Jahon standartlariga mos keladigan yuqori sifatli raqobatbardosh charm-poyabzal mahsulotlari va zamonaviy qurilish materiallarining yangi turlarini ishlab chiqarishni yanada ko‘paytirish va shu asosda ular bilan ichki iste’mol bozorini yanada to‘liq to‘ldirish hamda eksportga yetkazib berishni kengaytirish maqsadida:

1. Ma’lumot uchun qabul qilinsinki, “Wenzhou Jinsheng Trade Co., Ltd” kompaniyasi (Xitoy Xalq Respublikasi) va “Sinlong” MCHJ (O‘zbekiston Respublikasi) tomonidan xorijiy investitsiyalar ishtirokida mas’uliyati cheklangan jamiyat shaklidagi “Peng Sheng” qo‘shma korxonasi tashkil etilgan bo‘lib, uning ustav kapitali 3,0 mln AQSH dollariga teng, ulushlar muassislar o‘rtasida quyidagicha taqsimlanadi:

“Wenzhou Jinsheng Trade Co., Ltd” kompaniyasi (Xitoy Xalq Respublikasi) — 1 500 ming AQSH dollari (50 foiz);

“Sinlong” MCHJ (O‘zbekiston Respublikasi) — 1 500 ming AQSH dollari (50 foiz).

2. O‘zbekiston Respublikasi Tashqi iqtisodiy aloqalar, investitsiyalar va savdo vazirligi nomidan O‘zbekiston Respublikasi Hukumati bilan “Wenzhou Jinsheng Trade Co., Ltd” kompaniyasi o‘rtasida 2009-yil 28-mayda imzolangan, Sirdaryo viloyatida “Peng Sheng” MCHJ negizida integratsiyalashgan ishlab chiqarish kompleksi faoliyatini tashkil etish bo‘yicha xorijiy investorning aniq majburiyatlarini va uni O‘zbekiston Respublikasi Hukumati tomonidan davlat tomonidan qo‘llab-quvvatlash chora-tadbirlarini belgilovchi Investitsiya shartnomasi tasdiqlansin.

3. Belgilansinki, ko‘rsatib o‘tilgan Investitsiya shartnomasiga muvofiq “Wenzhou Jinsheng Trade Co., Ltd” kompaniyasi:

kamida 26 mln AQSH dollari miqdorida, shu jumladan birinchi bosqichda (2010-yil 1-iyungacha) — 12,3 mln AQSH dollari miqdorida investitsiya kiritish;

2010-yilning ikkinchi yarmidan boshlab xalqaro standartlarga muvofiq bo‘lgan sifatni boshqarish tizimini joriy etishni ta’minlagan holda tayyor charm, poyabzal va keramik plitkalar ishlab chiqarishni boshlashni tashkil etish;

“Peng Sheng” MCHJning tashkil etilayotgan ishlab chiqarish quvvatlarida qo‘shma korxona loyiha quvvatiga chiqqan paytdan boshlab (2011-2012-yillar) 600 ming dona qoramol terisini qayta ishlashni, shuningdek yiliga 4 mln kv. m keramik plitkalar ishlab chiqarishni, 300 ming juft poyabzal ishlab chiqarishni ta’minlash;

ishlab chiqarilayotgan charm va poyabzalning kamida 70 foizini hamda keramik plitkalarning 55 foizini eksport qilishga;

ishlab chiqarishga yollangan xodimlar umumiy sonining kamida 70 foizi miqdorida mahalliy mutaxassislarni jalb etish.

O‘zbekiston Respublikasi Investitsiyalar bo‘yicha davlat qo‘mitasi xorijiy investor tomonidan tuzilgan Investitsiya shartnomasi doirasida qabul qilingan majburiyatlarning so‘zsiz bajarilishi ustidan nazoratni ta’minlasin.

4. O‘zbekiston Respublikasi Prezidentining “To‘g‘ridan-to‘g‘ri xususiy xorijiy investitsiyalarni jalb etishni rag‘batlantirish borasidagi qo‘shimcha chora-tadbirlar to‘g‘risida” 2005-yil 11-apreldagi PF-3594-son Farmoni 1-bandining birinchi xatboshida nazarda tutilgan imtiyozlar yuqorida ko‘rsatib o‘tilgan Investitsiya shartnomasi kuchga kirgan sanadan boshlab 7 yil mobaynida “Peng Sheng” MCHJning xorijiy investitsiyalar ishtirokidagi korxonalariga ishlab chiqarilayotgan mahsulotlarning barcha turlariga tatbiq etilsin.

5. “Peng Sheng” MCHJ:

respublikada ishlab chiqarilmaydigan va qurilish uchun zarur bo‘lgan, Vazirlar Mahkamasi tomonidan tasdiqlanadigan ro‘yxatlar bo‘yicha Sirdaryo viloyatida integratsiyalashgan ishlab chiqarish kompleksini qurish davrida olib kelinadigan texnik hujjatlar, mashinalar, maxsus texnika va mexanizmlar, maxsus transport vositalari (yengil avtomobillardan tashqari), qurilish materiallari va konstruksiyalari;

2012-yilning 1-yanvarigacha Vazirlar Mahkamasi tomonidan tasdiqlanadigan ro‘yxatlar bo‘yicha tayyor charm, charm mahsulotlari, poyabzal va keramik plitalar ishlab chiqarish uchun foydalaniladigan, respublikada ishlab chiqarilmaydigan asbob-uskunalar, xomashyo va materiallar.

6. O‘zbekiston Respublikasi Tashqi ishlar vazirligi “Peng Sheng” MCHJ buyurtmanomalariga binoan mazkur qarorni amalga oshirish doirasida jalb etiladigan xorijiy mutaxassislar va ularning oila a’zolariga kirish vizalari belgilangan tartibda rasmiylashtirilishini ta’minlasin.

7. O‘zbekiston Respublikasi Ichki ishlar vazirligi “Peng Sheng” MCHJning buyurtmanomalari bo‘yicha ko‘p martalik vizalar berilishi va muddati uzaytirilishini, shuningdek, xorijiy mutaxassislar va ularning oila a’zolari vaqtincha yashash joyida vaqtincha ro‘yxatdan o‘tkazilishini va vaqtincha ro‘yxatdan o‘tkazish muddati uzaytirilishini belgilangan tartibda ta’minlasin.

8. O‘zbekiston Respublikasi Mehnat va aholini ijtimoiy muhofaza qilish vazirligi “Peng Sheng” MCHJga ko‘rsatib o‘tilgan loyihani amalga oshirish uchun yuqori malakali xorijiy mutaxassislarni O‘zbekiston Respublikasiga jalb etishga belgilangan tartibda ruxsatnomalar berilishini ta’minlasin.

9. Mazkur qarorning ijrosini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin