Vazirlar Mahkamasi qayd etadiki, respublikada qishloq xo‘jaligi korxonalarini va mashina-traktor parklarini yangi yuqori unumli texnika bilan ta’minlash chora-tadbirlari izchillik bilan amalga oshirilmoqda.

Shu bilan birga, o‘tkazilgan tekshirishlar mavjud texnika imkoniyatlaridan xo‘jasizlarcha foydalanilayotganligini, traktorlar va qishloq xo‘jaligi mashinalarini saqlash, ishlatish va ularga xizmat ko‘rsatish qoidalari buzilayotganligini ko‘rsatmoqda.

Ko‘pgina xo‘jaliklarda mashina-traktor saroylarida tartib o‘rnatishga zarur e’tibor berilmayapti, texnikani saqlash uchun bostirmalar va jihozlangan maydonchalar yetishmaydi. Mexanizatorlarni va mutaxassislarni mashina va mexanizmlarning saqlanishi va ulardan unumli foydalanilishi uchun moddiy rag‘batlantirish choralari amalda qo‘llanilmayapti.

Mexanizator kadrlarni tayyorlash ishlari tizimsiz olib borilmoqda. Jizzax, Samarqand, Sirdaryo va Xorazm viloyatlarida birinchi klassli traktorchi-mashinistlar soni respublikadagi o‘rtacha 38 foizga nisbatan bor-yo‘g‘i 28-30 foizni tashkil etmoqda.

Qoraqalpog‘iston Respublikasi Vazirlar Kengashi, viloyatlar va tumanlar hokimliklari, Qishloq va suv xo‘jaligi vazirligi hamda unga qarashli “Boshdavtexnazorat” inspeksiyasi, “O‘zqishloqxo‘jalikta’minottuzatish” davlat-kooperativ qo‘mitasi xo‘jaliklar rahbarlari va mutaxassislarining mashinalarni ishlatish, ularga texnika xizmati ko‘rsatish va ularni saqlashni tashkil etishga bo‘lgan mas’uliyatsizlarcha munosabatlariga murosasozlik qilmoqdalar, bu muhim ishdagi jiddiy kamchiliklarni bartaraf etish yuzasidan zarur chora-tadbirlar ko‘rmayaptilar.

Qishloq xo‘jaligidagi mavjud texnikaning saqlanishida va ularni ishlatishda zarur tartib o‘rnatish, ulardan foydalanish samaradorligini oshirish maqsadida Vazirlar Mahkamasi qaror qiladi:

1. O‘zbekiston Respublikasi Qishloq va suv xo‘jaligi vazirligi, “O‘zqishloqxo‘jalikta’minottuzatish davlat-kooperativ qo‘mitasi, Qoraqalpog‘iston Respublikasi Vazirlar Kengashi va viloyatlar hokimliklari mavjud qishloq xo‘jaligi texnikasidan samarali foydalanish uchun talabchanlikni susaytirib yuborganliklari, bu ishda nazorat o‘rnatmaganliklari, mansabdor shaxslarning mashinalardan foydalanish va ularni ishlatish qoidalarini buzish kabi xatti-harakatlariga qat’iy baho bermayotganligi qayd etilsin.

Qishloq va suv xo‘jaligi vazirligi, “O‘zqishloqxo‘jalikta’minottuzatish davlat-kooperativ qo‘mitasi, Qoraqalpog‘iston Respublikasi Vazirlar Kengashi va viloyatlar hokimliklari rahbarlaridan texnikani saqlashdagi, mavjud har bir traktor va har bir qishloq xo‘jaligi mashinasini avaylab saqlash va ulardan unumli foydalanishdagi kamchiliklarga barham berish yuzasidan kechiktirib bo‘lmaydigan chora-tadbirlar ko‘rish talab qilinsin.

Prokuratura organlari tomonidan texnikani saqlash va ishlatish qoidalarini buzish hollari bo‘yicha 44 ta, shu jumladan, Oq oltin, Zomin, Zarbdor, To‘rtko‘l, Namangan va boshqa bir qancha tumanlar qishloq xo‘jaligi korxonalari rahbarlari ustidan jinoiy ish qo‘zg‘atilganligi ma’lumot uchun qabul qilinsin.

2. Qoraqalpog‘iston Respublikasi Vazirlar Kengashi raisi (Tojiyev), Jizzax (Mirziyoyev), Qashqadaryo (Begmatov), Navoiy (Dilov), Surxondaryo (Noraliyev), Sirdaryo (Ismoilov) va Toshkent (Mirzaqulov) viloyatlari hokimlariga qishloq xo‘jaligi texnikasini saqlash va ishlatishdagi ko‘plab xo‘jasizlik hollari mavjudligi, bu esa dehqonchilik va chorvachilik samaradorligiga salbiy ta’sir etayotganligi ko‘rsatib o‘tilsin.

