Oʻzbekiston Respublikasi Prezidentining “Fuqarolarning Oʻzbekiston Respublikasi Qurolli Kuchlarida muddatli harbiy xizmatni oʻtash shart-sharoitlarini takomillashtirish chora-tadbirlari toʻgʻrisida” 2008-yil 20-noyabrdagi PF-4054-son Farmoni talablarini amalga oshirish, fuqarolarni muddatli harbiy xizmatga chaqirish va Oʻzbekiston Respublikasi Qurolli Kuchlari rezerviga boʻshatilgan harbiy xizmatchilarni yashash joylariga qaytarishning samarali tashkil etilishini taʼminlash maqsadida Vazirlar Mahkamasi qaror qiladi:

1. Fuqarolarni muddatli harbiy xizmatga yigʻish va joʻnatish, ularni harbiy qismlarda qabul qilish, shuningdek Oʻzbekiston Respublikasi Qurolli Kuchlari rezerviga boʻshatilgan harbiy xizmatchilarni yashash joylariga qaytarish tartibi toʻgʻrisidagi nizom ilovaga muvofiq tasdiqlansin.

2. Quyidagilarning:

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari rahbarlarining — fuqarolarni uyushgan holda yigʻish va muddatli harbiy xizmatga harbiy qismlarga tantanali vaziyatda joʻnatishni; Oʻzbekiston Respublikasi Qurolli Kuchlari rezerviga boʻshatilgan harbiy xizmatchilarning yashash joylarida tantanali ravishda kutib olinishini taʼminlash; muddatli harbiy xizmatni oʻtab boʻlgan fuqarolarga qonun hujjatlarida belgilangan tartibda ishga joylashishda va oliy taʼlim muassasalariga oʻqishga kirishda koʻmaklashish yuzasidan;

harbiy qismlar komandirlarining — muddatli harbiy xizmatga yangidan chaqirilgan harbiy xizmatchilarni qoʻshinlarda qabul qilib olish boʻyicha tantanali tadbirlarni oʻtkazish, ularni harbiy xizmat sharoitlariga koʻniktirish; oziq-ovqat va kiyim-kechaklarning barcha turlari bilan taʼminlash, jangovar va ijtimoiy-siyosiy jihatdan samarali tayyorlash, maʼnaviy-axloqiy va vatanparvarlik ruhida tarbiyalash; Oʻzbekiston Respublikasi Qurolli Kuchlari rezerviga boʻshatilgan muddatli harbiy xizmatchilarni harbiy qismlardan uyushgan holda kuzatib qoʻyish yuzasidan;

Oʻzbekiston Respublikasi Vazirlar Mahkamasi huzuridagi Davlat test markazi rahbariyatining (B. Ismoilov) — muddatli harbiy xizmatga chaqirilayotgan fuqarolarni va Oʻzbekiston Respublikasi Qurolli Kuchlari rezerviga boʻshatilayotgan harbiy xizmatchilarni aloqador vazirliklar va idoralar tomonidan taqdim etilgan jadvallarga muvofiq test sinovlaridan oʻtkazish, shuningdek chaqiriluvchilarni test sinovlaridan oʻtkazish natijalarini mudofaa ishlari boshqarmalariga oʻz vaqtida taqdim etish yuzasidan shaxsan javobgarligi belgilab qoʻyilsin.

3. Oʻzbekiston Respublikasi Mudofaa vazirligi (K. Berdiyev), Ichki ishlar vazirligi (B. Matlyubov), Milliy xavfsizlik xizmati (R. Inoyatov), MXXning Davlat chegaralarini himoya qiluvchi qoʻmitasi (I. Ibragimov), Oʻzbekiston aloqa va axborotlashtirish agentligi (A. Aripov):

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Fuqarolarni muddatli harbiy xizmatga yigʻish va joʻnatish, ularni harbiy qismlarda qabul qilish, shuningdek Oʻzbekiston Respublikasi Qurolli Kuchlari rezerviga boʻshatilgan harbiy xizmatchilarni yashash joylariga qaytarish tartibi toʻgʻrisidagi nizom talablarining sifatli bajarilishini taʼminlasinlar;

Qoraqalpogʻiston Respublikasi, viloyatlar va Toshkent shahar yigʻish punktlariga belgilangan namunadagi ashyoviy buyumlarning yetkazilishini hamda muddatli harbiy xizmatga yangidan chaqirilgan harbiy xizmatchilarga berilishini taʼminlasinlar.

