“Oʻzbekiston Respublikasi Oliy Majlisi 1997-yil 24-aprelda qabul qilgan “Oʻzbekiston Respublikasining Soliq kodeksini amalga kiritish tartibi toʻgʻrisida”gi 397-1-sonli qarorga oʻzgartish kiritish haqida” Oʻzbekiston Respublikasi Oliy Majlisining 2001-yil 7-dekabrdagi 321-II-sonli qaroriga muvofiq hamda jismoniy shaxslarning jami daromadini deklaratsiyalash tizimini respublikada bosqichma-bosqich joriy etishni taʼminlash maqsadida:

1. 2002—2005-yillardagi davrda Oʻzbekiston Respublikasida jismoniy shaxslarning jami daromadini deklaratsiyalashning xalqaro meʼyorlarga mos keladigan tizimini bosqichma-bosqich joriy etish yuzasidan tayyorgarlik chora-tadbirlari majmuini amalga oshirish maqsadga muvofiq deb topilsin.

Oʻzbekiston Respublikasi Davlat soliq qoʻmitasi, Moliya vazirligi bir oy muddatda jismoniy shaxslarning jami daromadini deklaratsiyalash tizimini bosqichma-bosqich joriy etishni taʼminlaydigan 2002—2005-yillarga moʻljallangan chora-tadbirlarning aniq dasturi va jadvalini 2003-yil 1-yanvaridan boshlab olingan daromadlar boʻyicha ishlab chiqsin hamda Vazirlar Mahkamasiga kiritsin.

2. Oʻzbekiston Respublikasi Vazirlar Mahkamasi tegishli vazirliklar, idoralar, jamoat tashkilotlari, chet el iqtisodiy tuzilmalari va ekspertlarini jalb etgan holda ikki oy muddatda “Jismoniy shaxslarning jami yillik daromadini deklaratsiyalash toʻgʻrisida” Oʻzbekiston Respublikasi Qonuni loyihasini ishlab chiqsin va belgilangan tartibda Oʻzbekiston Respublikasi Oliy Majlisiga kiritsin.

3. Quyidagilar belgilansin:

jami daromadni deklaratsiyalash mexanizmini ishlab chiqish va amalga oshirish chogʻida fuqarolarning konstitutsiyaviy va mulkiy huquqlari buzilishiga, ularning daromadlari va mol-mulki miqdorlari toʻgʻrisidagi maʼlumotlar oshkor etilishiga, fuqarolarning shaxsiy turmushiga aralashishga hamda boshqa suiisteʼmolchiliklar va huquqbuzarliklarga qatʼiyan yoʻl qoʻyilmaydi;

jismoniy shaxslarning daromadlari va mol-mulki bilan bogʻliq axborot hamda hujjatlardan foydalanish tartibini buzishga yoʻl qoʻygan mansabdor shaxslar javobgarlikka, hatto jinoiy javobgarlikka ham tortiladilar.

4. Amaldagi qonunchilikka muvofiq, hozirgi vaqtda jismoniy shaxslar asosiy ish joyidan tashqarida olayotgan daromadlar, shuningdek jismoniy shaxs tomonidan uni yakka tartibdagi tadbirkor sifatida davlat roʻyxatidan oʻtkazmagan holda bir marotabalik operatsiyalar (savdo, ish, xizmatlar)ni amalga oshirishdan oladigan daromadlari deklaratsiya qilinishi lozimligi maʼlumot uchun qabul qilinsin.

5. Oʻzbekiston Respublikasi Davlat soliq qoʻmitasiga jismoniy shaxslarning jami daromadini deklaratsiyalash tizimi joriy etilgunga qadar fuqarolarning daromadlarini ixtiyoriy ravishda deklaratsiyalash tizimini puxtalashtirish boʻyicha tanlab olish yoʻli bilan tajriba tariqasida ish olib borish huquqi berilsin.

Oʻzbekiston Respublikasi Davlat soliq qoʻmitasi xorijiy mamlakatlarda jismoniy shaxslarning daromadlarini deklaratsiyalash tajribasini chuqur oʻrgansin hamda ularni inobatga olgan holda deklarantlar tomonidan oʻz daromadlari toʻgʻrisidagi maʼlumotlarni ixtiyoriy ravishda taqdim etilishini ragʻbatlantirish mexanizmini, shuningdek ularning javobgarlik choralarini, jumladan zarur maʼlumotlarni taqdim etmaganlik va daromadlarni atayin yashirganligi uchun qonunchilikda koʻzda tutilgan jazolarni qoʻllash choralarini ishlab chiqsin.

6. Belgilab qoʻyilsinki, fuqarolarning respublika tijorat banklaridagi depozit hisobvaragʻlariga qoʻyiladigan naqd mablagʻlari deklaratsiya qilinmaydi va ularning kelib chiqish manbalari tasdiqlanishi talab etilmaydi.

7. Oʻzbekiston Respublikasi Davlat soliq qoʻmitasi:

Oʻzbekiston Respublikasi Moliya vazirligi va Adliya vazirligi, Oʻzbekiston Teleradiokompaniyasi bilan birga jismoniy shaxslarning jami daromadlarini deklaratsiyalash tizimini joriy etish maqsadlari haqida ommaviy axborot vositalari orqali aholi oʻrtasida keng tushuntirish ishlari olib borilishini taʼminlasin;

2003-yilning 1-iyuliga qadar Oʻzbekiston Respublikasi Davlat soliq qoʻmitasi huzurida jismoniy shaxslar tomonidan taqdim etilgan daromadlar (daromad manbalari) toʻgʻrisidagi deklaratsiyalarni hamda deklaratsiyalash bilan bogʻliq boshqa axborotni qayta ishlash Markazini tashkil etish va uni deklaratsiyalarni qayta ishlash uchun zarur texnika bilan jihozlashni koʻzda tutsin;

2003-yilning 1-sentabriga qadar soliq organlariga maʼlumotlarni elektron vositalar yordamida taqdim etish hamda soliq nazoratini amalga oshirish maqsadida ularga ishlov berish imkonini yaratadigan dasturiy mahsulotlar ishlab chiqish va ulardan tajriba tariqasida foydalanishni taʼminlasin.

8. Mazkur Farmonning ijrosini nazorat qilish Oʻzbekiston Respublikasi Bosh vaziri Oʻ.T. Sultonov zimmasiga yuklatilsin.

9. Ushbu Farmon matbuotda eʼlon qilinsin.