Iqtisodiyotning agrar sektorini yanada barqaror rivojlantirish, qishloq xoʻjaligida iqtisodiy islohotlarni izchillik bilan chuqurlashtirib borish, fermerlik harakatini qoʻllab-quvvatlash, uning moddiy va moliyaviy bazasini mustahkamlash, qishloq xoʻjalik ishlab chiqaruvchilariga qishloq xoʻjalik mahsulotlarini chuqur qayta ishlovchi zamonaviy korxonalarni jadal barpo etish, yuqori sifatli, raqobatbardosh mahsulotlarni ishlab chiqarish boʻyicha zamonaviy texnologiyalar va uskunalarni tatbiq qilish hamda ichki bozorni mahalliy oziq-ovqat tovarlari bilan toʻldirishga yoʻnaltirilgan keng turdagi bank xizmatlarini koʻrsatish maqsadida:

1. “Paxtabank” aksiyadorlik tijorat banki aksiyadorlarining uni “Agrobank” aksiyadorlik tijorat banki etib qayta tashkil qilish toʻgʻrisidagi taklifi qabul qilinsin.

Belgilansinki, “Agrobank” ATB ochiq turdagi aksiyadorlik jamiyati shaklida tashkil qilinadi hamda mulkiy, moliyaviy va boshqa majburiyatlar boʻyicha, shuningdek yuridik va jismoniy shaxslarning pul mablagʻlari saqlanishi va oʻz vaqtida qaytarilishini kafolatlovchi talablar boʻyicha “Paxtabank” ATBning huquqiy vorisi hisoblanadi.

2. Quyidagilar “Agrobank” ATBning asosiy vazifalari etib belgilansin:

qishloq xoʻjalik mahsulotlari ishlab chiqaruvchi fermer xoʻjaliklariga kredit berish va kompleks tarzdagi bank xizmatlari koʻrsatish;

qishloq xoʻjalik ishlab chiqaruvchilari, barcha mulkchilik shaklidagi korxonalar, shu jumladan paxta va gʻalla mahsulotlarini qayta ishlash, saqlash, tashish va sotishga ixtisoslashgan paxta tozalash va donni qayta ishlash sanoati korxonalariga kredit berish va moliyalashtirish mexanizmlarini izchil takomillashtirib borish;

yerlarning meliorativ holatini yaxshilashga, agrosanoat kompleksi tarmoqlarida ishlab chiqarishni modernizatsiyalash, texnik va texnologik yangilashga, zamonaviy chet el texnologiyalari va uskunalarini jalb etishga yoʻnaltirilgan faol investitsiya siyosatini amalga oshirish;

bankning shaxsiy resurslarini safarbar qilish, omonatlar va depozitlarning yangi jozibador turlarini taklif etish yoʻli bilan aholi va korxonalarning mablagʻlarini jalb qilish, ulardan samarali, shu jumladan investitsiya loyihalarini amalga oshirishda samarali foydalanish, qoʻyilgan mablagʻlar oʻz vaqtida va toʻliq qaytarilishini taʼminlash;

xalqaro moliya institutlari va yetakchi xorijiy banklarning imtiyozli kreditlari, investitsiyalari va grantlarini jalb etib, keyinchalik qishloq xoʻjalik ishlab chiqaruvchilari va respublika iqtisodiyoti agrosanoat sektori korxonalarini ana shu mablagʻlar hisobiga qayta moliyalashtirish.

3. Oʻzbekiston Respublikasi Investitsiyalar boʻyicha davlat qoʻmitasi Moliya vazirligi va Markaziy bank bilan birgalikda “Agrobank” aksiyadorlik tijorat bankiga bankning resurs bazasini mustahkamlash uchun xalqaro moliya institutlari va xorijiy moliya-kredit tuzilmalarining imtiyozli kreditlari, investitsiya va grantlarini jalb etishda yordam koʻrsatsin.

4. Oʻzbekiston Respublikasi Vazirlar Mahkamasi ikki hafta muddatda “Agrobank” ATB Kengashining tarkibini tasdiqlasin.

5. Oʻzbekiston Respublikasi Markaziy banki Adliya vazirligi hamda manfaatdor vazirliklar va idoralar bilan birgalikda bir oy muddatda qonun hujjatlariga mazkur qarordan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

6. Ushbu qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Markaziy banki raisi F.M. Mullajonov zimmasiga yuklansin.