4. Mudofaa vazirligi (K. Berdiyev):

uch oy muddatda Chaqiruv komissiyalari toʻgʻrisidagi nizom hamda 2009 — 2012-yillarda chaqiruv va yigʻish punktlarini rekonstruksiya va modernizatsiya qilish dasturi loyihalarini ishlab chiqsin va tasdiqlash uchun Oʻzbekiston Respublikasi Vazirlar Mahkamasiga kiritsin;

2009-yil 1-martgacha “Davarxitektqurilish” qoʻmitasi (N. Xanov) hamda “Harbiyloyiha” loyihalash instituti (A. Timoshenko) bilan birgalikda viloyatlar va tumanlar (shaharlar)ning chaqiruv punktlari infratuzilmasi va hududlarini zamonaviy talablarga muvofiqlashtirish maqsadida chaqiruv va yigʻish punktlarining namunaviy loyihasini ishlab chiqsin.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Mehnat va aholini ijtimoiy muhofaza qilish vazirligining mahalliy organlari bilan birgalikda Oʻzbekiston Respublikasi Qurolli Kuchlarida muddatli harbiy xizmatni oʻtab boʻlgan fuqarolarni qonun hujjatlarida belgilangan tartibda, ular egallagan harbiy va xoʻjalik ixtisosliklarni hisobga olgan holda ishga joylashtirish chora-tadbirlarini koʻrsinlar.

6. Oʻzbekiston Respublikasi Sogʻliqni saqlash vazirligi (F. Nazirov) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda joylardagi tibbiy komissiyalarning samarali ishlashini, chaqiriluvchilarning tibbiy koʻrikdan sifatli va xolisona oʻtkazilishini, shuningdek chaqiruv va yigʻish punktlarining zarur tibbiy asbob-uskunalar va anjomlar bilan qoʻshimcha ravishda jihozlanishini taʼminlasin.

7. Oliy va oʻrta maxsus taʼlim vazirligi (A. Parpiyev) Oʻzbekiston Respublikasi Vazirlar Mahkamasi huzuridagi Davlat test markazi (B. Ismoilov), tegishli vazirliklar va idoralar bilan birgalikda muddatli harbiy xizmatni oʻtab boʻlgan fuqarolarning oliy taʼlim muassasalariga oʻqishga kirishga sifatli tayyorlanishi uchun zarur tashkiliy-texnik shart-sharoitlarni taʼminlash, zarur metodik yordamni tashkil etish boʻyicha chora-tadbirlar kompleksini amalga oshirsin.

8. Ushbu qaror talablarini bajarish boʻyicha tadbirlarni mablagʻ bilan taʼminlash davlat budjeti va mahalliy budjetlar mablagʻlari hisobiga belgilangan tartibda amalga oshirilishi maʼlumot uchun qabul qilinsin.

9. Oʻzbekiston milliy teleradiokompaniyasi (A. Xodjayev), Oʻzbekiston Milliy axborot agentligiga (M. Hazratqulov) Fuqarolarni muddatli harbiy xizmatga yigʻish va joʻnatish, ularni harbiy qismlarda qabul qilish, shuningdek Oʻzbekiston Respublikasi Qurolli Kuchlari rezerviga boʻshatilgan harbiy xizmatchilarni yashash joylariga qaytarish tartibi toʻgʻrisidagi nizom talablarini amalga oshirish tadbirlarining ommaviy axborot vositalarida keng yoritilishini tashkil etish tavsiya qilinsin.

10. Quyidagilar:

Oʻzbekiston Respublikasi Vazirlar Mahkamasining “Fuqarolarni muddatli harbiy xizmatga yigʻish va joʻnatish, ularni harbiy qismlarda qabul qilish, shuningdek Oʻzbekiston Respublikasi Qurolli Kuchlari rezerviga boʻshatilgan harbiy xizmatchilarni yashash joylariga qaytarish tartibi toʻgʻrisida” 2005-yil 15-martdagi 84-son qarori (Oʻzbekiston Respublikasi QT, 2005-y., 3-4-son, 15-modda).

Vazirlar Mahkamasining “Oʻzbekiston Respublikasi Prezidentining “Aholi bandligini oshirish hamda mehnat va aholini ijtimoiy muhofaza qilish organlari faoliyatini takomillashtirish chora-tadbirlari toʻgʻrisida” 2007-yil 6-apreldagi PQ-616-son qarorini amalga oshirish chora-tadbirlari haqida 2007-yil 8-maydagi 95-son qaroriga 2-ilovaning 12-bandi (Oʻzbekiston Respublikasi QT, 2007-y., 5-son, 25-modda) oʻz kuchini yoʻqotgan deb hisoblansin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Qosimov va F.Sh. Akbarova zimmasiga yuklansin.

1. Mazkur Nizom fuqarolarni muddatli harbiy xizmatga yigʻish va joʻnatish, ularni harbiy qismlarda qabul qilish, shuningdek Oʻzbekiston Respublikasi Qurolli Kuchlari rezerviga boʻshatilgan harbiy xizmatchilarni yashash joylariga qaytarish tartibini, davlat organlarining ushbu ishlarni amalga oshirish boʻyicha vazifalarini belgilaydi.

