1999-yil 16-fevralda Toshkent shahrida sodir etilgan, odamlarning qurbon bo‘lishiga olib kelgan, fuqarolarga, davlat va jamoat tashkilotlariga moddiy va ma’naviy zarar yetkazgan terrorchilik harakatlari munosabati bilan, shuningdek uy-joy va noturar joy binolaridan O‘zbekiston Respublikasiga, tinchlik va xavfsizlikka, fuqarolarning hayoti va sog‘lig‘iga qarshi jinoyatlar sodir etish uchun foydalanishga yo‘l qo‘ymaslik hamda jinoyatchilikka qarshi kurashni kuchaytirish maqsadida Vazirlar Mahkamasi qaror qiladi:

1. Belgilab qo‘yilsinki:

yuridik va jismoniy shaxslar, shuningdek binolarning egalari tomonidan uy-joy va noturar joy binolari berilgan shaxslar tomonidan davlatga xoinlik qilish, konstitutsiyaviy tuzumga, O‘zbekiston Respublikasi Prezidentiga tajovuz qilish, qo‘poruvchilik, terrorizm, bosqinchilik, talonchilik, qasddan odam o‘ldirish hamda boshqa o‘ta og‘ir va og‘ir jinoyatlar sodir etish hollari aniqlangan taqdirda ushbu binolar tegishli huquqni muhofaza qilish organlarining surishtiruv va tergov organlari qarori bo‘yicha ular o‘zgalarga berilmasligi uchun xatlanadi;

agar ayblanuvchining jinoyat sodir etishdagi aybi isbotlangan bo‘lsa, u ushlangan yoki qidiruvda bo‘lsa, shuningdek ayblov hukmi qonuniy kuchga kirgandan keyin ushbu uy-joy va noturar joy binolari belgilangan tartibda davlat daromadiga musodara qilinadi.

2. O‘zbekiston Respublikasi Adliya vazirligi O‘zbekiston Respublikasi Prokuraturasi, Ichki ishlar vazirligi, Milliy xavfsizlik xizmati, Oliy sudi bilan birgalikda o‘n kun muddatda O‘zbekiston Respublikasi qonun hujjatlariga o‘zgartirish va qo‘shimchalar haqida takliflar kiritsin.

3. Mazkur qarorning bajarilishini nazorat qilish O‘zbekiston Respublikasi Adliya vaziri S.M. Mirsafoyev va O‘zbekiston Respublikasi Bosh prokurori U.Ch. Xudoyqulov zimmasiga yuklansin.