Ularga Bo‘zatov (Jumanov A.), Forish (Eshboyev S.), Bahoriston (Tojiyev X.), Xatirchi (Safarov A.), Denov (Mengliyev T.) va Bekobod (Bo‘riboyev) tumanlari hokimlarining mashina-traktor saroylarida tartib o‘rnatish ishlarini qoniqarsiz tashkil etganliklari uchun javobgarliklarini ko‘rib chiqish topshirilsin.

3. O‘zbekiston Respublikasi Qishloq va suv xo‘jaligi vazirligi tomonidan o‘tkazilgan texnika ko‘rigi yakunlariga ko‘ra 14334 traktor, shu jumladan, 5168 haydov va 4511 chopiq traktorlari, 1584 g‘alla va sholi o‘rish-yig‘ish kombaynlari, 5521 paxta terish mashinasi (traktorlarsiz), 8575 traktor tirkamasi, 7 mingdan ortiq ekish, tuproqqa ishlov berish va boshqa qishloq xo‘jaligi mashinalari bundan buyon foydalanish uchun yaroqsiz deb topilganligi va qishloq xo‘jaligi korxonalari va mashina-traktor parklari balansidan chiqarilganligi ma’lumot uchun qabul qilinsin.

4. O‘zbekiston Respublikasi Qishloq va suv xo‘jaligi vazirligi, “O‘zqishloqxo‘jalikta’minottuzatish” davlat-kooperativ qo‘mitasi, Qoraqalpog‘iston Respublikasi Vazirlar Kengashi, viloyatlar hokimliklari xo‘jaliklar balansida qolgan texnikaning ish qobiliyatini tiklashni tashkil etsinlar, ulardan samarali foydalanilishini, hisobdan chiqarilgan mashinalarni qismlarga ajratishdan so‘ng kirim qilingan uzel va agregatlar oqilona ishlatilishini, shuningdek texnikani ishdan tashqari davrda saqlash qoidalariga qat’iy rioya qilinishini ta’minlasinlar.

Ushbu maqsadlarda:

ikki oy muddatda texnikadan foydalanish, uni tuzatish, unga texnika xizmati ko‘rsatish va uni saqlash masalalari bo‘yicha me’yoriy-texnik hujjatlarni qayta ko‘rib chiqsinlar, ularning davlat tilida nashr etilishini tashkil etsinlar, mashina-traktor saroyi to‘g‘risidagi Nizomni, shuningdek “Qishloq xo‘jaligida foydalaniladigan texnikani saqlash qoidalari” davlat tarmoq standartlarini ishlab chiqsinlar va tasdiqlasinlar;

ustaxonalar, texnika xizmati ko‘rsatish joylari va neft mahsulotlari omborlarini tuzatish-texnologiya asbob-uskunalari bilan butlasinlar, zarur hollarda yetishmaydigan uskunalar, priborlar, asboblar va moslamalar tayyorlanishini tashkil etsinlar, barcha xo‘jaliklar va mashina-traktor parklarida texnikani tuzatish, unga texnika xizmati ko‘rsatish va uni saqlash xizmatlarini tajribali mutaxassislar bilan mustahkamlasinlar;

mexanizatorlarni, tuzatish-xizmat ko‘rsatish xodimlarini texnikani avaylab saqlaganligi va undan samarali foydalanganligi, yonilg‘i-moylash materiallarini tejab sarflaganligi uchun moddiy rag‘batlantirish tartibini ishlab chiqsinlar va joriy etsinlar.

5. O‘zbekiston Respublikasi Qishloq va suv xo‘jaligi vazirligi “O‘zqishloqxo‘jalikta’minottuzatish” davlat-kooperativ qo‘mitasi bilan birgalikda texnikani ishlatish, tuzatish, unga xizmat ko‘rsatish, avaylab saqlash va uni hisobdan chiqarish qoidalariga rioya qilinishi, malakali mexanizatorlar bilan butlanishi ustidan muntazam nazoratni ta’minlasinlar.

Mashinalarni texnik ishlatish va saqlash qoidalarini buzish hollari bo‘yicha materiallar xo‘jaliklar va mashina-traktor parklari rahbarlarini javobgarlikka tortish yuzasidan jinoiy ish qo‘zg‘atish uchun tergov organlariga oshirilsin.

6. “O‘zqishloqxo‘jalikta’minottuzatish” davlat-kooperativ qo‘mitasi “O‘zqishloqxo‘jalikmash-xolding” kompaniyasi va “O‘zmashsanoat” uyushmasi bilan birgalikda xo‘jaliklardagi mavjud texnikaning ish qobiliyatini tiklash uchun ehtiyot qismlar tayyorlash, shuningdek ko‘chma yonilg‘i quyish va payvandlash agregatlari, neft xo‘jaligi asbob-uskunalari, sinov stendlari, diagnostika va o‘lchov priborlari ishlab chiqarish dasturini ikki oy muddatda ishlab chiqsin.

7. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B.Olimjonov zimmasiga yuklansin.

Qarorning bajarilishi to‘g‘risida 1999-yilning 1 yarim yilligi yakunlari bo‘yicha axborot berilsin.