2. Muddatli harbiy xizmatni oʻtash tartibi va muddatlari qonun hujjatlarida belgilanadi.

3. Oʻzbekiston Respublikasi Qurolli Kuchlarining Birlashgan shtabi Oʻzbekiston Respublikasi Prezidentining fuqarolarni muddatli harbiy xizmatga chaqirish hamda muddatli harbiy xizmatning belgilangan muddatlarini oʻtab boʻlgan shaxslarni Qurolli Kuchlar rezerviga boʻshatish toʻgʻrisidagi qarori eʼlon qilingandan keyin oʻn kun muddatda chaqiriluvchilarni harbiy qismlarga joʻnatishning umumiy jadvalini ishlab chiqadi. Chaqiriluvchilarni harbiy qismlarga joʻnatish jadvallari besh kun muddatda harbiy okruglar qoʻshinlari qoʻmondonlari, Oʻzbekiston Respublikasi Mudofaa vazirligining markaziy boʻysunishdagi qoʻshinlari harbiy qismlari komandirlari, Ichki ishlar vazirligi, Milliy xavfsizlik xizmati qoʻshilmalari va harbiy qismlari komandirlariga, Oʻzbekiston aloqa va axborotlashtirish agentligiga, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga ularga tegishli qismi boʻyicha yetkaziladi.

4. Fuqarolarni muddatli harbiy xizmatga chaqirish, safarbarlik chaqiruvi rezerviga xizmatga olish tuman (shahar) chaqiruv punktida amalga oshiriladi.

Tuman (shahar) chaqiruv punkti fuqarolarni tibbiy koʻrikdan oʻtkazish boʻyicha chaqiruv va tibbiy komissiyalar ishini tashkil etish, fuqarolarni muddatli harbiy xizmatga va safarbarlik chaqiruvi rezerviga xizmatga chaqirish, ularni Qoraqalpogʻiston Respublikasi, viloyatlar va Toshkent shahar yigʻish punktlariga (keyingi oʻrinlarda “yigʻish punktlari” deb ataladi) tashkiliy joʻnatish uchun moʻljallangan.

Tuman (shahar) chaqiruv punktlari, qoidaga koʻra, mudofaa ishlari boʻlimi bilan bir binoda yoki uning hududida joylashadi.

Tuman (shahar) chaqiruv punkti quyidagilarni oʻz ichiga oladi:

chaqiriluvchilar chaqiruv punktida boʻlgan vaqtda ular orasida madaniy-tarbiyaviy ishlar olib boradigan xona (100 kishiga);

chaqiriluvchilarga oid ijtimoiy-demografik maʼlumotlarni aniqlashtirish uchun xona;

chaqiriluvchilarning kiyim-kechagi va shaxsiy ashyolarini saqlash uchun xona (kamida 50 kishiga);

chaqiriluvchilarni antropometrik tekshirish uchun xona;

mutaxassis vrachlar chaqiriluvchilarni tibbiy koʻrikdan oʻtkazishi uchun xona, bir nafar mutaxassis vrachga bir xona hisobidan;

tuman chaqiruv komissiyasi majlisini oʻtkazish uchun xona;

ovqatlanish punkti (bufet);

sanitariya uzellari.

Chaqiriluvchilarning harbiy qismlarga joʻnatish uchun mudofaa ishlari boʻlimlariga kelish vaqti ularning yigʻish punktlariga harbiy komandalarning harbiy qismlarga joʻnatilishidan kamida 6 soat oldin yetib kelishi hisobga olingan holda belgilanadi.

Chaqiriluvchilarni yigʻish punktlariga joʻnatish mahalliy davlat hokimiyati organlari tomonidan ajratilgan avtotransportda mudofaa ishlari boʻlimlari, yoʻl harakati xavfsizligi xizmati xodimlari hamrohligida tashkiliy ravishda va chaqiriluvchilarni joʻnatish jadvallarida belgilangan muddatlarda amalga oshiriladi.

Chaqiriluvchilarni yigʻish punktlariga joʻnatishdan oldin mudofaa ishlari tuman boʻlimlari:

harbiy komandaga nomma-nom roʻyxat tuzishi;

joʻnatilayotgan fuqarolarga harbiy guvohnomalar berishi va ulardan roʻyxatdan oʻtkazish guvohnomalari va pasportlarni olib qoʻyishi;

“Armiya — hayot maktabi” eslatmasini topshirishi shart.

5. Chaqiriluvchilarni qoʻshinlarga joʻnatish Qoraqalpogʻiston Respublikasi, viloyatlar va Toshkent shahar yigʻish punktlarida amalga oshiriladi.

