LexUZ sharhi
Mazkur Farmon O‘zbekiston Respublikasi Prezidentining 2018-yil 9-yanvardagi PF-5298-sonli “O‘zbekiston Respublikasi Prezidentining ayrim hujjatlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida”gi Farmoniga asosan o‘z kuchini yo‘qotgan.
Etishtirilgan paxta xomashyosi uchun hisob-kitoblar chog‘ida shartnoma-moliya intizomiga rioya etilishi ustidan ta’sirchan nazoratni ta’minlash, paxta tayyorlashga oid hisob va hisobotlarning buzilishiga yo‘l qo‘ymaslik maqsadida:
1. “O‘zpaxtasanoat” uyushmasi ijro etuvchi apparati tuzilmasidagi Nazorat-taftish bosh boshqarmasi tugatilsin.
2. O‘zbekiston Respublikasi Moliya vazirligining Nazorat-taftish bosh boshqarmasi tarkibida Paxta tozalash sanoati korxonalarida hisob va hisobotning to‘g‘riligini nazorat qilish boshqarmasi (bundan buyog‘iga — Boshqarma deb yuritiladi) tashkil etilsin.
paxta xomashyosini tayyorlash, saqlash, qayta ishlash, paxta mahsuloti ishlab chiqarish va uni sotish bo‘yicha statistika hamda buxgalteriya hisobot ma’lumotlarining to‘g‘riligi ustidan nazoratni amalga oshirish;
paxta tozalash korxonalari tomonidan qabul qilinadigan, saqlanadigan va qayta ishlanadigan paxta xomashyosining miqdori va sifati bo‘yicha ma’lumotlar nazorat va taftish qilinishini, xomashyoni qayta ishlash chog‘ida olinadigan paxta tolasi, paydo bo‘ladigan kuyindilar hamda boshqa chiqindilarning belgilangan me’yorlariga rioya etilishini ta’minlash;
navlarni joylashtirishning o‘rnatilgan tartibiga rioya etilishi, belgilangan standartlarga va seleksiya navlari joylashtirilishiga muvofiq urug‘lik chigitlar tayyorlanishi hamda paxtakor xo‘jaliklarning ular bilan ta’minlanishi monitoringini amalga oshirish;
paxta xomashyosi hamda ishlab chiqariladigan paxta mahsulotlarining miqdori va sifatini hamda ularning hisobotda aks ettirilishini baholash bo‘yicha tekshirishlarni tashkil qilish va o‘tkazish metodologiyasini ishlab chiqib takomillashtirish.
4. O‘zbekiston Respublikasi Moliya vazirligining Nazorat-taftish bosh boshqarmasiga paxta tayyorlash, uni saqlash va qayta ishlashning butun davri mobaynida O‘zbekiston Respublikasi Moliya vaziri tomonidan tasdiqlangan maxsus jadvallar bo‘yicha paxta tozalash korxonalarini tayyorlanayotgan, qayta ishlanayotgan va saqlanayotgan paxta xomashyosining miqdori hamda sifati, paxta tolasi va paxta mahsulotining sotilishi masalalari bo‘yicha tekshirish hamda taftishlar o‘tkazish, shuningdek, paxtakor xo‘jaliklarning sifatli urug‘lik chigit bilan ta’minlanishini hamda g‘o‘za navlarini joylashtirish bo‘yicha belgilangan topshiriqlarga rioya etilishini tekshirib turish huquqi berilsin.
5. “Respublika paxta tozalash sanoatini monopoliyadan chiqarish va boshqarishni takomillashtirish chora-tadbirlari to‘g‘risida” O‘zbekiston Respublikasi Prezidentining 2001-yil 11-iyundagi PF-2874-son Farmoni 2-bandining beshinchi xatboshi va 4-bandining ikkinchi xatboshi o‘z kuchini yo‘qotgan deb hisoblansin.
6. O‘zbekiston Respublikasi Vazirlar Mahkamasi o‘n kun muddatda ushbu Farmonni amalga oshirish yuzasidan qaror qabul qilsin.