Mehnat va tadbirkorlik faoliyatini amalga oshirish uchun chet ellarga ketayotgan shaxslarni hisobga olishni takomillashtirish, Oʻzbekiston Respublikasi fuqarolari mamlakatimiz tashqarisida boʻlgan davrda ularning muhofazasini taʼminlash maqsadida Vazirlar Mahkamasi qaror qiladi:

1. Mehnat faoliyatini va tadbirkorlikni amalga oshirish uchun chet ellarga ketayotgan shaxslar sonini hisoblab chiqarish boʻyicha integratsiyalashgan axborotlarni tayyorlash va taqdim etish moduli sxemasi ilovaga muvofiq tasdiqlansin.

2. Oʻzbekiston Respublikasi Davlat statistika qoʻmitasi, Davlat bojxona qoʻmitasi chet ellarga ketayotgan Oʻzbekiston Respublikasi fuqarolarining soni va maqsadi toʻgʻrisidagi har choraklik statistika hisoboti yuritilishini taʼminlasinlar.

Bunda Bojxona deklaratsiyasining takomillashtirilgan shakli chet ellarga ketayotgan fuqarolarning soni va maqsadi toʻgʻrisidagi axborot manbai hisoblanishi nazarda tutilsin.

3. Oʻzbekiston Respublikasi Davlat bojxona qoʻmitasi Davlat statistika qoʻmitasi bilan kelishgan holda Bojxona deklaratsiyasining takomillashtirilgan shaklini va uni toʻldirish hamda rasmiylashtirish tartibini tasdiqlasin va 2007-yil 1-iyuldan amalga kiritsin.

4. Oʻzbekiston Respublikasi Mehnat va aholini ijtimoiy muhofaza qilish vazirligi Davlat statistika qoʻmitasi hamda Iqtisodiyot vazirligi bilan birgalikda:

joriy yilning 1-iyuligacha boʻlgan muddatda mehnat emigratsiyasini har chorakda oʻrganish boʻyicha savolnoma ishlab chiqsin va uni 2007-yilning uchinchi choragidan boshlab uy xoʻjaliklarini aholi bandligi masalalari boʻyicha oʻrganish dasturiga belgilangan tartibda kiritsin;

joriy yildan boshlab har yili, maʼlumotlarning respublika, mintaqa va tuman darajalarida muvofiqligini taʼminlagan holda, Oʻzbekiston fuqarolarining mehnat emigratsiyasi masalalari boʻyicha chuqurlashtirilgan maxsus sotsiologik oʻrganishlar oʻtkazsin.

Mehnat emigratsiyasi masalalari boʻyicha oʻrganishlarni oʻtkazish xarajatlarini moliyalashtirish Bandlikka koʻmaklashish davlat jamgʻarmasi mablagʻlari hisobiga amalga oshirilishi nazarda tutilsin.

5. Oʻzbekiston Respublikasi Tashqi ishlar vazirligi Oʻzbekiston Respublikasining chet ellardagi konsullik muassasalari orqali mehnat faoliyatini va tadbirkorlikni amalga oshirish munosabati bilan chet ellarda boʻlib turgan Oʻzbekiston Respublikasi fuqarolarining monitoringini olib borsin.

6. Oʻzbekiston Respublikasi Mehnat va aholini ijtimoiy muhofaza qilish vazirligi, Iqtisodiyot vazirligi manfaatdor vazirliklar va idoralar bilan birgalikda fuqarolarga chet ellarda mehnat faoliyatini amalga oshirish uchun ruxsatnomalar berish tartibotlarini soddalashtirish yuzasidan ikki oy muddatda takliflar kiritsinlar, ularda koʻrsatib oʻtilgan ruxsatnomani olish uchun toʻlov miqdorini ancha kamaytirishni va uni olish tartibini nazarda tutsinlar.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S.Azimov zimmasiga yuklansin.