Yigʻish punktlari chaqiriluvchilarni nazorat tibbiy koʻrigidan oʻtkazish, tumanlar (shaharlar) chaqiruv komissiyalari tomonidan chaqiriluvchilarni Oʻzbekiston Respublikasi Qurolli Kuchlari qoʻshinlarining har xil turlari boʻyicha tayinlash toʻgʻrisida qabul qilgan qarorlarining qonuniyligini tekshirish, chaqiriluvchilarni safarbarlik chaqiruvi rezerviga xizmatga olish, sogʻligʻining holatiga koʻra chaqiruvni kechiktirish, komandalarni shakllantirish, ularni komandalarni qabul qilish va ularga hamrohlik qilish uchun kelgan harbiy qismlar vakillariga berish, muddatli harbiy xizmatning yangidan chaqirilgan harbiy xizmatchilarini yoʻlda zarur boʻlgan barcha zarur narsalar bilan taʼminlash va komandalarni qoʻshinlarga tashkiliy joʻnatish uchun moʻljallangan.

Yigʻish punktida quyidagilar boʻlishi kerak:

maʼmuriy bino;

chaqiruv punkti;

tantanali kuzatish qatnashchilari bilan bayramona tushlik qilish uchun oshxona (300 kishiga);

chaqiriluvchilar belgilangan kiyim-kechakni qayta kiyib oladigan xonasi boʻlgan shaxsiy tarkibni sanitariya koʻrigidan oʻtkazish uchun bino (hammom) (50 kishiga);

yangidan chaqirilgan harbiy xizmatchilar bilan tantanali kuzatish marosimini oʻtkazish uchun saf tortish maydoni (300 kishiga);

nazorat-oʻtkazish punkti;

tashqi sanitariya uzellari.

Yigʻish punktining maʼmuriy binosi quyidagilarni oʻz ichiga oladi:

yigʻish punkti maʼmuriyati uchun bino (yigʻish punkti boshligʻi, yigʻish punkti navbatchisi, harbiy komandalarni shakllantirish boʻlimi, harbiy qismlar va mudofaa ishlari boʻlimlari vakillarining ishlashi uchun xonalar);

chaqiriluvchilarning shaxsiy moslashuv salohiyatini va intellektual darajasini aniqlash boʻyicha ularni psixologik tekst sinovidan oʻtkazish uchun ikkita sinf (har biri 50 kishiga moʻljallangan);

yangidan chaqirilgan harbiy xizmatchilarni tantanali kuzatish va ularni harbiy qismlar vakillariga berish uchun bino (300 kishiga);

yangi chaqirilganlarni qabul qilib olish va harbiy qismlarga kuzatib borish uchun qoʻshinlardan kelgan shaxsiy tarkibni joylashtirish uchun bino (50 kishiga);

chekka tumanlardan kelgan chaqiriluvchilarni joylashtirish uchun bino (50 — 100 kishiga);

ashyoviy mol-mulkni saqlash uchun bino (omborxona);

sanitariya uzellari.

Yigʻish punktining chaqiruv punkti quyidagilarni oʻz ichiga oladi:

tibbiy (chaqiruv) komissiyasidan oʻtish uchun mudofaa ishlari boʻlimlaridan kelgan shaxsiy tarkibni joylashtirish uchun bino (100 kishiga);

chaqiriluvchilarning kiyim-kechagi va shaxsiy ashyolarini saqlash uchun xona (50 kishiga);

chaqiriluvchilarni antropometrik tekshirish uchun xona;

mutaxassis vrachlar chaqiriluvchilarni tibbiy koʻrikdan oʻtkazishi uchun xona, bir nafar mutaxassis vrachga bir xona hisobidan;

viloyat chaqiruv komissiyasi majlisini oʻtkazish uchun xona;

tashrif buyuruvchilarning chaqiruv komissiyasi raisi va uning aʼzolari tomonidan qabul qilinishi uchun xona;

flyuorografiya qurilmasi uchun xona (joy);

fibrogastroduodenoskopik va ultratovush tekshirishlar oʻtkazish uchun xona (joy);

sanitariya uzellari.

Chaqiruv va yigʻish punktlari harbiy-vatanparvarlik mavzusi boʻyicha zarur koʻrgazmali tashviqotlar, aloqa vositalari va ovozni kuchaytiradigan aloqa apparatlari bilan jihozlangan boʻlishi, elektr va issiqlik energiyasi bilan uzluksiz taʼminlanishi kerak.

Binolar va xonalar, chaqiruv va yigʻish punktlarining ayrim elementlari tasdiqlangan namunaviy loyihalar talablariga muvofiq boʻlishi kerak.

6. Yigʻish punktlarida muddatli harbiy xizmatga yangidan chaqirilganlarni mudofaa ishlari boʻlimlari vakillaridan qabul qilib olish va ularni harbiy qismlar vakillariga berish nomma-nom roʻyxat boʻyicha amalga oshiriladi. Harbiy qismlarning vakillari (komandalarning boshliqlari) yangidan chaqirilgan harbiy xizmatchilarning zarur hujjatlarini oladilar.

