Vazirlar Mahkamasi mamlakatimiz farmatsevtika industriyasini davlat tomonidan qoʻllab-quvvatlash uch yil ichida dori-darmon vositalari va tibbiyot buyumlari ishlab chiqarish hajmini 2,5 baravar, ular turlarini 253 nomga yetkazgan holda 1,7 baravari koʻpaytirish imkonini berganligini qayd etadi. “Oʻzfarmsanoat” konserni korxonalari tomonidan ishlab chiqarilayotgan dori-darmon vositalari bilan aholi ehtiyojlarini qondirish darajasi 3 baravar oʻsdi. Xorijiy investitsiya ishtirokida tashkil etilgan qoʻshma korxonalar konsern ishlab chiqarishi umumiy hajmining 65 foizini taʼminlamoqda.

dori-darmon vositalari va tibbiyot buyumlarining eng muhim turlarini va ularni ishlab chiqarish hajmlarini kengaytirish, zamonaviy, shu jumladan xorijiy investorlar ishtirokidagi farmatsevtika ishlab chiqarishlari barpo etish, tayyor dori-darmonlar importini qisqartirish va dori-darmonlar narxlarining asossiz oʻsishiga yoʻl qoʻymaslik maqsadida Vazirlar Mahkamasi qaror qiladi:

1. Davolash muassasalari va aholini dori-darmon vositalari bilan taʼminlashni nazorat qilish respublika komissiyasi tomonidan Oʻzbekiston Respublikasi Sogʻliqni saqlash vazirligi va “Oʻzfarmsanoat” davlat-aksiyadorlik konserni bilan birgalikda 2002-yilgacha boʻlgan davrda mavjud va yangidan tashkil etiladigan korxonalarda, shu jumladan xorijiy investitsiyalar ishtirokidagi korxonalarda farmatsevtika mahsulotlari ishlab chiqarishni yanada koʻpaytirish dasturi ishlab chiqilganligi dasturda:

dori-darmon preparatlari va tibbiyot buyumlari ishlab chiqarish hajmlarini 3,5 baravarga koʻpaytirish;

ishlab chiqarilayotgan mahsulot turlarini 1,6 baravarga kengaytirish nazarda tutilganligi maʼlumot uchun qabul qilinsin.

2. Oʻzbekiston Respublikasi Vazirlar Mahkamasining 1996-yil 14-avgustdagi 283-son qarorida “Oʻzfarmsanoat” konserni korxonalari va tashkilotlari uchun nazarda tutilgan umumdavlat hamda mahalliy soliqlar va yigʻimlarning barcha turlari boʻyicha budjetga toʻlanadigan summaning 50 foizi miqdoridagi imtiyozlar 2000-yil 1-yanvardan boshlab 3 yil muddatga uzaytirilsin, boʻshab qolgan mablagʻlar farmatsevtika mahsulotlari ishlab chiqarishni rivojlantirish dasturi doirasida mavjud ishlab chiqarishlarni zamonaviylashtirish va yangilarini barpo etishga maqsadli yoʻnaltirilsin.

3. 2000-yil 1-yanvardan boshlab “Oʻzfarmsanoat” konserni korxonalari va tashkilotlari, shu jumladan qoʻshma korxonalar dori-darmonlar va tibbiyot buyumlari ishlab chiqarish uchun import qilinadigan moddiy resurslar va butlovchi buyumlarga solinadigan qoʻshilgan qiymat soligʻi toʻlashdan 3 yil muddatga ozod qilinsin.

4. “Oʻzfarmsanoat” konsernining konsern huzurida Rivojlantirish jamgʻarmasi tashkil etish, soliq solishdan ozod qilinadigan mablagʻlarni ushbu jamgʻarmada toʻplash haqidagi taklifiga rozilik berilsin.

Belgilansinki, Rivojlantirish jamgʻarmasi mablagʻlari:

alohida bank hisob raqamida toʻplanadi, “Oʻzfarmsanoat” konserni uni tasarruf etuvchi hisoblanadi;

ilmiy ishlanmalarni mablagʻ bilan taʼminlash, konsern korxonalari va tashkilotlarini rekonstruksiya qilish va texnika bilan qayta jihozlash, shuningdek dori-darmon vositalari va tibbiyot buyumlari ishlab chiqarishni taʼminlovchi infratuzilmani tashkil etish va yangilash uchun foydalaniladi;

har yili konsern tomonidan Oʻzbekiston Respublikasi Moliya vazirligi bilan kelishgan holda tasdiqlanadigan smetaga muvofiq sarflanadi.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H.S.Karomatov zimmasiga yuklansin.