Oʻzbekistonda iqtisodiy oʻzgartishlarni kuchaytirish, bozor munosabatlariga oʻtish sharoitida boshqaruvga oid eng maqbul qarorlarni ishlab chiqish va roʻyobga chiqarish uchun davlat qaramogʻida boʻlmagan tuzilmalar va savdo-sanoat doiralari vakillarining keng ishtirok etishini taʼminlash maqsadida:

1. Oʻzbekiston Respublikasi Prezidenti huzuridagi Davlat nazorati komiteti va uning joylardagi organlari tarkibida respublikada iqtisodiy islohotni amalga oshirish masalalariga doir qarorlar bajarilishini nazorat qiluvchi jamoat komissiyalari tashkil etilsin.

Belgilab qoʻyilsinki,

jamoat komissiyalari eng tajribali va xolis tadbirkorlar, fermerlar va savdo sanoat doiralarining boshqa vakillaridan tuziladi, komissiyalarning raislari va aʼzolari esa Oʻzbekiston Respublikasi Prezidenti huzuridagi Davlat nazorati komiteti hamda uning respublika hududlaridagi boʻlinmalari tizimi rahbarlari va xodimlari uchun berilgan barcha vakolatlar va huquqlarga ega boʻladilar;

respublika komissiyasining raisi ayni vaqtda Davlat nazorati komiteti raisining jamoatchilik asosidagi oʻrinbosaridir va Oʻzbekiston Respublikasi Prezidentining Farmoni bilan lavozimga tayinlanadi;

viloyat, shahar va rayon komissiyalarining raislari ham respublika davlat nazorati hududiy organlari rahbarlarining jamoatchilik asosidagi oʻrinbosarlaridirlar va Oʻzbekiston Respublikasi Prezidenti huzurida Davlat nazorati komitetining raisi tomonidan tayinlanadilar.

2. Quyidagilar komissiyalar faoliyatining asosiy vazifalari va yoʻnalishlari qilib belgilansin:

— iqtisodiy islohotlar masalalariga doir normativ hujjatlar majmui bajarilishini idoralararo nazorat qilish organlari ishini muvofiqlashtirish;

— korxonalar va xoʻjaliklar mustaqilligini kengaytirishga, bozor tuzilmalari va tarkibiy qismlarini vujudga keltirishga, koʻp tarmoqli iqtisodiyotni shakllantirishga, tadbirkorlikni, jumladan tashqi iqtisodiy sohadagi tadbirkorlikni kuchaytirishga qaratilgan Prezident farmonlarini va Oʻzbekiston Hukumati qarorlarini vazirliklar va idoralar, konsernlar, assotsiatsiyalar, korxonalar va xoʻjaliklar, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari qanday bajarayotganliklarini tekshirishni yoʻlga qoʻyish;

— joylarda ana shu sohalarda ijroiya intizomi holatini oʻrganish, bozor iqtisodiyotiga izchil oʻtishni taʼminlashga qaratilgan normativ hujjatlarning dastlabki loyihalarini tayyorlashda qonun chiqaruvchi va ijroiya hokimiyat organlari, shuningdek turli iqtisodiy tuzilmalar bilan hamkorlik qilish;

— respublikaning muayyan korxonalarida, xoʻjaliklarida va hududlari va iqtisodiy islohotlar qanday amalga oshirilayotganligini tahlil qilish va bundan Oʻzbekiston Hukumatini xabardor etish;

— amaldagi normativ hujjatlarning moliyaviy va xoʻjalik mexanizmlariga oʻzgarishlar va qoʻshimchalar kiritish, respublikada iqtisodiy islohotlarni roʻyobga chiqarishni kuchaytirish va jadallashtirishga qaratilgan boshqaruvga oid qabul qilinayogan qarorlar hamda qonun hujjatlarining huquqiy asosini yanada takomillashtirishga doir tavsiyalar va takliflar ishlab chiqish.

3. Oʻzbekiston Respublikasi Prezidenti huzuridagi davlat nazorati komiteti bir hafta muddat ichida iqtisodiy islohotni amalga oshirish masalalariga doir qarorlar bajarilishini nazorat qiluvchi jamoat komissiyalari toʻgʻrisidagi Nizomni tasdiqlasin.