Yangidan chaqirilgan harbiy xizmatchilarni qoʻshinlarga joʻnatishdan oldin:

badan koʻzdan kechiriladi;

kiyim-kechak toʻliq almashtirilgan holda hammomda yuvintiriladi va ashyoviy mulk bilan taʼminlanadi, bunda yangidan chaqirilgan harbiy xizmatchilarning fuqarolik kiyim-kechagi ularning ota-onalariga, ota-onalarga tenglashtirilgan shaxslarga qaytariladi;

chaqiruv komissiyasining qarori eʼlon qilinadi, xavfsizlik chora-tadbirlari va boriladigan yoʻlda oʻzini tutish qoidalari boʻyicha yoʻriqnoma beriladi;

tantanali kuzatish tashkil etiladi.

7. Muddatli harbiy xizmatning yangidan chaqirilgan harbiy xizmatchilarini qayta kiyintirish uchun yigʻish punktlarida vaqtinchalik kiyintirish punktlari tashkil etiladi.

Chaqiruv boshlangunga qadar Mudofaa vazirligi, Ichki ishlar vazirligi, MXXning Davlat chegaralarini himoya qiluvchi qoʻmitasi, Milliy xavfsizlik xizmatining boshqa harbiy tuzilmalari va Oʻzbekiston aloqa va axborotlashtirish agentligining mansabdor shaxslari tomonidan belgilangan hisob-kitobga muvofiq yangidan chaqirilgan harbiy xizmatchilar uchun ashyoviy mulk yetkaziladi.

Qishki reja boʻyicha ashyoviy mulk berish Mudofaa vazirligi, Ichki ishlar vazirligi, Davlat chegaralarini himoya qiluvchi qoʻmita, Milliy xavfsizlik xizmatining boshqa harbiy tuzilmalari va Oʻzbekiston aloqa va axborotlashtirish agentligining mansabdor shaxslari tomonidan amalga oshiriladi.

8. Mudofaa ishlari boshqarmalari boshliqlari yigʻish punktlarida chaqiruv komissiyalarining qarorlari bilan muddatli harbiy xizmatga olingan chaqiriluvchilarga “Umumiy harbiy majburiyat va harbiy xizmat toʻgʻrisida”gi Oʻzbekiston Respublikasi Qonunining 27-moddasiga muvofiq ular Oʻzbekiston Respublikasi Qurolli Kuchlarining muddatli xizmatiga yangidan chaqirilgan harbiy xizmatchilari ekanligini eʼlon qiladi. Harbiy xizmatchilarga havo, temir yoʻl va avtomobil transporti qatnovi yoʻlida xavfsizlik choralari va xatti-harakat qoidalari boʻyicha yoʻriqnomalar beriladi. Harbiy xizmatchilarga va ularning kuzatish uchun kelgan ota-onalariga muddatli harbiy xizmatni tashkil etish boʻyicha normativ-huquqiy hujjatlar, muddatli harbiy xizmatchilarning huquqlari, vazifalari va imtiyozlari, Oʻzbekiston Respublikasi Qurolli Kuchlari qoʻshinlarining har xil turlarida muddatli harbiy xizmatni oʻtash xususiyatlari tushuntiriladi.

9. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan mudofaa ishlari boshqarmalari bilan birgalikda yangidan chaqirilgan harbiy xizmatchilarni harbiy qismlarga joʻnatish jadvali olingandan keyin uch kun muddatda ularni harbiy qismlarga tantanali kuzatish marosimini tashkil etish va oʻtkazish rejasi tuziladi.

Harbiy qismlarga yuborilayotgan yangidan chaqirilgan harbiy xizmatchilarni tantanali kuzatib qoʻyish chaqiruv komissiyalarining raislari — Qoraqalpogʻiston Respublikasi Vazirlar Kengashi Raisining oʻrinbosari, viloyatlar va Toshkent shahar hokimliklarining oʻrinbosarlari rahbarligida tashkil etiladi hamda hokimliklar, Xotin-qizlar qoʻmitasi, Oʻzbekiston yoshlarining “Kamolot” ijtimoiy harakati, “Mahalla”, “Nuroniy” jamoat jamgʻarmalari vakillari, harbiy xizmatchilarning ota-onalari ishtirokida oʻtkaziladi.

Tantanali kuzatib qoʻyish mobaynida:

harbiy xizmatchilarni muddatli harbiy xizmatga joʻnatishga bagʻishlangan miting oʻtkaziladi;

harbiy xizmatchilarga esdalik sovgʻalari topshiriladi;

tantanali kuzatib qoʻyish qatnashchilari va harbiy xizmatchilarga bayram tushligi tashkil etiladi;

ijodiy jamoalar va badiiy havaskorlar konserti namoyish qilinadi;

harbiy xizmatchilar ota-onalar, hokimliklar, jamoatchilik vakillari bilan esdalik uchun suratga tushadilar.

