektron talabnomani olgach Oʻzbekiston Respublikasi Davlat statistika qoʻmitasining masʼul xodimlari firma nomlarining markazlashtirilgan maʼlumotlar bazasiga tegishli yozuvni kiritish yoʻli bilan, 8 ish soatidan oshmagan muddatda, qulay firma nomini zaxiraga olish boʻyicha zarur harakatlarni amalga oshirishlari shart.

9. Ogʻzaki murojaat, elektron talabnomani qabul qilish va qulay firma nomlarini zaxiraga olish uchun toʻlov undirilmaydi.

Zaxiraga olingan firma nomining amal qilish muddati zaxiraga olish sanasidan boshlab 60 kunni tashkil qiladi”;

v) 10-bandda:

ikkinchi xatboshi quyidagi tahrirda bayon etilsin:

“davlat tilidagi taʼsis hujjatlarining ikki asl nusxasi (yuridik shaxsni davlat roʻyxatidan oʻtkazuvchi organga taqdim etiladigan taʼsis hujjatlari — ustav yoki taʼsis shartnomasi va ustav yoki faqat taʼsis shartnomasi, bunda masʼuliyati cheklangan hamda qoʻshimcha masʼuliyatli jamiyatlar uchun — taʼsis shartnomasi va ustav, toʻliq va kommandit shirkatlar uchun esa — faqat taʼsis shartnomasi, aksiyadorlik jamiyatlari, xususiy korxonalar, fermer xoʻjaliklari hamda yuridik shaxs boʻlgan dehqon xoʻjaliklari uchun — faqat ustav). Xorijiy investitsiyalar ishtirokidagi korxonalar va xorijiy sarmoya ishtirokidagi boshqa korxonalar uchun notarial tasdiqlangan taʼsis hujjatlari talab etiladi”;

toʻrtinchi xatboshi quyidagi tahrirda bayon etilsin:

“firma nomlarining markazlashtirilgan maʼlumotlar bazasida qulay firma nomi zaxiraga olinganligini tasdiqlaydigan yagona login va parol (keyingi oʻrinlarda — firma nomining zaxiraga olinishi tasdigʻi)”;

g) 18-bandning beshinchi xatboshidagi “bir xil yoki adashtirish darajasida oʻxshash boʻlgan firma nomi mavjud emasligi haqidagi maʼlumotnomada koʻrsatilgan firma nomi bilan mos kelmasligi” soʻzlari “firma nomining zaxiraga olinishi tasdigʻida koʻrsatilgan firma nomiga mos kelmasligi” soʻzlari bilan almashtirilsin;

d) 33-bandning oltinchi xatboshida “firma nomiga bir xil yoki adashtirish darajasida oʻxshash boʻlgan firma nomi mavjud emasligi haqidagi maʼlumotnoma” soʻzlari “firma nomining zaxiraga olinishi tasdigʻi” soʻzlari bilan almashtirilsin;

e) 34-bandning beshinchi xatboshida “bir xil yoki adashtirish darajasida oʻxshash boʻlgan firma nomi mavjud emasligi haqida maʼlumotnoma olish” soʻzlari “firma nomining zaxiraga olinishi tasdigʻi” soʻzlari bilan almashtirilsin.

2. Oʻzbekiston Respublikasi Prezidentining “Tadbirkorlik faoliyatini yanada qoʻllab-quvvatlash va rivojlantirish chora-tadbirlari toʻgʻrisida” 2009-yil 15-maydagi PQ-1112-son qarorining 2-bandida:

a) uchinchi xatboshi chiqarib tashlansin;

b) toʻrtinchi xatboshi uchinchi xatboshi deb hisoblansin.

3. Vazirlar Mahkamasining 2003-yil 20-avgustdagi 357-sonli qarori (Oʻzbekiston Respublikasi QT, 2003-yil, 8-son, 72-modda) bilan tasdiqlangan Tadbirkorlik subyektlarini davlat roʻyxatidan oʻtkazish, hisobga qoʻyish va ruxsat beruvchi hujjatlarni rasmiylashtirish tartibi toʻgʻrisidagi nizomning:

a) 11-bandida:

ikkinchi xatboshi quyidagi tahrirda bayon etilsin:

