Xalq ta’limi muassasalarini moliyalashtirish mexanizmini takomillashtirish, moliyaviy-iqtisodiy masalalarni hal etishda ta’lim muassasalarining mustaqilligini kengaytirish va mas’uliyatini oshirish, budjet mablag‘laridan maqsadli va samarali foydalanish, shuningdek ta’lim-tarbiya jarayonini muvofiqlashtirish va uslubiy rahbarlik qilishni kuchaytirish maqsadida:

1. Xalq ta’limi muassasalarini hisob-kitob — moliyaviy jihatdan ta’minlash, ularning sarf-xarajatlarini hisobga olish va nazorat qilish funksiyalari hamda tuzilmalarini Qoraqalpog‘iston Respublikasi Xalq ta’limi vazirligi, viloyatlar va Toshkent shahar xalq ta’limi boshqarmalari, xalq ta’limi tuman va shahar bo‘limlaridan tegishli hududiy moliya organlariga topshirish to‘g‘risida O‘zbekiston Respublikasi Xalq ta’limi vazirligi, Moliya vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining taklifi qabul qilinsin.

Belgilansinki, xalq ta’limi muassasalarining faoliyatini moliyalashtirish bevosita hududiy moliya organlari tomonidan amalga oshiriladi.

2. O‘zbekiston Respublikasi Moliya vazirligi bir oy muddatda hududiy moliya organlari tuzilmasida Qoraqalpog‘iston Respublikasi Xalq ta’limi vazirligi, viloyatlar va Toshkent shahar xalq ta’limi boshqarmalari, xalq ta’limi tuman va shahar bo‘limlarining topshirilayotgan markazlashtirilgan buxgalteriyalari va markazlashtirilgan xo‘jalik xizmati ko‘rsatish guruhlari negizida xalq ta’limi muassasalarini moliyalashtirish bo‘limlari tashkil qilinsin.

Hududiy moliya organlari zimmasiga qo‘shimcha ravishda quyidagi asosiy vazifa va funksiyalar yuklansin:

xalq ta’limi muassasalari bilan birgalikda xarajatlar smetasi va shtat jadvallarini ishlab chiqish, ularni moliyalashtirish, shuningdek ish haqi va unga tenglashtirilgan to‘lovlarni hisoblash;

g‘aznachilik hududiy bo‘linmalari bilan hamkorliqda xalq ta’limi muassasalarining topshiriqlari bo‘yicha hisob-kitob operatsiyalarini amalga oshirish, shuningdek ularning faoliyati bo‘yicha hisob va hisobotlarni yuritish;

xalq ta’limi muassasalarida budjet mablag‘laridan maqsadli va samarali foydalanishni hamda budjet intizomiga rioya etishni, shu jumladan xalq ta’limi xodimlari mehnatiga haq to‘lashning takomillashtirilgan tizimi talablarini bajarishni ta’minlash;

xalq ta’limi muassasalarining xarajatlar smetasi doirasida xalq ta’limi muassasalarining buyurtmalariga muvofiq va ularning ehtiyojlaridan kelib chiqqan holda tovarlar xarid qilish va xizmatlar ko‘rsatish uchun shartnomalar tuzish, shuningdek iste’mol limitlari va sarf-xarajat normalariga rioya etilishini monitoring qilib borish;

3. O‘zbekiston Respublikasi Xalq ta’limi vazirligi, Qoraqalpog‘iston Respublikasi Xalq ta’limi vazirligi, viloyatlar va Toshkent shahar xalq ta’limi boshqarmalari, xalq ta’limi muassasalari faoliyatini metodik ta’minlash va tashkil etish tuman va shahar bo‘limlari maktabgacha tarbiya, umumiy o‘rta va maktabdan tashqari ta’lim muassasalaridagi uslubiy va ta’lim-tarbiya ishlarini takomillashtirish masalalarini o‘z faoliyati markazida tutsin va bunda quyidagilarga asosiy e’tiborni qaratsin:

xalq ta’limi muassasalari tomonidan O‘zbekiston Respublikasining “Ta’lim to‘g‘risida”gi Qonuni qoidalariga hamda umumiy o‘rta ta’limning belgilangan davlat ta’lim standartlariga rioya etilishi monitoringini amalga oshirish;

idoraviy bo‘ysunishi va mulkchilik shaklidan qati nazar, ta’lim muassasalariga uslubiy rahbarlikni takomillashtirish, zamonaviy ta’lim shakllarini, yangi pedagogik va axborot texnologiyalari, ma’naviy-axloqiy tarbiyaning samarali shakl va usullarini ta’lim-tarbiya jarayoniga tatbiq etish;

respublika yetakchi o‘kituvchilari va umumta’lim muassasalarining ijobiy ish tajribasini o‘rganish va umumlashtirish hamda uning umumta’lim maktablari o‘quv-uslubiy va tarbiyaviy ishida keng ommalashuviga ko‘maklashish;

2004—2009-yillarda Maktab ta’limini rivojlantirish davlat umummilliy dasturida nazarda tutilgan chora-tadbirlarning viloyatlar, shahar va tumanlarda ro‘yobga chiqarilishini ta’minlash borasidagi tadbirlar kompleksini amalga oshirish.

4. O‘zbekiston Respublikasi Adliya vazirligi va Moliya vazirligi bir oy muddatda manfaatdor vazirliklar va idoralar bilan birgalikda qonun hujjatlariga mazkur Farmondan kelib chiqadigan o‘zgartish va qo‘shimchalar to‘g‘risida Vazirlar Mahkamasiga takliflar kiritsin.

5. Ushbu Farmonning ijrosini nazorat qilish O‘zbekiston Respublikasi Bosh vaziri Sh. Mirziyoyev zimmasiga yuklansin.