10. Tantanali kuzatib qoʻyish tugallangandan keyin harbiy xizmatchilar xavfsizlik choralariga rioya qilgan holda va Ichki ishlar vazirligining Yoʻl harakati xavfsizligi davlat xizmati xodimlari hamrohligida tashkiliy ravishda transportda xizmat joylariga joʻnatish uchun vokzallarga (aeroportlarga) yuboriladi.

Harbiy xizmatchilar harakat xavfsizligi shartlariga javob beradigan, yoʻlovchilar tashish uchun moʻljallangan, texnik jihatdan tayyor transport vositalarida tibbiyot xodimlari hamrohligida xizmat joylariga yetkaziladi. Harbiy xizmatchilarni moslashtirilgan vagonlarda tashish qatʼiyan taqiqlanadi.

11. Ommaviy axborot vositalari vakillari tomonidan harbiy xizmatchilarni harbiy qismlarga kuzatish bilan bogʻliq tantanali tadbirlarni keng yoritish tashkil etiladi.

12. Harbiy qoʻshilmalar va harbiy qismlarning komandirlari muddatli harbiy xizmatni oʻtash uchun kelgan harbiy xizmatchilarni vokzallar, aeroportlarda shaxsan kutib oladilar hamda ularning yoʻl harakati xavfsizligi xizmati xodimlari hamrohligida bevosita harbiy qismlarga tashkiliy ravishda yetkazilishini amalga oshiradilar.

13. Harbiy qismlarda yangidan chaqirilgan harbiy xizmatchilarni kutib olish munosabati bilan harbiy qismlarning komandirlari, hokimliklar va jamoat tashkilotlari vakillari ishtirokida qismga harbiy xizmatchilar kelganligiga bagʻishlangan tantanali mitinglar oʻtkaziladi hamda bayram tushligi tashkil etiladi.

14. Qismlarning komandirlari tomonidan harbiy xizmatchilar boʻlinmalarda boʻlgan dastlabki oʻn kunda:

yuqumli kasalliklarning oldini olish boʻyicha tibbiy tadbirlar kompleksi (dastlabki tibbiy koʻriklar, profilaktik emlash va sanitariya koʻrigi), sanitariya madaniyati darajasini oshirish tadbirlari (shaxsiy va jamoat gigiyenasi qoidalariga rioya qilish);

jamoatchilikni jalb etgan holda joylarda “Sen xizmat qilayotgan oʻlka” rukni ostida mavzuli tadbirlar oʻtkaziladi. Bunday tadbirlar davomida harbiy xizmatchilarga viloyat, tuman, shaharning tarixi, iqtisodiy sohadagi muvaffaqiyatlar va yutuqlar, viloyat, tuman, shaharning hurmatli kishilari, harbiy qismning tashkil etilishi tarixi, uning anʼanalari hamda jangovar va ijtimoiy-siyosiy tayyorgarlik borasida erishgan yutuqlari toʻgʻrisida axborot beriladi;

muddatli harbiy xizmatning harbiy xizmatchilari va ularning oila aʼzolarining huquq va majburiyatlari, ularga belgilangan imtiyozlar, ashyolar va pul, ovqat bilan taʼminlash normalari, tibbiy va hammom-kir yuvish xizmatlari tartibi maʼlum qilinadi;

chaqiriluvchilarning maʼnaviy-ruhiy sifatlari oʻrganib chiqiladi;

yangidan chaqirilgan harbiy xizmatchilar takroriy tibbiy koʻrikdan oʻtkaziladi;

harbiy xizmatchilarni boʻlinmalarda shtatdagi lavozimlar boʻyicha taqsimlash haqidagi qarorlar aniqlashtiriladi;

harbiy qismdagi qurol-yarogʻlar va texnika harbiy xizmatchilarga namoyish qilinadi;

shaxsiy tarkib Harbiy qasamyodni, umumqoʻshin ustavlarini, muddatli harbiy xizmatni oʻtash masalalari boʻyicha amaldagi qonun hujjatlari qoidalarini oʻrganadi;

sport kiyim-kechagi va poyabzal beriladi.

15. Harbiy xizmatchilarni jismoniy yuklamalarga moslashtirish maqsadida harbiy qismlar va boʻlinmalarning komandirlari, harbiy-tibbiy xizmatlar mutaxassislarining doimiy nazorati ostida:

ertalabki badantarbiyani amalga oshirish jarayonida shaxsiy tarkibni chiniqtirish va jismoniy tayyorgarlik boʻyicha rejali mashgʻulotlar;

harbiy xizmatchilarning yuklamalarga yakka tartibda jismoniy va ruhiy chidamliligini, ularning harbiy xizmatchilar organizmiga taʼsiri darajasini aniqlash;

harbiy xizmatchilar tomonidan harbiy mutaxassisliklar sifatli oʻzlashtirib olinishiga, jismoniy va axloqiy kamol topishiga, barqaror xarakter, Vatanga muhabbat va uning himoyasi uchun tayyor turishga asoslangan qatʼiy hayotiy nuqtai nazar shakllanishiga yoʻnaltirilgan muddatli harbiy xizmatchilarni jangovar va ijtimoiy-siyosiy, maʼnaviy-axloqiy va vatanparvarlik ruhida samarali tarbiyalashni taʼminlash boʻyicha tadbirlar amalga oshiriladi.

