O‘zbekiston Respublikasi Vazirlar Mahkamasining 2002-yil 5-iyuldagi 242-son qarori bilan tasdiqlangan Oilada tibbiy madaniyatni oshirish, ayollarning sog‘ligini mustahkamlash, sog‘lom avlod tug‘ilishi va uni tarbiyalashning ustuvor yo‘nalishlarini amalga oshirish chora-tadbirlarining maqsadli dasturi bajarilishini ta’minlash, shuningdek “Ona va bola skriningi” chaqaloqlar va homilador ayollardagi tug‘ma va avloddan avlodga o‘tuvchi patologiyani erta aniqlash davlat tizimini yanada rivojlantirish va mustahkamlash maqsadida Vazirlar Mahkamasi qaror qiladi:

1. O‘zbekiston Respublikasi Sog‘liqni saqlash vazirligi va “Sog‘lom avlod uchun” jamg‘armasining “Pribori oy” firmasidan (Finlyandiya) skrining tadqiqotlari uchun diagnostika to‘plamlarini sotib olish to‘g‘risidagi taklifiga rozilik berilsin.

2. Quyidagilar:

1998—2001-yillar davrida “Ona va bola skriningi” dasturi doirasida tashkil etilgan skrining markazlari “Wallas Oy” kompaniyasining (Finlyandiya) diagnostika apparatlari, tashkiliy texnika va kommunikatsiya vositalari bilan jihozlanganligi;

2004-yilda “Wallas Oy” kompaniyasining (Finlyandiya) rasmiy eksklyuziv vakili hisoblanadigan “Pribori oy” firmasi (Finlyandiya) bilan “Sog‘lom avlod uchun” jamg‘armasi o‘rtasida skrining tadqiqotlari o‘tkazish uchun reaktivlar yetkazib berish yuzasidan kontrakt tuzilganligi;

“Pribori oy” firmasi bilan tuzilgan 1,1 mln. AQSH dollari summasi miqdoridagi kontraktni moliyalashtirish “Pribori oy” firmasi tomonidan 1 yil muddatga beriladigan foizsiz tovar krediti hisobiga amalga oshirilishi ma’lumot uchun qabul qilinsin.

3. O‘zbekiston Respublikasi Tashqi iqtisodiy aloqalar agentligi yuqorida ko‘rsatilgan kontraktni belgilangan tartibda ekspertizadan o‘tkazsin.

4. O‘zbekiston Respublikasi Moliya vaziri “Sog‘lom avlod uchun” jamg‘armasining ko‘rsatib o‘tilgan tovar krediti bo‘yicha “Pribori oy” firmasi oldidagi majburiyatlari yuzasidan kafolatni O‘zbekiston Respublikasi Hukumati nomidan imzolashga vakil qilinsin.

5. O‘zbekiston Respublikasi Adliya vazirligi O‘zbekiston Respublikasi Hukumati kafolati bo‘yicha belgilangan tartibda yuridik xulosa bersin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari S.T. Inomova zimmasiga yuklansin.