Transafg‘on temir yo‘l yo‘lagini rivojlantirish, Toshguzar — Boysun — Qumqo‘rg‘on temir yo‘lida tranzit tashishlarni ko‘paytirish, respublika korxonalarining eksport salohiyatini kengaytirish maqsadida Vazirlar Mahkamasi qaror qiladi:

1. Quyidagilar:

Osiyo Taraqqiyot Banki Direktorlar kengashi tomonidan 2009-yil 30-sentabrda “Xayraton va Mozori Sharif o‘rtasidagi temir yo‘l liniyasini loyihalashtirish, qurish, o‘rnatish va foydalanishga topshirish” loyihasini moliyalashtirish uchun Afg‘oniston Islom Respublikasiga grant berish to‘g‘risida qaror qabul qilinganligi, shuningdek loyihani amalga oshirish bo‘yicha bosh pudratchi etib “O‘zbekiston temir yo‘llari” davlat-aksiyadorlik kompaniyasi tanlanganligi;

“O‘zbekiston temir yo‘llari” davlat-aksiyadorlik kompaniyasi bilan Afg‘oniston Islom Respublikasining Jamoat ishlari vazirligi o‘rtasida temir yo‘l qurish uchun 129,0 mln AQSh dollari summasida kontrakt tuzish kelishilganligi ma’lumot uchun qabul qilinsin.

2. Belgilansinki, ko‘rsatib o‘tilgan loyihani amalga oshirishda:

“O‘zbekiston temir yo‘llari” davlat-aksiyadorlik kompaniyasi — bosh pudratchi;

“Boshtransloyiha” ochiq aksiyadorlik jamiyati — bosh loyihalashtiruvchi;

yuridik shaxslar — subpudratchilar, tuzilgan shartnomalarga muvofiq bosh pudratchiga tovarlar (ishlar, xizmatlar)ni realizatsiya qiluvchi yetkazib beruvchilar sifatida qatnashadilar.

3. “O‘zbekiston temir yo‘llari” davlat-aksiyadorlik kompaniyasi:

“O‘zbekiston temir yo‘llari” davlat-aksiyadorlik kompaniyasining loyihada band bo‘lgan barcha xodimlari Afg‘oniston Islom Respublikasi hududida bo‘lishi davrida ularning hayoti va sog‘lig‘ini sug‘urta qilish bo‘yicha “O‘zbekinvest” eksport-import sug‘urta milliy kompaniyasi bilan shartnoma tuzilishini;

O‘zbekiston Respublikasi Ichki ishlar vazirligi, Milliy xavfsizlik xizmati, Tashqi ishlar vazirligi bilan kelishgan holda, belgilangan tartibda, Afg‘oniston Islom Respublikasining vakolatli organlari va Afg‘oniston hududida joylashtirilgan kollektiv xavfsizlik kuchlari bilan Afg‘oniston Islom Respublikasi hududida loyihani amalga oshirishga jalb qilingan xodimlarning, qurilish texnikasi va infratuzilmaning xavfsizligi kafolatini ta’minlash bo‘yicha o‘zaro tushunish memorandumini tuzish chora-tadbirlari ko‘rilishini ta’minlasin.

4. Belgilab qo‘yilsinki:

“O‘zbekiston temir yo‘llari” davlat-aksiyadorlik kompaniyasining loyihani amalga oshirish uchun Afg‘oniston Islom Respublikasiga yuborilayotgan xodimlariga belgilangan normalardan ortiqcha to‘lanadigan xizmat safari xarajatlariga qo‘shimchalar summasi, shuningdek xizmat safari davrida ko‘rsatib o‘tilgan xodimlarni uch marta bepul ovqatlantirishni ta’minlash xarajatlari summasi yuridik shaxslar foydasiga solinadigan soliq bo‘yicha va jismoniy shaxslarning daromad solig‘i bo‘yicha soliq solinadigan bazaga kiritilmaydi;

ko‘rsatib o‘tilgan loyihani amalga oshirish doirasida “O‘zbekiston temir yo‘llari” davlat-aksiyadorlik kompaniyasi tarkibiy bo‘linmalari ichida bepul olinadigan (beriladigan) mol-mulk uchun qabul qiluvchi va beruvchi tomonning foydasiga soliq solinmaydi.

5. Ko‘rsatib o‘tilgan loyihani amalga oshirish doirasida O‘zbekiston Respublikasi Vazirlar Mahkamasi tasdiqlaydigan ro‘yxatlar bo‘yicha O‘zbekistonga olib kiriladigan va olib chiqiladigan asbob-uskunalar va materiallar uchun “O‘zbekiston temir yo‘llari” davlat-aksiyadorlik kompaniyasi bojxona to‘lovlari to‘lashdan ozod qilinsin (bojxona rasmiylashtiruvi yig‘imlari bundan mustasno).

7. Ko‘rsatib o‘tilgan loyihani amalga oshirishga doir ishlarni bajarish uchun “O‘zbekiston temir yo‘llari” davlat-aksiyadorlik kompaniyasining asoslangan buyurtmanomalari asosida O‘zbekiston Respublikasi Iqtisodiyot vazirligi:

“O‘zbekneftgaz” milliy xolding kompaniyasi bilan birgalikda qonun hujjatlarida nazarda tutilgan tartibda shartnomani rasmiylashtirgan holda yoqilg‘i-moylash materiallari bilan uzluksiz ta’minlashni;

“O‘zmetkombinat” aksiyadorlik-ishlab chiqarish birlashmasi va “O‘zqurilishmateriallari” aksiyadorlik kompaniyasi bilan birgalikda birja kotirovkalarining o‘rtacha narxlari bo‘yicha to‘g‘ridan to‘g‘ri shartnomalar asosida metall prokati va sementning zarur hajmi sotilishini ta’minlasin.

8. O‘zbekiston Respublikasi Ichki ishlar vazirligi, Tashqi ishlar vazirligi “O‘zbekiston temir yo‘llari” davlat-aksiyadorlik kompaniyasining buyurtmanomalari bo‘yicha ko‘rsatib o‘tilgan loyihani amalga oshirishda qatnashayotgan mutaxassislarga chiqish hujjatlari rasmiylashtirilishini ta’minlasin.

9. Mazkur qarorning bajarilishini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.