16. Muddatli harbiy xizmatchilarni rezervga boʻshatish qonun hujjatlarida belgilangan muddatlarda amalga oshiriladi.

17. Oʻzbekiston Respublikasi Qurolli Kuchlarining Birlashgan shtabi Oʻzbekiston Respublikasi Prezidentining fuqarolarni muddatli harbiy xizmatga chaqirish hamda muddatli harbiy xizmatning belgilangan muddatlarini oʻtab boʻlgan shaxslarni Qurolli Kuchlar rezerviga boʻshatish toʻgʻrisidagi qarori eʼlon qilingandan keyin Mudofaa vazirligining harbiy okruglari, markaziy boʻysunishdagi qoʻshilmalari va qismlari shtablari, Milliy xavfsizlik xizmati Chegara qoʻshinlari birlashmalari, Milliy xavfsizlik xizmatining harbiy qismlari, Ichki ishlar vazirligining Qorovullik xizmati qoʻshilmalari va qismlari shtablari, Oʻzbekiston aloqa va axborotlashtirish agentligi maʼlumotlari asosida oʻn kun muddatda Qurolli Kuchlar uchun yagona boʻlgan muddatli harbiy xizmatning belgilangan muddatlarini oʻtagan harbiy xizmatchilarni Qurolli Kuchlar rezerviga boʻshatish rejasini ishlab chiqadilar.

Boʻshatish rejasidan koʻchirmalar harbiy okruglar, Mudofaa vazirligining markaziy boʻysunishdagi qoʻshilmalari va qismlari shtablariga, Milliy xavfsizlik xizmatining Chegara qoʻshinlari Bosh shtabiga, harbiy qismlariga, Ichki ishlar vazirligining Qorovullik qoʻshinlari Bosh boshqarmasiga, Oʻzbekiston aloqa va axborotlashtirish agentligiga yuboriladi.

18. Harbiy qismlar komandirlari mahalliy davlat hokimiyati organlari, jamoat tashkilotlari bilan oʻzaro hamkorlikda harbiy xizmatchilarning harbiy qism bilan tantanali xayrlashuvini taʼminlaydilar, xayrlashuv davomida:

muddatli harbiy xizmatning belgilangan muddatlarini oʻtab boʻlgan harbiy xizmatchilarni yashash joylariga joʻnatishga bagʻishlangan mitinglar;

rezervga boʻshatilgan, jangovar va ijtimoiy-siyosiy tayyorgarlik aʼlochilari boʻlgan harbiy xizmatchilarga oliy taʼlim muassasalariga kirish uchun harbiy qismlar qoʻmondonligining tavsiyanomalarini topshirish;

rezervga boʻshatilayotgan harbiy xizmatchilarga yordam puli berish;

esdalik sovgʻalari topshirish;

harbiy xizmatchilarning qism qoʻmondonligi bilan esdalik uchun suratga tushishi;

bayram tushligi tashkil etiladi.

19. Harbiy xizmatchilar Mudofaa vazirligining harbiy qismlaridan, Milliy xavfsizlik xizmatining Chegara qoʻshinlaridan, harbiy qismlaridan, Ichki ishlar vazirligining Qorovullik qoʻshinlaridan, Oʻzbekiston aloqa va axborotlashtirish agentligidan, keyinchalik yashash joylariga joʻnatish uchun xavfsizlik choralariga rioya etgan holda belgilangan muddatlarda vokzallarga (aeroportlarga) yetkaziladi.

20. Rezervga boʻshatilayotgan harbiy xizmatchilarga harbiy guvohnoma va hisobga olish-xizmat qilish kartochkasi, koʻrsatma, harbiy tashuv hujjatlari beriladi.

21. Qurolli Kuchlar rezerviga boʻshatilgan harbiy xizmatchilarni mudofaa ishlari boshqarmasiga yetkazish harbiy qismlarning vakillari hamrohligida amalga oshiriladi.

22. Rezervga boʻshatilgan harbiy xizmatchilarni tantanali kutib olish Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan joylardagi mudofaa ishlari boshqarmalari bilan oʻzaro hamkorlikda tashkil etiladi.