“davlat tilidagi taʼsis hujjatlarining ikki asl nusxasi (yuridik shaxsni davlat roʻyxatidan oʻtkazuvchi organga taqdim etiladigan taʼsis hujjatlari — ustav yoki taʼsis shartnomasi va ustav yoki faqat taʼsis shartnomasi, bunda masʼuliyati cheklangan hamda qoʻshimcha masʼuliyatli jamiyatlar uchun — taʼsis shartnomasi va ustav, toʻliq va kommandit shirkatlar uchun esa — faqat taʼsis shartnomasi, aksiyadorlik jamiyatlari, xususiy korxonalar, fermer xoʻjaliklari hamda yuridik shaxs boʻlgan dehqon xoʻjaliklari uchun — faqat ustav). Xorijiy investitsiyalar ishtirokidagi korxonalar va xorijiy sarmoya ishtirokidagi boshqa korxonalar uchun notarial tasdiqlangan taʼsis hujjatlari talab etiladi”;

toʻrtinchi xatboshi quyidagi tahrirda bayon etilsin:

“firma nomlarining markazlashtirilgan maʼlumotlar bazasida qulay firma nomi zaxiraga olinganligini tasdiqlaydigan yagona login va parol (keyingi oʻrinlarda — firma nomining zaxiraga olinishi tasdigʻi)”;

b) 15-band quyidagi tahrirda bayon etilsin:

“15. Oʻzbekiston Respublikasi Davlat statistika qoʻmitasining firma nomlarining markazlashtirilgan maʼlumotlar bazasida soʻrab olinadigan qulay firma nomlarini zaxiraga olish taʼsischilarning oʻzlari tomonidan yoki roʻyxatga olayotgan organ tomonidan elektron talabnoma asosida Internet tarmogʻi orqali amalga oshiriladi.

Elektron zaxiraga olish tizimi va firma nomlarining markazlashtirilgan maʼlumotlar bazasining ishlash tartibi Oʻzbekiston Respublikasi Davlat statistika qoʻmitasi tomonidan belgilanadi.

Yuridik shaxslarning firma nomini zaxiraga olishi Oʻzbekiston Respublikasining “Firma nomlari toʻgʻrisida”gi Qonuni bilan belgilangan talablarni hisobga olgan holda amalga oshiriladi.

Firma nomini zaxiraga olish uchun taʼsischilar roʻyxatga oluvchi organga ogʻzaki murojaat qilgan taqdirda, roʻyxatga oluvchi organning masʼul xodimlari elektron talabnomani bir soat ichida Internet tarmogʻi orqali rasmiylashtirishlari lozim.

Firma nomini zaxiraga olish uchun elektron talabnomani olgach Oʻzbekiston Respublikasi Davlat statistika qoʻmitasining masʼul xodimlari firma nomlarining markazlashtirilgan maʼlumotlar bazasiga tegishli yozuvni kiritish yoʻli bilan, 8 ish soatidan oshmagan muddatda, qulay firma nomini zaxiraga olish boʻyicha zarur harakatlarni amalga oshirishlari shart.

Ogʻzaki murojaat, elektron talabnomani qabul qilish va qulay firma nomlarini zaxiraga olish uchun toʻlov undirilmaydi.

Zaxiraga olingan firma nomining amal qilish muddati zaxiraga olish sanasidan boshlab 60 kunni tashkil qiladi”.

v) 57-bandda:

ikkinchi xatboshi quyidagi tahrirda bayon etilsin:

“ochiladigan hisob raqamlari turlari koʻrsatilgan holda ariza”;

beshinchi xatboshi quyidagi tahrirda bayon etilsin:

“yuridik shaxs maqomi bilan faoliyatni amalga oshirayotgan tadbirkorlik subyekti taʼsis hujjatlarining nusxalari (taʼsis shartnomasi, ustav). Xorijiy investitsiyalar ishtirokidagi korxonalar va xorijiy sarmoya ishtirokidagi boshqa korxonalar uchun notarial tasdiqlangan taʼsis hujjatlari talab etiladi”;

g) 72-bandning beshinchi xatboshidagi “yangi firma nomiga bir xil yoki adashtirish darajasida oʻxshash boʻlgan firma nomi mavjud emasligi haqidagi maʼlumotnoma” soʻzlari “firma nomining zaxiraga olinishi tasdigʻi” soʻzlari bilan almashtirilsin.

4. Vazirlar Mahkamasining 2003-yil 11-oktabrdagi 439-son qarori bilan tasdiqlangan Kichik tadbirkorlik (biznes) subyektlariga tegishli boʻlgan korxonalar va tashkilotlar klassifikatsiyasida, “Kichik korxonalar” ustunidagi 30, 32, 71, 72, 74 — 77, 79, 81, 84, 90, 92, 93, 111, 125, 134, 138 — 140, 158, 159, 173, 174, 178, 181, 188, 214 — 216, 282, 283, 286, 303, 326, 337, 349, 352, 354, 366 — 368, 382, 383-satrlardagi “21 — 50” raqamlari “21 — 100” raqamlariga almashtirilsin.