Tantanali kutib olish davomida:

rezervga boʻshatilgan harbiy xizmatchilarni kutib olishga bagʻishlangan mitinglar oʻtkaziladi, mitingda hokimliklar, jamoat tashkilotlari vakillari, harbiy xizmatchilarning ota-onalari ishtirok etadilar;

ijodiy jamoalar va badiiy havaskorlar konserti uyushtiriladi;

Mehnat va aholini ijtimoiy muhofaza qilish vazirligining joylardagi organlari vakillari chiqishlari oʻtkaziladi, bunday chiqishlarda harbiy xizmatchilarga va ularning ota-onalariga ishga joylashtirish va kasbga oʻqitish yuzasidan maʼlumot beriladi, tegishli eslatmalar topshiriladi;

rezervga boʻshatilgan harbiy xizmatchilarni kutib olish boʻyicha tantanali tadbirlar ommaviy axborot vositalarida yoritiladi.

Tantanali tadbirlar tamom boʻlgandan keyin rezervga boʻshatilgan harbiy xizmatchilar mudofaa ishlari boʻlimlari vakillari tomonidan xavfsizlik choralariga rioya etilgan holda tashkiliy tartibda transportda yashash joylariga yetkaziladi.

23. Oʻzbekiston Respublikasi Mudofaa vazirligi rezervga boʻshatilgan harbiy xizmatchilarni qonun hujjatlarida belgilangan tartibda hisobga olishni amalga oshiradi.

24. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Mehnat va aholini ijtimoiy muhofaza qilish vazirligi bilan birgalikda Qurolli Kuchlarda muddatli harbiy xizmatni oʻtab boʻlgan fuqarolar boshqa teng shartlarda (taʼlim, kasb malakasi va boshqalar) davlat muassasalari, tashkilotlari va korxonalariga ishga qabul qilishda mardlikning armiya maktabidan oʻtgan va vatanparvarlik tarbiyasi singdirilgan, harbiy tayyorgarlik koʻrgan, mamlakatning eng faol va tayyorlangan kadrlar zaxirasi hisoblangan shaxslar sifatida ustunlik huquqidan foydalanishini hisobga oladilar.

25. Oʻzbekiston Respublikasi Mehnat va aholini ijtimoiy muhofaza qilish vazirligi “Aholini ish bilan taʼminlash toʻgʻrisida”gi Oʻzbekiston Respublikasi Qonuniga muvofiq:

muddatli harbiy xizmatni oʻtab boʻlgan fuqarolarni kasbga oʻqitish hamda ustun darajada davlat korxonalari, muassasalari va tashkilotlariga ishga joylashtirish;

fuqarolarning koʻrsatib oʻtilgan toifasini ishga joylashtirish va ijtimoiy muhofaza qilish boʻyicha Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari mehnat va aholini ijtimoiy muhofaza qilish bosh boshqarmalari, tuman (shahar) ishga joylashishga koʻmaklashish va ijtimoiy muhofaza markazlari faoliyati nazorat qilinishini;

muddatli harbiy xizmatni oʻtab boʻlgan fuqarolar bilan ularning mehnat huquqlarini tushuntirish boʻyicha shaxsan ish olib borilishini;

mudofaa ishlari boʻlimlarining rezervga boʻshatilgan harbiy xizmatchilar ishga joylashtirilishi va ijtimoiy muhofaza qilinishi toʻgʻrisida belgilangan muddatlarda xabardor qilinishini;

rezervga boʻshatilgan harbiy xizmatchilarni ishga joylashtirish yuzasidan olib borilgan ishlar toʻgʻrisida Oʻzbekiston Respublikasi Vazirlar Mahkamasiga belgilangan tartibda hisobotlar taqdim etilishini taʼminlaydilar.

26. Oliy va oʻrta maxsus taʼlim vazirligi Davlat test markazi, tegishli vazirliklar va idoralar bilan birgalikda:

muddatli harbiy xizmatni oʻtagan fuqarolardan boʻlgan shaxslarni oliy taʼlim muassasalariga oʻqishga kirishga sifatli tayyorlash uchun zarur shart-sharoitlarni taʼminlaydi;

oliy taʼlim muassasalariga oʻqishga kirishda test sinovlari oʻtkazish davomida muddatli harbiy xizmat davomida jangovar va ijtimoiy-siyosiy tayyorgarlikda yuqori koʻrsatkichlarga erishgan va harbiy qismlar qoʻmondonligining tegishli tavsiyanomalarini olgan fuqarolar uchun eng koʻp toʻplash mumkin boʻlgan ballning 25 foizi miqdorida qoʻshimcha ballar tarzidagi qonun hujjatlarida belgilangan imtiyozlarni hisobga oladi;

harbiy qismlarning qoʻmondonligi tavsiyalari boʻyicha rezervga boʻshatilgan harbiy xizmatchilarning oliy taʼlim muassasalariga kirishi uchun zarur shart-sharoitlarni tashkil etish, test sinovi yakunlari va oliy taʼlim muassasalariga oʻqishga kirish boʻyicha qilingan ishlar toʻgʻrisida Oʻzbekiston Respublikasi Vazirlar Mahkamasiga belgilangan tartibda hisobot taqdim etadi.